Read Hadiyya 1 Saamu'eel Kitaaba 24 Bible Online

1 Saamu'eel Kitaaba 24 - Hadiyya bible

1 Saamu'eel Kitaaba 24

¹Saa'ool Filisxee'm manna hollansimmiinsi daba'llaa lasonne «Oono, Daawiit Eengaadii yakkam ulli udma'anne yookko» yakka'a kurakko'o.

²Ee bikkina Saa'ool Isra'ee'l minaadab hundiinsim doo'llanto'oo sas kum manna amadaa «Eengaadii» yakkam ulli udma'a eelliinchi firoo kollo Daawiitaa ixxi mannaa hollansaa amadeena marukko.

³Gooqqi inqenne yoo gereebbi garoo beyyuwwi gadanonne yoo mat giriboronne usheexxeena aagukko. Daawiitii ixxi awwonaanim ee giriboronne maaxamta'a afuutta'a hee'llo'o.

⁴Daawiit awwonaanim ixxena «Waa'i iittittoka issitoo'isina ki diinakkichcho ki anganne higisaa uwweena kiina kuru balli kaballa» yito'o. Daawiitim biqinne shurukkuuyyi maraa Saa'ool eddechchika kasa ayyim la'oo'n muraa massukko.

⁵Ihukkaarem Daawiitik tiir usheexxukkoyyo.

⁶Ee bikkina ixxi awwonaanina «Waa'i doo'llaa adil issu i moollanni hanenne i anga ki'isimmiinsi Waa'i eese egerona; an ixxonne matem hawwojjam afisimmi hasisooyyo. Mashka'oomim ixxo Waa'i adil issaakkoohane» yukko.

⁷Eehid Yimminne ixxi awwonaan Saa'oola hawwoddambee'isa Daawiit hoorukko. Saa'oolim ee beyyiinsi ki'aa ee worko'iinsi firaa marukko.

⁸Daawiitim ee beyyiinsi firaa Saa'oola awwonaa «Adila!» yukko. Saa'oolim daba'llaa ixxi kululleeta moo'ukkaare Daawiit uullanne heeshaa xummaatisaa

⁹«An keesenne hawwo afisoommaannisa issita'a kuttam mannika woshsha mahina macceessoolla?

¹⁰Kaballa ka ammanenne giriboronne hee'llittuuyyi Waa'i keese i anganne ubbuusaa hee'ukkisa at gagoomim moo'lleena xantootto. Mat mat manni keese shoommisina kutta'a hee'llo'o. Ihukkaarem an kiina qishixxaa keesenne matem hawwom isseena hasoombee'isa kurummo. Mashka'oomim at Waa'i doollaakkoo adila.

¹¹Iyyanna! Oono'o! At ede'llitti kaabbiinsi muraa amadummi kasa moo'ee! Ee ammane an keese sheena xanam hee'ummo; ihukkaarem eekka issoommi bikkenne ki eddechchika kasa muraa aa'ummo. Ihukkaarem ka jolla te'im boqqooma issumbee'isa la'e; qoosseme. An keesenne jor luwwa baxummoyyo. Ihukkaarem at eese shiteena hollansitoolla.

¹²Ee bikkina ka woshshanne huushamukkok Ayyetda'e moo'aa Waa'i oogatona. An keesenne mah hawwom afiseena hasoombee'i bikkina i hanenne issitoo jor luwwi bikkina hundinam Waa'i kiinniinsi baado miqisona bagaan, i anginne an keese hawwodoommoyyo.

¹³‹Jor luwwa baxxamok xale'i jor manna› yamamoo gaassi woshsha laqqootto; ee bikkina an keese hawwodeena hasoommoyyo.

¹⁴Oono'o, Isra'ee'l adil ayye sheena hasoolda'e moo'ee! Ayyem hollansoolda'e qoosse! Lehu wishichchonnii te'im kora? Ayye hollansoolda'e moo'e!

¹⁵Kabadem Waa'i daanni ihaa ni lame'enne oogatona. I quuxo moo'aa ixxi iina fitamona. Eesem ki angiinsi gatisona» yukko.

¹⁶Daawiit ee woshsha wocaa guullukkisam Saa'ool «I beet Daawiita! Hanqinam kuk ki sagarannihe?» yaa wi'llukko.

¹⁷Ee lasage Saa'ool Daawiitina at hanqo'i mancho. Ihukkaarem an huushamaammo. An keesenne kido'i jora issummuuyyim at iina eroomma issitaatto!

¹⁸Iina eroomma issitoo manchi ikkittisam kaballa naqqasissaatto. Mashka'oomim Waa'i eese ki anganne ubbuusukkaarem at eese shittoyyo.

¹⁹Ixxi Diinakkichchi ixxi anganne aagoohaare hawwodoo'n fatakoo manchi hannonne hee'ookko? Kaballa iina issitti eroommi bikkina Waa'i keese maasse'ona!

²⁰Oono'o, at Isra'ee'l adil ikkoo'isaa Isra'ee'l minaadaphphi adillanim ki gassonne qoxxaa hee'oo'isaa kaballa qoossaa la'aammo.

²¹I shumo'o bi'issoobee'isaa i summam iyyanni miniinsi bi'issoobee'isaa kaba Waa'i illagenne hide'e» yukko.

²²Daawiitim eekka isseena hide'ukko. Ee lasage Saa'ool mine daba'llaa elle'ukko. Daawiitii ixxi awwonaanim maaxamtam beyyo daba'llita'a matto'o.