Read Hadiyya 1 Saamu'eel Kitaaba 2 Bible Online

1 Saamu'eel Kitaaba 2 - Hadiyya bible

1 Saamu'eel Kitaaba 2

¹Haanna'a «I wodan Waa'anne liiramaakko. I lombim Waa'inne iimiimaakko. An i diina'anne osaroommo. Waa'i iina hara'mmu bikkinam lobakata liiramaammo.

²«Waa'i'nnoo'i keesammi bee'e; ixxe'nnookkok hore'em bee'e; Ni Moollanni Waa'a laboo maaxamakkam girbi bee'e.

³Bolximminne woccakkotte; amaadimminnem woccakkotte; Moollanni Waa'i hundi luwwam la'oohane; manni bax hundam keenoohane.

⁴Malaayyaam gaadaa'nnek xiyyi iiqamukko. Ihukkaarem hoongaan keen malaayye siixxita'a qoxxito'o.

⁵Goddaa hee'u keen sibaaraakko; sibaaraa hee keenim goddaakko. Alceenna lamar ooso qatto'ookko; lobakat ooso qatto'otem mullatti ikko'ookko.

⁶Waa'i shookko, gatisookkome. Si'oolanne dilliisookko; sii'ooliinsim fissookko.

⁷Ixxi buxoonsookko, goddisookkome; sholliisookko, lonsookkome.

⁸Ixxi buxa buchchiinsi adaraalluwwam gii'l buchchiinsi ki'isookko. Adi'l oosinne afuussookko. Lombi adillanom lago aa'isookko; uulli shooto'o qoxxisaa baxukkok Waa'a; ee shooto'onnem ka uulla qooccukkok ixxotte.

⁹«Ixxonne amma'nnitam minaadaba egerookko. Ihukkaarem Jora baxxam keen tuunsonne uunjantamo. Ayyi manchim ixxi gagina malaayyi yookkoka labisuta'nnim ixxi gaqqi qoxallaninne kaachcha siidooyyo.

¹⁰Waa'inne wocantam keen bi'llamo. Mashka'oomim Waa'i iimanenne ihaa ixxuwwi hanenne gugookko. Waa'i ka uullanne hundannem oogatookko; Adilinam malaayye uwwookko. Ixxi doo'llu adilim kaa'oo'isa issookko» yitu'uuyyi Waa'a galaxxito'o.

¹¹Ee lasage Hilqaan Raama'anne yoo ixxi mi'n beyyo daba'llaa marukko. Ciilichchi Saamu'eelim Seelo'onne afuuraa qeessichchi Eeli'i illagenne ihaa Waa'ina awwaadam hee'ukko.

¹²Eeli'i oos awwaad bee'i jor oos hee'llo'o. Waa'am lonsitam hee'llo'oyyo.

¹³Qeessuwwi minaadabiinsi xa'mmitam irifo'ina uwwamu seeram egettam hee'llo'oyyo. Oohim mat manchi kitima hincaa'oo ammane qeessichchina asse'amaanchi sas qaf yoo xaa'l qapha amadaa waaram hee'ukko. Maar li'oo'nnim

¹⁴Maara sarakkam lob harachchiinsi oo qaph fissu qax maara massaa qeessichchina uwwam hee'ukko. Kitima hincaa'immina Seelo'o waattam Isra'ee'l manni hundim ee'isam bogantam hee'llo'o.

¹⁵Odim eehanniinsi mulli woshshi oo kiti'm maar saramoo'n qaquullam hee'ukkuuyyim di'ira shi'nnisakkoo'nnim qeessichchina asse'amaanchi kitima hincaa'oo manchi beyyo waaraa hanqi egeramu bee'i wocinne «Qeessichchina sarakkam maara iina uwwe; mashka'oomim qeessichchi hasookkok qaquulli maara bagaan ki li'aalli maarayyo» yam hee'ukko.

¹⁶Oo manchim dabarukkuuyyi «See'llisanne gaassaa di'ir shokkaa shi'nnona; ee lasage at hassoottoka doo'llitaa massitootto» yuta'n oo qeessichchi asse'amaanchi «Eehid ihooyyo; eebe'i afeebe'em egeroommoyyo; kaba uwwitoobeelasii sabbittilasii malaayyinne hooraa massoommo» yam hee'ukko.

¹⁷Ee'isinne Eeli'i oos Waa'ina hincoo kitima sholliisso'i bikkina Waa'i illagenne ixxuwwi baaxiil lobakata jor hee'ukko.

¹⁸Saamu'eel ciiloommaninnem talbiinsi baxamu bito xee'aalli «Eefuuda edde'aa Waa'i illagenne awwaadam hee'ukko.

¹⁹Ixxi amam is manchinne maqirem maarag hundam hiinchi kitima hincaa'akkeena firakkam ammanenne hundannem hanenne edde'akkam gootto'i kaabba eebbam hee'llo'o.

²⁰Eeli'im Hilqaana ixxi meentichcho Haanna'anne maqire maasse'oo ammane Hilqaana Waa'ina annanni ihaakkoo manchi issitakka'a uwwitakko'i ka ciilichchi bikkenne ka meentichchoonsi Waa'i kiina mulli ooso uwwona» yaa maasse'am hee'ukko. Ee lasage mine daba'llita'a elle'llam hee'llo'o.

²¹Hanqo'isam Waa'i Haanna'a maasse'ukko. Ee bikkina ee lasage sas goo'n oosoo lam landaa edda'a qatto'o. Laaddi woradichchi Saamu'eelim Waa'ina awwaadukkuuyyi li'ukko.

²²Eeli'im lobakata lomma'nnaa hee'ukko. Ixxi oosim Isra'ee'l minaadabanne issitam hee'llo'i jor baxoo odim hore'em Waa'ina otossakkam dukkaananne awwaaddam landinne maqire eebaqqanchi edancha edanitam hee'llo'isaa hundam macceesam hee'ukko.

²³Ee bikkina «Mahina ka jor woshsha issitakkamuullahe? Baxxakkam jor baxo hundam annannichchiinsim macceesaammo.

²⁴I ooso kido'i jor woshshi gatona. Ku Waa'i minaadab iina kuttam luwwi hundim hore'em lobakata tuussiisoohane.

²⁵Mat manchi mulli mancho shuta'n Waa'i urimminne gatiseena xanookko; ihukkaarem Waa'a hawwodu manchina Waa'a uunxeena ayyi xanookko? Ihona bagaan Waa'i Eeli'i ooso bi'iseena murite'aa hee'u bikkina anni sogitano macceesseena xanto'oyyo.

²⁶Ihukkaarem ooshshichchi Saamu'eel uullichchinne li'ukkuuyyi manni illagennee Waa'i illagennee hibbaa nuuraa siidukkuuyyi li'ukko.

²⁷Mat Waa'i asse'aakkoo hiraagaanchi Eeli'i beyyo waaraa «Waa'i ‹Faari'oon minenne Gaassi kiyyanni Aaroonii ixxi abaroosii Gibxi adilina agid hee'llo'i ammane an I gaga ixxena la'isummo.

²⁸Ixxuwwim Iina qeessuwwi ikka'a kitima hincaa'akkam beyyonne aduruusa wiriissimminne Iinniinsi sogitano xa'mmitam Eefuuda edde'imminne Iina awwaaddona Aaroon abaroosa mulli Isra'ee'l minaadaphphi sulluwwiinsi annanni issaa doo'llummo. Iina kitima hincaa'akkam beyyonne shokkoo kitimiinsim ixxuwwina sharada siixximmi hanqi hee'oo'isa issummo.

²⁹An garoommi beyyonne hincaa'akkamisina ijaajummi kitimaa Iina uwwakkam luwwaa mahina hance'llakko'o? Ki'nnuwwi gaga geejjissakkeena yitakka'a I minaadab Isra'eel Iina uwwiteena eebbo'i luwwa hundam gaassitakka'a itimminne Iinniinsi loboka ki ooso mahina lonsitto?

³⁰Ee bikkina Isra'ee'l Waa'i Moollanni ihummi an Waa'i ki abaroosii ki moollii heer heerinam Iina awwaaddamo› yaa neeyyata issaa hee'ummo. Ihukkaarem kaba ee neeyyaxxi sagara kiina qoxxisaa uwwoommoyyo. Mashka'oomim an eese lonsoo keeno lonsoommo; eese sholliisoo keenom sholliisoommo.

³¹Kaba ka woshsha macceese; oono'o, an ki abaroosiinsii ki moolliinsii qaranto'i goo'n oosikka woraadduwwa hundam shoommi amman afaakko. Ee bikkina ki abaroos woronne qeeraa'l umura siidoo manchi hee'ooyyo.

³²Oono'o, kabadem keesenne lobakat hawwi afookko. An mulli Isra'ee'l minaadabina uwwoommi goddanne to'achchitoo'isa issoommo. Odim ki minennem lommanchi hee'ooyyo.

³³Ihukkaarem ki shumo'i lammibe'iinsi gatoo qeessoomaninne Iina awwaadoo manchi ki ille inddiiddinne jaamisookko; ki foorem kichche'isookko. Mulli ki shumo'i odim woraaddanninem daafamookko.

³⁴Ki lamem oosim Hofinii Finihaasii mat balla matemaa'llem oranne letamaare ku an wocummi sagar hundim hanqi ihaa wo'mmoo'isa moo'llooto.

³⁵Iinam ki bikkenne ihaa amma'nnamaakkookokaa An iittoommi luwwa issookkokaa mulli qeessichcho doo'lloommo. Ixxenam an doo'lloommi adi'l illagenne qeessuwwi ikka'a awwaadam shumo'o uwwoommo.

³⁶Ki shumo'i lambe'iinsi lehoo'n gatukkok ayyim hee'uta'n ee qeessichchi beyyo maraa ixxena gaga heeshaa'aa ixxeensi diinatee hurbaataa uunxookko. Mat ballina itoo hurbaata siixxena qessuwwina awwaadaanchi issakkamisina uunxookko» yukko.