Read Hadiyya 1 Saamu'eel Kitaaba 31 Bible Online

1 Saamu'eel Kitaaba 31 - Hadiyya bible

1 Saamu'eel Kitaaba 31

¹Filisxee'm manni Gilbo'i duunanne Isra'ee'l manninne oramto'o. Eekke'em lobakat Isra'ee'l manna shito'o. Gatto'i keenim adil Saa'oolii ixxi oosii edanta'a gibbo'o.

²Ihukkaarem Filisxee'm manni hollanta'a affo'i bikkina sasem Saa'ool oosom Yoonaataana, Aminaadaabaa Maalkiishu'aa shito'o.

³Saa'ool kululleetanne or qoxxu bikkina Saa'ool gagoomim ixxi diina'iinsi darabamu xiyyinne aphphisamaa jorisa madaa'ukko;

⁴Saa'oolim ixxi gaaxxi mu'uxxi iyyaanchina «Ku ballachchantobee'i Filisxee'm manni waatta'a qassu'uuyyi eesenne lellitambee'isa ki bisa'inne eese shihe» yukko. Ihukkaarem oo gaaxxi mu'uta iyyaanchi eekka issimma baddukko; ee bikkina Saa'ool ixxi gagim ixxi bisa'i qaranne ubukko.

⁵Oo gaaxxi mu'uta iyyaanchim Saa'ool lehukkisa moo'u ammanenne ixxim ixxi gaqqi bisa'i qaranne ubaa Saa'oolinne maqirem lehukko.

⁶Saa'ool, ixxek sasem goo'n oosii gaaxxi mu'uta iyyaanchii leto'ok ee'isinnetti ihukkuuyyi Saa'ool awwonaanim ee balla maqirem leto'o.

⁷Yoordaanoos daajjiinsi eelliinchi firinnee Iyziraa'ee'l cebbiinsi eeqidinnee hee'llo'i Isra'ee'l mannim Isra'ee'l gogot gibukkisaa Saa'oolii ixxi oosim leto'isaa macceessa'a ixxuwwi beero'o utta'a gibbo'o. Filisxee'm mannim waatta'a ee beero'uwwa amaddo'o.

⁸Oriinsi lasage la'm ayyaamonne Filisxee'm manni leto'i manni leeshiinsi lade'llo'i o'l mu'uta titteena matta'a Saa'oolaa ixxeka sasem oosoo Gilbo'i duuninne ubbo'oo siiddo'o.

⁹Saa'ool horoorem mutta'a o'l mu'utam maxatta'a amadiisimminne ixxuwwi qophpha'n waa'uwwinaa ixxuwwi minaadabinaa kaachchi mishiraachcha kuttona manna asse'llo'o.

¹⁰Ee lasage Filisxee'm manni Saa'oolika o'l mu'uttuwwa Asitaaroota yamantam meentichchi qophpha'n waa'i minenne dissito'o. Saa'ool leesham Beetishaana yakkam beero'i ki'n ootanne musmaarinne tollito'o.

¹¹Gala'aadanne hee'llam Yaabeesh mannim Filisxee'm manni Saa'oollanne issito'i luwwa macceesso'i ammanenne,

¹²ixxuwwik gitannuwwi dangonnem ki'lla'a hiimonne Beetishaa'n beero'o matto'o. Saa'oolikaa ixxi oosikaa leesha beero'i ki'n ootiinsi dilliissa'a Yaabeesh beero'onne eebba'a shokkiisso'o.

¹³Ixxuwwi miqem ee beero'i woronne Taamaariska yakkam haqqi lugumonne waammita'a lamar balla soommanto'o.