Read Hadiyya 1 Saamu'eel Kitaaba 28 Bible Online

1 Saamu'eel Kitaaba 28 - Hadiyya bible

1 Saamu'eel Kitaaba 28

¹Ee lasage Filisxee'm manni Isra'ee'l manna qasseena ixxuwwi gogota wixxaa'llo'o. Akiishim Daawiitina «Atii ki awwonaanii maqirem orina firimmi hasisoo'isa la'e!» yukko.

²Daawiitim «An ki awwaadaanchi maha issoomda'e ee ammane at ki gagoomim moo'llootto» yukko. Akiishim «Erane! An keese hee'oommi doollenne hundannem i lombi waardiyyichchi issoommo» yukko.

³ Kaba Saamu'eel lehukkaanniinsi bashil amman higaakko. Isra'ee'l minaadabim ixxi bikkina kichche'lla'a wi'llita'a ixxi hee'am hee'u Raama'i beero'onne waammito'ookko. Kanniinsi illageen Saa'ool kiiraanoo wiidda weeshoo keenoo Isra'ee'l uulliinsi yaayyaa hee'ukko.

⁴Filisxee'm gaadaan wixxita'a waatta'a Shuunee'm beero'i gadanonne wiiddanto'o. Saa'oolim Isra'ee'l manna wixxaa'aa waaraa Gilbo'i duunanne wiiddanukko.

⁵Saa'ool Filisxee'm gaadaa'n dutooma moo'u ammanenne lobakata baa'aa huxe'ukko.

⁶Ee bikkina maha issimmi hasisooda'e Waa'a xa'mmukko. Ihukkaarem Waa'i haqaawwinne, Uuriiminne, Tuumiiminnee hiraagaa'n kollinnee dabachcha uwwukkoyyo.

⁷Ee bikkina Saa'ool «Wiidda weeshsham mat meentichcho hassehe; anim iseensi sogitano aa'oommo» yaa ixxi gassaano ijaajukko. Ixxuwwim «Mat Indoorekkichcho meentichcho yo'o» yita'a dabatto'o.

⁸Saa'oolim ixxi gaqqi eddechcha dabassaa ixxo ayyim la'oobee'isa ihaa hiimonne lam mancho awwonsaa ee meentichchi beyyo marukko. Ee beyyo afukkisam «Ayyaannuwwa weeshshaa ka lasage ihoo woshshi bikkina kure. Ixxi summa weeshoommi manchikam wiidda weeshe» yukko.

⁹Oo meentichchom «Adil Saa'ool issu luwwa laqqootto; ixxi kiiraanoo wiidda weeshoo keenoo Isra'ee'l uulliinsi bi'isaakko; eehannah at eese qaashanne aagissaa shisiisseena hassoottok mahinatte?» yita'a dabatto'o.

¹⁰Ee lasage Saa'ool «Ka woshshanne keesenne matem hawwim afoobee'isina hee'oo Waa'i summinne hide'oommo» yukko.

¹¹«Eehannah ayye ki'isahe?» yita'a xa'mmito'o. Ixxim «Saamu'eela ki'ise» yukko.

¹²Isem Saamu'eela moo'llo'i ammanenne sagara haraassita'a laattu'uuyyi «Eese mahina qawwiissitto? At adil Saa'oolatte» yita'a laatto'o.

¹³Adilim «Maham baddititte! Eehan ihoo'n moo'l luwwi maha?» yaa xa'mmukko. Isem «Waa'ik mat hibbaam ayyaan waammiinsi firukkuuyyi mo'oommuulla» yito'o.

¹⁴Ixxim «Maha laboolla?» yaa xa'mmukko. Isem «Oono'o kaabba edde'aakkoo mat lommanchi ki'oolla» yita'a dabatto'o. Saa'oolim oo ayyaan Saamu'eelatte ihukkisa la'aa ixxi lombi bikkina uullanne heeshaa anga ki'isukko.

¹⁵Saamu'eelim Saa'oolina «Usheexeena hoottoollak mah bikkinatte? Mah bikkina waammiinsi ki'oommisina weeshissitto?» yukko. Saa'oolim «Oono'o an kee'mmaalli hawwonne yoommo; Filisxee'm manni iinninne orantamuulla; Waa'im eese uraakko; hiraagaa'n kollinnee haqaawwinnee dabachcha uwweena hasukkoyyo; ee bikkina an maha issimmi hasisooda'e iina kuttona ki'lloo'isina weeshisummo» yaa dabarukko.

¹⁶Saamu'eelim Saa'oolina «Waa'i kiinniinsi annanni ihaa ki diinakkichchi ihukkaa'lleensi eese mahina weeshissoolla?

¹⁷Waa'i i kollinne ihaa kiina kuru luwwi hundam kaba wonshoolla. Adillanom kiinniinsi hooraa Daawiitina uwwaakko.

¹⁸At Waa'ina ijaajantibee'i bikkina ixxi Amaaleeq minaadabanne lobakata quuqaa isse yu luwwa issitti bee'i bikkina kaballa keesenne Waa'i kaka issaakko.

¹⁹Ee bikkina Waa'i keesee Isra'ee'l minaadabaa Filisxee'm minaadabina higisaa uwwookko. Soodo atii ki oosii an yoommi beyyo waattakkamo; Waa'im Isra'ee'l gogota Filisxeemina higisaa uwwookko» yukko.

²⁰Saa'oolim Saamu'eel wocu sagaranne muggaa lafilafaa ubukko. Uullanne biddiqaa ubaa ballaa hiimoo hundam wo'oo hurbaataa suumenne aagisu bee'i bikkina hoogaa hee'ukko.

²¹Oo meentichchom hincita'a moo'llamaare baddaa huxe'am hee'ukko. Isem «I moollanna! At yitti luwwa isseena i gaga higisaa uwwaammo.

²²At odim ki kollinne an keese xa'mmoommi luwwa isse; hoffi hurbaatam kiina gudisoommo qoxxitaa taakke'lloo'isina hurbaata itimmi hasisookko» yito'o.

²³Saa'oolim «Ma'lluwwam itoommoyyo» yaa sabukko. Ihukkaarem ixxi gassaan itoo'isina meentichchonne maqirem xishshaa'lla'a uunxito'i bikkina «Ihona» yukko. Uullanne ubu beyyiinsim ki'aa ara'anne afuurukko.

²⁴Oo meentichchom is minenne hee'u di'ir wee'ichcho qaqqissa'a dussiissa'a hoffi qamam aa'illa'a qufissa'a, urisho'i bee'i qorosho'o satto'o.

²⁵Ee hurbaatam Saa'oolinaa ixxi gassaaninaa hincaa'llo'aare itto'o. Ee hiimom ee beyyiinsi ki'lla'a matto'o.