Read Hadiyya 1 Saamu'eel Kitaaba 27 Bible Online

1 Saamu'eel Kitaaba 27 - Hadiyya bible

1 Saamu'eel Kitaaba 27

¹Daawiitim ixxi wodanonne «Mat balla Saa'ool eese shookko. Kaba iina e'llookkok ixxeensi xoraa Filisxee'm uulla marimma; ee lasage Saa'ool Isra'ee'l uullanne eese hasimma uroo bikkina xumminne hee'eena xanoommo» yaa sawwukko.

²Ee bikkina Daawiitii ixxek lohem xibbi awwonaanii ee ammanem ki'lla'a Gaat adil ihu Maa'ook beet Akiish beyyo matto'o.

³Daawiitii ixxi awwonaanim ixxuwwi abaroosinne maqirem Gaatanne afuutto'o. Daawiitim ixxi lamem meentinne, Yizra'ee'l Ahino'aamennee Qarmeeloos Naabaal arette hee'llo'i Abigeelennee maqire hee'ukko.

⁴Saa'oolim Daawiit Gaata yakkam uulla gibaa marukkisa macceesu ammanenne ixxo hasaa siideena issam hee'u yakit hundam urukko.

⁵Daawiitim adil Akiishina «Eese iittitoohan ikkittaa'lleensi mat hoffi beero'onne hee'oommisa isse. I moollanna, ki adilla'n beero'onne kiinninne maqire hee'immi iina labooyyo» yukko.

⁶Ee bikkina Akiish Xiqlaaga yakkam beero'o Daawiitina uwwukko. Ee mashka'inne ee ammaniinsi ki'isaa Xiqlaag Yihuxxi adilluwwi uulli ihaa gatukko.

⁷Ee'isinne Daawiit Filisxee'm uullanne mat hiinchoo soor aganaa afuurukko.

⁸Ee doollenne Daawiitii ixxi awwonaanii ee uullanne qeeraa'l doolle hee'llo'i Gashuu'lleka, Geriizikaa Amaaleeq mannaa qasso'o. Oo mannim Tele'oomiinsi ki'isaa Suurannee Gibxi uullannee afeebe'e yoo uullanne hee'llo'o.

⁹Goonaa meentoo hundam shukkuuyyii gereebba, laro, halla, gaameela'aa eddechchaa hundam massam hee'ukko. Ee lasage Daawiit Akiish beyyo daba'llukko.

¹⁰Akiishim «Kakore, gaaddakko'ok hinka'i kollinnette?» yaa xa'mmukkaare Daawiiti «Neese gaandummok Yihuxxi uulliinsi woroo'n qarinne yoo kollinnee ee'isam Yiraahimaa'eel sulli uullinnee Qeene'i manni hee'llam uullinette» yaa dabarukko.

¹¹Daawiitim «Ixxi ka'isa issaakko yita'a ni bikkina kuttamo» yaa sawwu bikkina goonchom ihukko meentichcho foorinne gatisaa Gaata yakkam beero'o eebukkoyyo. Filisxee'm uullanne hee'u doollenne hundannem ee'isa issimmi ixxena losamaakkoohan hee'ukko.

¹²Ihukkaarem Akiish Daawiita amma'nnam hee'u bikkina «Ixxi gaqqi minaadab ihu Isra'eel ixxo iittoobee'i bikkina ixxi heechchi doollenne hundannem iina awwaadookko» yaa sawwam hee'ukko.