Read Hadiyya 1 Saamu'eel Kitaaba 22 Bible Online

1 Saamu'eel Kitaaba 22 - Hadiyya bible

1 Saamu'eel Kitaaba 22

¹Daawiit Gaat beero'iinsi gibaa Aduulaa'm beero'i gadanonne yoo mat daawwa'a marukko. Ixxi abbaayyuwwii mulli ixxi abaroosii kaka macceesso'i ammanenne eekke'e matta'a ixxonne exxito'o.

²Wor amadanto'i keen, badan yoo keenii tiir kichche'u keenii mat mat ikka'a ixxi beyyo mattu'uuyyi ixxuwwik xig soor xibbe afukko. Daawiitim ixxuwwina awwonsaanchi ihukko.

³Daawiit ee beyiinsi ki'aa Moo'aabanne yoo Misiphpha yakkam beyyo marukko. Moo'aaphphi adilam «Waa'i iina issoo luwwa la'eembe'i afeebe'e hay iyyannii iyyummaa waatta'a ki beyyonne afuutamisina ‹iina uunxame»› yaa xa'mmukko.

⁴Ee'isinne ixxi annaa amaa Moo'aaphphi adi'l beyyonne dissukko. Ixxuwwim daawiit maaxamukkuuyyi hee'am hee'u doollenne hundannem ee beyyonne afuutto'o.

⁵Ihona bagaan hiraagaanchi Gaad Daawiitina «Daphphixxi beyyonne afuuttitte; mattaa Yihuxxi uulla aage» yukko. Ee bikkina Daawiit ee beyyiinsi maraa Heereet doomanne aagukko.

⁶Mat balla Saa'ool bagado anganne amadukkisam «Gibi'a» yakkam duunanne «Tamaarisk» yakkam haqqi lugumonne afuuraa hee'ukko. Ixxi gassaanim ixxi kululleetanne uullita'a hee'llo'o. Ee ammanenne Daawiitii ixxi awwonaan hee'llo'i mannii mat beyyonne yo'isa Saa'ool macceesukko.

⁷Saa'oolim ixxi gassaanina «Ki'nnuwwi Biiniyaam manni macceessehe! Hanqinam Issayyi beet Daawiit ki'nnuwwina hundinam abuulli uullaa woyina kaassakkam beyyoo uwwookkokaa gogoxxi lambe'enne gaaxxi awwonsaan issookkokaa labissaka'atennihe?

⁸I hanenne dollottakkamok kanninatennihe? I beet Daawiitinne maqir ihukkisa iina kurukkok ki'nnuwwik mat manchim bee'e. I bikkina sawwookkok hore'em matim bee'e. Te'im I gaqqan ihu manniinsi mat ihu Daawiit ka ammanenne eese sheena ixxena makkoo ammane hasukkuuyyi yoo'isaa i beetim ixxo qoxxisukkuuyyi yoo'isaa iina kurukkok bee'e» yukko.

⁹Ihukkaarem ee beyyonne hee'llo'i Saa'ool ixxi gassaaninne maqire uullaa hee'u Eedoo'm Dooyiq «Issayyi beet Noobanne yoo Ahiixoob beet ihu Abemeeleek beyyo waarukkuuyyi moo'aammo.

¹⁰Abemeeleekim ixxena hasisoo luwwina Waa'a xa'mmaakko; ee'isam Filisxee'm manchi Gooliyaadika bisa'a uwwaakko» yukko.

¹¹Ee bikkina adil Saa'ool Ahiixoob beet qeessichchi Abemeeleekaa Noobanne qeessuwwi hee'llo'i ixxi anni abaroos hundamii asse'aa weeshisukko. Hundim adi'l beyyo waatto'o.

¹²Saa'oolim Abemeeleekina «Abemeeleeka! Macceese» yukko. Abemeeleekim «I Moollanna! Ihona» yukko.

¹³Saa'oolim «Atii Daawiitii i hanenne dollottakkamok mah bikkinatte? Ixxena Waa'a uunxitaa hurbaataa bisa'aa uwwitaatto. Oono'o ixxi kaba i diinakkichchi ihaa eese sheena ixxena makkoo ammane hasukkuuyyi yookko» yukko.

¹⁴Abemeeleekim «Daawiit kiina ama'nnamaakkoo gaaxxi awwonsaancho; ki landichchi aro'o; ki lomba egettam waaridiyya ijaajaanchoo ki adilla'n minennem dummichchanne manni hundim lonsoo manchoo» yaa dabarukko.

¹⁵Hanqinam an ixxena Waa'a xa'mmaammo kukim ixxena xale'i luxxi ammaneyyo. Adila, ki hanenne dollotimmi bikkinatti yakkota'n eese te'im i abaroosa aceeqasimmi kiina labooyyo. Mashka'oomim an ka woshshi bikkina la'oommok ma'lluwwim bee'e.

¹⁶Adilim «Abemeeleeka! Kiinaa ki moollinaa hundinam leh hasisookko» yukko.

¹⁷Eehanniinsi lasage Saa'ool ixxi gadanonne uullito'i waardiyyuwwi kolli daba'llaa «Ka Waa'i qeessuwwa shi'llehe! Mashka'oomim ixxuwwi Daawiitinne maqire eesenne boqqito'ookko. Ee'isam hundem woshsham laqu'uuyyim Daawiit eese lagaa marukkisa laqqu'uuyyim iina kutto'oyyo» yukko. Ihukkaarem waardiyyuwwi «Waa'i qeessuwwa shinoommoyyo» yito'o.

¹⁸Ee bikkina Saa'ool Dooyiqina «Ixxuwwa at shihe» yukko. Dooyiqim ki'aa hundam shukko. Ee balla Dooyiq shaa guullu eefuuda edde'llo'i qeessuwwik xig sadeentayyee ontoo hee'ukko.

¹⁹Ee lasage Saa'ool qeessuwwi hee'llam hee'llo'i Noobanne hee'llam goona, meento, ooso, ciilluwwa, laro, hallaa gereebbi allaachchaa hundam guullisukko.

²⁰Ihukkaarem Abemeeleek goo'n oosiinsi mat Abiyaataar yakkamok xale'i xoraa maraa Daawiitanne exxukko.

²¹Ixxim Waa'ina awwaaddam qeessuwwa Saa'ool guullukkisa Daawiitina kurukko.

²²Daawiitim Abiyaataarina «Ee balla Eedoo'm Dooyiq ee beyyonne hee'u bikkina ka woshsha Saa'oolina kuroo'isa la'aammo. Beeddu kiyyanni mi'n abaroosina xa'mmamoommok anette.

²³Ihukkaarem kaba iinninne afuure; baddititte. Saa'ool keesee eesee lamom sheena hasookko. Ihukkaaram at iinninne maqire xumminne hee'llootto» yukko.