Read Hadiyya 1 Saamu'eel Kitaaba 23 Bible Online

1 Saamu'eel Kitaaba 23 - Hadiyya bible

1 Saamu'eel Kitaaba 23

¹Daawiitinam «Oono'o, Filisxee'm manni Qa'iila qassa'a oodo'onne yoo hurbaata boggamuulla» yakka'a kurakko'o.

²Ee bikkina Daawiit «Maraa Filisxee'm manna qasonnihe?» yaa Waa'a xa'mmukko. Waa'im «Eeyya! Filisxee'm manna qassaa Qa'ii'l manna bichchiinsi gatise» yaa dabarukko.

³Ihukkaarem Daawiita awwontam keen «Ka Yihuxxi uullanne hee'nnummuuyyi baddinoommi lobakat woshshi yookko. Kaba odim Qa'iila mallaa Filisxee'm manna qansumita'n lobakat hawwi neesenne afookko» yito'o.

⁴Eehanniinsi ki'ukkok Daawiit la'mmaagem Waa'a xa'mmukko. Waa'im Filisxee'm manna ki anganne higisaa uwwoommi bikkina Qa'iila dille» yukko.

⁵Ee bikkina Daawiitii ixxi awwonaanii Qa'iila matta'a Filisxee'm manna qassa'a lobakat manna shito'o. Ixxuwwi diinatem qeefadda'a massito'o. Daawiitim Qa'ii'l minaadaba ee'isinne gatisukko.

⁶Abemeeleek beet Abiyaataar Daawiit beyyo Qa'iila gibu ammane Eefuuda amadaa dillaa hee'ukko.

⁷Saa'oolinam Daawiit Qa'iila waarukkisa kurakko'i ammanenne «Waa'i ixxo i anganne ubbuuseenatte. Daawiit kininne girbamu ootii baxamu ooxxi gooccuwwii yoo beero'o iggaa aagimminne ixxi gaga woshaadanne aagisaakko» yukko.

⁸Ee bikkina Saa'ool ixxi gogata orina weeshaa Qa'ii'l uulla gaadimminne Daawiitaa ixxi awwonaanoo kibbitamisna ijaajukko.

⁹Daawiit ixxonne hawwo afiseena Saa'ool gudukkisa macceesu ammanenne qeessichchi Abiyaataarina «Eefuuda amaddaa waare» yukko.

¹⁰Ee lasage Daawiit «Isra'ee'l Moollanni ikkitti Waa'a! Ki awwaadaanchi ihummi i mashka'inne Saa'ool waaraa Qa'iila bi'iseena gudukkisa macceesaammo.

¹¹Eehannah Qa'ii'l manni eese higissa'a uwwitamda'e? Saa'oolim ka uulla dillooda'e? Isra'ee'l Moollanni Waa'a ki agishshina kutto'isina an keese uunxoommo» yukko. Waa'im «Eeyya! Saa'ool hanqinam waarookko» yaa dabarukko.

¹²Daawiitim «Qa'ii'l beero'onne hee'llam manni eesee awwontam mannaa Saa'oolina higissa'a uwwitamda'e?» yaa odim xa'mmukko. Waa'im «Eeyya! Ki'nnuwwa higissa'a uwwitamo» yaa dabarukko.

¹³Ee bikkina Daawiitii loh xibbe ikkam ixxi awwonaanii hundim ee ammanchom Qa'iila utta'a matto'o. Saa'oolim Qa'ii'l beero'iinsi maraa ixxeensi xorukkisa macceesu ammanenne gudisu woshsha urukko.

¹⁴Daawiit uulli udma'anne Ziif gadanonne yoo duunaam uullanne afuurukko. Saa'oolim balli hundichchom ixxo laseesam hee'ukko. Ihukkaarem Waa'i Daawiita higisaa uwwukkoyyo.

¹⁵Daawiitim Saa'ool ixxo sheena waarukkisa moo'ukko. Daawiit Ziif gadanonne yoo uulli udma'anne Hooreesh yakkam beyyonne hee'ukko.

¹⁶Yoonaataanim ee beyyi afeebe'e maraa Waa'i amma'nnisoo'isanne egeroohan ihukkisa la'isimminne

¹⁷«Baddititte iyyanni Saa'ool keese ixxi anginne hawwodeena hore'em xanooyyo. At Isra'eelina adil ikkoo'isaa iinam kiinniinsi woroon la'm beyyi adillan hee'oo'isaa iyyanni danaamisa la'ookko» yaa qoxxisansukko.

¹⁸Ee bikkina lamim Waa'i illagenne iitti saga'l hidiro aaggo'o. Ee beyyiinsim Yoonaataan ixxi mi'n beyyo marukko. Ihukkaarem Daawiit Hooreeshannem afuurukko.

¹⁹Ziif manniinsi mat mat Giibi'anne hee'oo Saa'ool beyyo matta'a «Daawiit ni uullanne Yihuxxi uulli udma'iinsi woroo'n qarinne yoo Hakii'l duunanne yoo Hooreeshanne maaxamaakko.

²⁰Adila, at ixxo amaddeena hinkaa'nna hassooda'e lanqoommo. Ee bikkina ni uulla waattita'n neese ixxo kiina amaddaa hara'mminam hee'nnummo» yito'o.

²¹Saa'oolim ixxuwwina «Iina ka eroomma sawwitakko'i bikkina Waa'i ki'nnuwwa maasse'ona

²²Kabadem mattakka'a ka woshsha odim qoossehe. Ixxi yoo beyyo moo'u manchi ayyetda'e ihukkisa annan issitakka'a laqqehe. Ixxi xorakkamisa la'oohan ihukkisa macceesaammo.

²³Ixxi maaxamoo beyyuwwa erisa laqqehe; siiddakko'i mare'uwwa ee ammanem amaddakka'a waallehe. Ee lasage anim ki'nnuwwinne maqirem maroommo. Kabadem ixxi ee uullanne yoohan ihulas Yihuxxi uulla hundam hasimmi iina hasisoohan ihukkaarem an ixxo hochchaa amadoommo» yukko.

²⁴Ee bikkina ixxuwwi Saa'ool mareena illaageen Ziifa daba'llita'a matto'o. Ee ammane Daawiitii ixxi awwonaanii Yihuxxi uulli udma'iinsi woroo'n qaranne hee'oo ayyi manchim hee'oobee'i cebbi ihaakkoo Maa'oo'n udma'anne hee'llo'o.

²⁵Saa'oolii ixxi gogotii Daawiita hollansiteena fitta'a matto'o. Daawiitim eekka la'u bikkina Maa'oo'n uulli udma'anne kin wo'mmaakkoo mat duunanne firaa eehe'e afuurukko. Saa'oolim eekka macceesu ammanenne Daawiita lobakata hollansukko.

²⁶Saa'oolii ixxi gogotii ee duuniinsi mat kollinne hee'llu'uuyyi Daawiitii ixxi awwonaanii ee duuniinsi mulli kollonne hee'llo'o. Daawiitii ixxi awwonaanii qeefaddeena hincito'i Saa'ooliinsii ixxi gogotiinsii xoteena gaaggaabbam hee'llo'o.

²⁷Ee'isanne hee'llu'uuyyim mat asse'ammaanchi Saa'ool beyyo waaraa «Filisxee'm manni uullanne weeratto'i bikkina qaqqissaa afe» yukko.

²⁸Ee bikkina Daawiit hollansimma uraa Saa'ool Filisxee'm manninne orameena marukko. Eehanniinsi ki'ukkok ee beyyika summa «Xorimmi kina» yita'a weeshsho'o.

²⁹Daawiitim ee beyyiinsi maraa maaxamaa hee'u «Eengadii» yakkam beyyonne afuurukko.