Read Hadiyya 1 Saamu'eel Kitaaba 3 Bible Online

1 Saamu'eel Kitaaba 3 - Hadiyya bible

1 Saamu'eel Kitaaba 3

¹Saamu'eelim woraaddaninne Eeli'i illagennetti ihaa Waa'ina awwaadam hee'ukko. Ee doollennem Waa'i sagar kuramam hee'ukkoyyo; kaaltim moo'amam hee'ukkoyyo.

²Eeli'ik illi lomma'nnimmiinsi ki'ukkok jaamaa hee'ukko. Ixxim mat hiimo ixxi iinse'oo minenne iinse'aa hee'ukko.

³Keesammi Minenne caakkisakko'i caakki xoo'oo'nnim Saamu'eel Keesammi Hidi'l Saga'l Saaxin yoo Keesammi Minenne iinse'aa hee'ukko.

⁴Waa'im Saamu'eela weeshukko; Saamu'eelim «Yee!» yukko.

⁵Ixxim Eeli'i beyyo geeraa maraa «Oono'o eese weeshshittaare waaraammo» yukko. Ihukkaarem Eeli'i «An weeshummoyyo; mattaa iinse'e» yukko. Saamu'eelim maraa iinse'ukko.

⁶Waa'i odim Saamu'eela weeshukko. Saamu'eelim ixxo weesham hee'ukkok Waa'i ihukkisa la'ukkoyyo; mashka'oomim eehanniinsi illageen Waa'i ixxenne wocu balli hee'ukkoyyo. Ee bikkina Eeli'i weeshukkoka labisaa ixxi beyyo maraa «Oono'o, weeshshittaare waaraammo» yukko. Ihukkaarem Eeli'i «I beeto! An keese weeshummoyyo mattaa iinse'e» yukko.

⁸Waa'i Saamu'eela saxxaagge odim weeshukko. Saamu'eelim ki'aa Eeli'i beyyo maraa «Oono'o, eese weeshshitti bikkina waaraammo» yukko. Ee lasage Saamu'eela weesham hee'ukkok Waa'i ihukkisa Eeli'i la'ukko.

⁹Ee bikkina Eeli'i Saamu'eelina «Mattaa iinse'e; odim weeshukkaa'lleensi I Moollanna! Oono'o, an ki awwaadaanchi macceesoommuulla woce› yihe» yaa Saamu'eela sogukko. Saamu'eelim daba'llaa maraa iinse'ukko.

¹⁰Waa'im waaraa ee beyyonne uullukko. Illagee'nnisam Saamu'eela! Saamu'eela! «Yaa weeshukko». Saamu'eelim «I Moollanna! Oono'o, ki awwaadaanchi macceesoommuulla woce» yukko.

¹¹Waa'im Saamu'eelina «Ono'o, an Isra'ee'l minaadabanne lobakata u'nnisoo mat woshsha issoommi balli hincaakko. Ee woshsha macceesu manni hundim hirirookko.

¹²Ee balla luxxaanniinsi ki'isaa lasaanchi afeebe'e Eeli'innee ixxi abaroosannee gaassaahim qoxxisaa kurummi woshsha hundam guullaa issoommo.

¹³Mashka'oomim Eeli'i ixxi oos eese gadda'a jor luwwa issito'isa la'ukkuuyyim axeeraa hoorubee'i bikkina heer heerinam ixxi abaroosa guzumo'oommisa gaassaatim kuraammo.

¹⁴Ee bikkina Eeli'i abaroos baaxiil ayyi kitiminnem te'im Waa'ina uwwakkam luwwi hundinnem heer heerinam haafamoobee'isa hide'aammo» yukko.

¹⁵Saamu'eelim soodeebe'i afeebe'e iinse'aa egerukko. Soodaa lasage ki'aa Keesammi Mi'nneka gooccuwwa fooqaa'ukko. Moo'u kaaltam Eeli'ina kurimma baddukko.

¹⁶Ihukkaarem Eeli'i «I beeto! Saamu'eela» yaa weeshukko. Saamu'eelim «Yee!» yukko.

¹⁷Eeli'im «Waa'i kiina kuru luwwi maha? Iinniinsi maham maaxxitte; Waa'i kiina kuru woshshi hundam iina kuttibeelas Waa'i kee'mmaalli guzumo'o keesenne eebookko» yukko.

¹⁸Ee lasage hundem woshsham Saamu'eel Eeli'ina kurukko. Mat woshsham maaxaa gatisukkoyyo. Eeli'im «Ixxi Waa'i ihu bikkina ixxena eran ihaa moo'amukkoka hundam issona» yukko.

¹⁹Saamu'eelim li'ukkuuyyi marukko. Waa'im ixxenne maqire hee'u bikkina Saamu'eel wocam hee'u woshshi hundam wonsham hee'ukko.

²⁰Eehanniinsi ki'ukkok Daaniinsi Bersaabe'i afeebe'e hee'llam Isra'ee'l minaadab hundim Saamu'eel Waa'i hiraagaanchi ihukkisa laqqo'o.

²¹Waa'i illagee'nnisam Saamu'eelina edaa, edaa caakkaa la'amukko; Saamu'eel wocam hee'u woshshi hundam Isra'ee'l minaadab erisa macceesam hee'ukko.