Read Hadiyya 1 Saamu'eel Kitaaba 20 Bible Online

1 Saamu'eel Kitaaba 20 - Hadiyya bible

1 Saamu'eel Kitaaba 20

¹Ee lasage Daawiit Raama'anne yoo Naayootiinsi gibaa Yoonaataan beyyo maraa «Hore'em an maha issummo? Damigummi luwwidu maruwwa? Kiyyanni eese sheena hasookkok an maha hawwodummaarette?» yaa xa'mmukko.

²Yoonaataanim «Kaka'i kiinniinsi qeessona! Iyyanni issoo luwwi hundam hoffokaa lobokaa iina kuroolla; ki woshsham iina maaxooyyo. Ee bikkina ku at yitoo woshshi hanqi iheena xanooyyo» yukko.

³Ihukkaarem Daawiit «Kiyyanni at eese hinkaa'nna iittitooda'e erisa la'ookko. Ee bikkina ixxi isseena sawwu luwwa at laqoobee'isa isseena murte'aakko. Mashka'oomim at eekka laqqilas lobakata kichche'lloo'isa la'ookko! Hee'oo Waa'i Summannee ki foorennee hide'oommo. Kab iina mexxo'i lehiinsi bagaan gatu luwwi bee'e» yukko.

⁴Yoonaataanim «At hassoo luwwi hundam an kiina issoommo» yukko.

⁵Ee bikkina Daawiit «Oono'o, sood aga'n aaggi balla. Ee bikkina soodo an adilinne maqire hurbaata itimmi hasisookko. Ihukkaarem insooxxi maaro'i afeebe'e maaxamona eese geegeese» yaa dabarukko.

⁶«Kiyyanni eese hasulas ixxi qarmanni hundinam hiinchi kitim hincoo balli ihu bikkina <Daawiit ixxi hee'oo beero'o Beetaliheema mareena qoxxisaa xa'mmaakko> yitaa kurerukko.»

⁷Ixxim «Erane yulas ki awwaadaanchina kichche'isoo luwwi bee'e. Ihukkaarem quuqulas eesenne jora isseena sawwukkisa eehanninne laqqootto.

⁸Ihukkaarem at ki awwaadaanchina eroomma isse; mashka'oomim ki awwaadaanchinne maqire Waa'i illagenne hidi'l sagara aaggakko'ookko. An joraammoolas at ki gagim eese shihe; mahina eese kiyyannina higissaa uwwitoohane?» yukko.

⁹Yoonaataanim «Kuk kiinniinsi qee'llona. Iyyanni keesenne jora sawwukkisa la'umta'n an hinkid kiina kuroo'n uroommo?» yukko.

¹⁰Daawiitim «Kiyyanni jor sagara dabaruta'n iina ayyi kurookko?» yaa xa'mmukko.

¹¹Yoonaataanim «Waare ee biiranne fillona!» yukko. Ee bikkina amaxxanta'a fitto'o.

¹²Ee lasage Yoonaataan Daawiitina «Isra'ee'l Moollanni Waa'i naqaash ihona. Iyyanna xa'mmaa xassaa soodo te'im insoodo kido'i ammanenne asse'oommo. Ixxek ki bikkina yoo sawwit eran ihulas kiina la'isoommo.

¹³Ihukkaarem iyyanni kiina jora sawwaakkoolasii ee woshsham kiina la'isumbeelasii Waa'i eesenne jor luwwa issona. Eehanniinsi baasoo luwwam eesenne eebona. Waa'i iyyanninne hee'ukkisam ee'isam kiinninnem ihona.

¹⁴Atim an foorinne yoommi qax doollenne awwaadoommisina Waa'ika eroomma iina isse.

¹⁵Waa'i Daawiit diina'a hundam uulliinsi bi'isoo ammanem ihuta'n ki eroommi bax i abaroosiinsi hore'em annanni ihoone» yukko.

¹⁶Ee bikkina Yoonaataan «Daawiit Diina'anne Waa'i oogatona» yaa Daawiitinne maqire hidi'l sagara aagukko.

¹⁷Yoonaataan Daawiita ixxi gaqqisa iittam hee'u bikkina «Eese hanqo'isa iittitoo'isa la'oommisina odim hide'e» yukko.

¹⁸Ee lasage Yoonaataan «Sood agan aagoo balla; at afuuttoo barcum kora'am gatoo bikkina at maaddanne hee'lloobee'is la'amaakkoohane.

¹⁹Hore'oomam insooxxi maaro'o kanniinsi illageen ku hawwi asheeroo ammane at maaxamti beyyo mattaa Eexeel kin yoo beyyonne afaree'n kollinne maaxame.

²⁰Anim ee kina qasoomman issaa sas xiyyuwwa daraboommo.

²¹Ee lasage «Mare ee xiyyuwwa eebe» yaa mat beeto asse'oommo. Ee beetinam « ‹Oo darabummi xiyyuwwi yookkok kiinniinsi keenette mattaa eebe› yummaa'lleensi Hee'oo Waa'i la'ona! Keese jor luwwi nakkooyyo; jor daafim hee'ooyyo fittaa waare» yukko.

²²Ihukkaarem ee beetina «Xiyyuwwi yookkok kiinniinsi ekkeen higaatette yummaa'lleensi Waa'i mattoo'isina hasaakkoo bikkina mare.

²³Atii anii aangummi hidirina Waa'i ni lambe'enne heer heerinam naqaasha» yukko.

²⁴Ee bikkina Daawiit haqqoronne maaxamaa egerukko. Haareechchi agan aagoo balli ugudanne maadda itakkam mine Saa'ool waarukko.

²⁵Ixxim gortanni gammalanne losamukkisam lombi beyyonne afuurukkaare Abaaneer ixxi gadanonne afuurukko. Yoonataanim adi'l illagenne afuuraa hee'ukko. Ihukkaarem Daawiit barcum kora'am hee'ukko.

²⁶Ihona bagaan Saa'ool ee balla matem sagaram wocukkoyyo. Mashka'oomam Saa'ool Daawiit bikkina sawwukkuuyyi «Ayyi la'ukko mat luwwi ixxonne afaatette te'im See'llisinne laboo'isa muccuroo'n hee'aate» yaa sawwam hee'ukko.

²⁷Agan aagu la'm balli daranne Daawiit afuuroo beyyi kora'am hee'ukko. Eehanniinsi ki'ukkok Saa'ool ixxi beet Yoonaataana «Issayyi beet beeballam kaballam maaddanne siidamubee'ek mahinatte?» yaa xa'mmukko.

²⁸Yoonaataanim «Daawiit Beetaliheema mareena eese lobakata uunxaakko.

²⁹Ixxim ‹Ni abaroos beero'i woronne kitima hincaa'oo bikkina anim ee beyyonne ihoommisina iyyabbaayyi eese ijaaju bikkina maroommo ki illagenne nuura sixxaammoolas iyyabbaayyuwwa moo'eena marona eese geegeese› yaa eese xa'mmaa hee'ukko. Adi'l maaddanne siidameena xanubee'ek eehanninatte» yaa dabarukko.

³⁰Saa'oolim Yoonaataananne lobakata quuqaa «At ee inciicammi boqqi meentichchi beeto! At ki gagina tuulle, kiyyummanam Sholle'nna eebbeena Issayyi beetinne iittantittisa huushummoka labissaatennihe?

³¹Issayyi beet foorinne hee'ukkuuyyi atim ki adillanim qoxxitakamoyyo. Ixxi lehimmi hasisoo bikkina manna asse'llaa i beyyo wossiise» yukko.

³²Yoonaataanim «Mah bikkina lehoohane? Maha bi'isaate?» yaa dabarukko.

³³Eehanniinsi ki'ukkok Yoonaataana sheena amadu bagado huushukko. Ee bikkina ixxi anni Daawiita sheena murte'ukkisa Yoonaataan qoossaa la'ukko.

³⁴Yoonaataanim lobakata quuqaa maaddiinsi ki'ukko. Ixxi anni Daawiita sholliisu bikkina kichche'aa hee'u bikkina agan aagu la'm ballanne hurbaata hore'em itukkoyyo.

³⁵Eehanniinsi la'm ayyaamonne Yoonaataan mat gootto'i beetichcho awwonsaa Daawiitinne maqire ansa issaqanto'i beyyo marukko.

³⁶Ee beetina «Geere! Ka daraboommi xiyyuwwa hase» yukko. Oo beet geerukkaare xiyya eeqixxi kolli darabukko.

³⁷Oo beetim Yoonaataan darabu xiyyi ubu beyyo afukkaare Yoonaataan weeshaa «Oo xiyyi kiinniinsi ekkeen higaakkoollayyonnihe?» yukko.

³⁸Ixxim «Ee beyyonne cawwitaa uullititte! Qaqqise!» yaa shuurukko. Oo beetim ee xiyyuwwa wixxaa'aa ixxi moollanni beyyo daba'llukko.

³⁹Daawiitiinsii Yoonaataanniinsii bagaan ka woshshi bikkina la'ookkok matim hee'ukkoyyo.

⁴⁰Yoonaataanim ee beetina «Ka o'l mu'uta amaddaa beero'o mare» yukko.

⁴¹Oo beet maraa lasage Daawiit ki'n tuubbiinsi afaree'n kollinne maaxamu beyyiinsi firaa uullanne guruphphaa sas kore heeshukko. Ixxii Yoonaataanii lamim suunqantu'uuyyi wi'llitam hee'llo'o. Ihukkaarem Lobakata wi'llukkok Daawiitatte hee'ukko.

⁴²Ee lasage Yoonaataan Daawiitina « ‹Ki lambe'ennee i lambe'ennee ki shumo'i lambe'ennee i shumo'i lambe'ennee Waa'i heer heerinam naqaash ihona› yaqqammaa Waa'i summinne hide'ammaa hee'nnummi bikkina kaba od xummanne mare» yukko. Daawiitim ee beyyiinsi ki'aa marukko. Yoonaataanim beero'o daba'llukko.