Read Hadiyya 1 Saamu'eel Kitaaba 26 Bible Online

1 Saamu'eel Kitaaba 26 - Hadiyya bible

1 Saamu'eel Kitaaba 26

¹Ziif yakkam uulliinsi hofqax mannim Saa'ool yoo Gibi'aa yakkam beyyo matta'a «Oono'o, Daawiit Yihuxxi uulli udma'i tochchonne Hakiilaa yakkam duunanne maaxamaakko» yita'a kutto'o.

²Ee bikkina Saa'ool Isra'ee'l minaadabiinsi doo'llanto'i sas kum gaadaano awwonsaa Daawiita haseena Ziif uulli udma'a qaqqisaa marukko.

³Saa'ool Hakiila yakkam duu'n hanenne yoo gooqqi gadanonne wiiddanaa hee'ukko; Daawiit uulli udma'anne hee'ukkuuyyim Saa'ool ixxo sheena waarukkisa macceesaa

⁴Shaashshoo manna asse'aa Saa'ool ee beyyo hanqo'isam afukkisa la'ukko.

⁵Ee beyyiinsim qaqqisaa maraa Saa'oolii ixxi gaadaanii ixxi gaadaa'n awwonsaanchi Neer beet Abaaneerii hee'llam beyyo qoossukko. Saa'oolim ixxi wiiddanu beyyi lambe'enne iinse'aa hee'ukkuuyyi ixxi gaadaan ixxi kululleetanne wiiddanta'a hee'llo'o.

⁶Ee lasage Daawiit Hiite'kkichchi Abemeeleekaa Xaruy oosiinsi Yoo'aab abbaayyi Abiisaa «Ki'nnuwwi lamiinsim iinninne maqire Saa'ool wiiddanu beyyo marookkok ayyette?» yaa xa'mmukko. Abiisim «An maroommo» yaa dabarukko.

⁷Ee bikkina Daawiitii Abiisii ee hiimo Saa'ool wiiddanu beyyo aaggo'o; Saa'oolim ixxi wiiddanu beyyi lambe'enne iinse'aakkoo siiddo'o. Ixxi bagadim ixxi horoo'llaganne uullanne kaasamaa hee'ukko. Abaaneerii ixxi gaadaanim ixxi kululleelanne iinse'lla'a hee'llo'o.

⁸Abiisim Daawiitina «Waa'i ka hiimonne ki diinakkichcho ki anganne ubbuusaakko. Ee bikkina ka ixxi bagadinnem ixxo qasaa uullanne amaxxansaa uroommo; xale'i mat qashshi ihoo bikkina la'mmek hasisooyyo» yukko.

⁹Ihukkaarem Daawiit «Ixxo at shimmi hasisooyyo! Waa'i doo'llaa adil issu manna shoo manna Waa'i ixxi gagoomim guzumo'ookko.

¹⁰hee'oo Waa'i summinne kiina hide'aa kuroommo; Waa'i ixxi gagoomim Saa'oola shookko. Lehoo balli afaa te'im orinne ixxi lehoo'n gatooyyo.

¹¹Waa'i doo'llaa adil isukkaannonne hawwojja afisimmi iinniinsi qee'llona. Eehan ihoo'n ixxeka bagadoo wo'o inkiiraanchoo amandaa mallona» yukko.

¹²Ee bikkina Daawiit ixxi bagadoo wo'o inkiiraanchoo Saa'ool horoo'llagiinsi ki'isaa ixxii Abiisii ee beyyiinsi matto'o. Ku woshshi hundim ihukkuuyyi ayyim eekka moo'ukkokii baqaahim la'ukkokii hee'ukkoyyo. Mashka'oomim Waa'i ixxuwwanne kee'mmaalli diriiro fatakaa hee'u bikkina qallita'a diriitta'a hee'llo'o.

¹³Ee lasage Daawiit cebbi eeqidonne ixxi Diina'i afeena xanoobee'i beyyonne duu'n ludonne firukko.

¹⁴Ixxi sagara iimaa'aa Saa'ool gaadaa'n kollii Abaaneer kollii Shuurukkuuyyi «Abaneeraa macceesaatennihe?» yukko. Abaaneerim «Ka'isa shuurukkuuyyi adilina diriiro hoorookkok ayyette?» yukko.

¹⁵Daawiitim «Abaneeraa! At Isra'eelanne la'antaattoo geejji manchoyyonnihe? Eehannah ki moollanni adila danaamisa egettoobee'ek mahinatte? Oono'o ni manniinsi mat manchi ki moollanna sheena wiidda'n woro aagaa hee'ukko.

¹⁶At ki baxonne amma'nnantaa siidantittoyyo. Abaneeraa! An hee'oo Waa'i summinne hide'oommo. Ki'nnuwwina hundinam lehimmi hasisookko. Mashka'oomim Waa'i doo'llaa adil issu ki'n moollanni adila egettakkeena xantakko'oyyo. Ixxi horoo'llaganne hee'u adi'l bagadii wo'o inkiiraanchii kaba hannonne yooda'e moo'e!» yukko.

¹⁷Saa'oolim Daawiit sagara annanni issaa la'u bikkina «I beet Daawiita! Hanqinam kuk ki sagarannihe?» yaa xa'mmukko. Daawiitim «Eeyya adila!» yaa dabarukko.

¹⁸I moollanna eese ki awwaadaancho mahina hoollansitoolla? Issummi luwwi mahaa? Mah jora baxummahe?

¹⁹Adila! An kiina kuroommi woshsha macceese! Keese iina adil issukkok Waa'i ihaakkoota'n kitima hincaa'imminne ixxi quunqa dabaroo'isina issimmi xansiisam hee'ukko. Ihukkaarem kaka issito'ok manni ikko'oolas Waa'ik duunchi ixxuwwi hanenne dillona. Mashka'oomim Waa'anne otossakkam uulliinsi yaayyamaa firaa qophpha'n waa'uwwanne otossakkam uullanne afuuroommisa issito'ookko.

²⁰Waa'iinsi qee'llaa mulli minaadab uullanne lehoommisa issititte. Kaa'n lombaam Isra'ee'l adil kochchisa xigamoommi eese mahina hollansoohane? Uulli udma'i heedoo'llisa eese hollansookkok mahinate?» yukko?

²¹Saa'oolim «Hanqinam an huushamaammo; I beet Daawiita! I beyyo daba'llitaa waare; an la'mmaagge keese hawwodeena hasoommoyyo; mashka'oomim ka hiimonne i foore gatissaatto; an qawwi manchisa ihaammo; Kee'mmaallisam huushamaammo!» yaa dabarukko.

²²Daawiitim «Adila! Oono'o, ki bagado ki gaadaaniinsi mat manchi waaraa massona.

²³Ama'nnanto'i er mannina ixxuwwi er baxika bito miqookkok Waa'a! Oono'o, Waa'i keese kaballa i anganne ubbuusaa hee'ukko. Ihukkaarem Waa'i doo'llaa adil issu keese an hawwodeena hasummoyyo.

²⁴An kaballa ki foore lonsummisa Waa'i eese ee'isam hawwii fissimminne egerona» yaa dabarukko.

²⁵Saa'oolim Daawiitina «I beeto! Waa'i keese maasse'ona; baxxoo luwwi hundim kiina makkona» yukko. Ee bikkina Daawiit hasu beyyo marukko. Saa'oolim ixxi mine elle'ukko.