Read Hadiyya 1 Saamu'eel Kitaaba 4 Bible Online

1 Saamu'eel Kitaaba 4 - Hadiyya bible

1 Saamu'eel Kitaaba 4

¹Ee ammane Isra'ee'l minaadab Filisxee'm minaadaba qasseena fitta'a Abeni'eezera yakkam beyyonne wiiddanto'o. Filisxee'm minaadabim Afeeqa yakkam beyyonne wiiddanto'o.

²Filisxee'm minaadabim qasimma amaddo'o. Kee'mmaalli oriinsi lasage Isra'ee'l minaadaba kaa'lla'a o'l beyyonne soor kum manna shito'o.

³Oriinsi gatta'a xotto'i manni ixxuwwi wiidda'n beyyo daba'llito'i ammanenne Isra'ee'l awwonsaan «Kaballa Filisxee'm minaadab neese kaa'llamisina Waa'i cawwaa urukkok mahinatte? Niinninne maqire maraa ni diina'i angiinsi gatisoo'isina kaba mallaa Hidi'l Saga'l Saaxina Seelo'iinsi eembona» yito'o.

⁴Ee bikkina ixxuwwi Seelo'o manna asse'lla'a Kiruubbuwwi lambe'enne ixxi adilla'n barcumanne afuuru gogoxxi Moollanni Waa'i Hidi'l Sagai'l Saaxina eebisso'o. Eeli'i lamem oosim Hofiniinii Finihaasii ee Hidi'l Saga'l Saaxininne maqirem waatto'o.

⁵Waa'ik Hidi'l Saga'l Saaxin ee beyyo afu ammanenne Isra'ee'l minaadab uulli heekke'oo qaxa liiranchinne lophphaakkoo ilillaaxxi sagara macceesisso'o.

⁶Filisxee'm manni ee ilillaaxxeka sagara macceessa'a «Ku Ibro'i manni hegeegonne macceensoommi ilillaaxxi sagar mahane?» yaqqanto'o. Waa'i Hidi'l Saga'l Saaxin Ibro'i manni wiidda'n beyyo Waarukkisa laqqo'i ammanenne

⁷baddita'a «Waa'uwwiinsi mat ixxuwwi wiidda'n beyyo waaraakko; neese bi'nnaammo! kanniinsi illageen kido'i luwwi ihaa la'ooyyo.

⁸Aayye! Ka wodaam waa'uwwi angiinsi neese ayyi gatisookko? Ixxuwwi Gibxi uulli manna annanni annanni boobannuwwinne uulli udma'anne bi'isso'oo keeno!

⁹Filisxee'm manna! Ee bikkina kaba qoxxehe! Goonoo'mmitakka'a orammehe; ixxuwwi niina agid hee'llo'isam neesem odim Ibro'i mannina agid inkaa ganteenatte; ee bikkina goonoo'mmitakka'atii qoxxitakka'atii orammehe!» yito'o.

¹⁰Filisxee'm mannim qoxxita'a qasanta'a Isra'ee'l manna kaa'llo'o; Isra'ee'l mannim ixxuwwi dukkaa'n kolli gibbo'o; lobakat beeddanchi ihu bikkina sad kum Isra'ee'l gaadaan leto'o.

¹¹Waa'ik Hidi'l Saga'l Saaxinim qeefadamukko. Eeli'i Lamem oosim Hofiniinii Finihaasii leto'o.

¹²Biiniyaam sulliinsi mat manchi o'l beyiinsi gerukkuuyyi ee ayyaamom Seelo'i beero'o afukko. Ixxim kichchechcha la'iseena ixxi eddechcha dereeraa ixxi horoorennem dira laphphaa hee'ukko.

¹³Eeli'im Waa'i Hidi'l Saga'l Saaxi'n bikkina sawwiminne u'nnamukuuyyi gooqqi inqenne gudisakko'oo barcumanne afuuraa egeraa hee'ukko. Oo woshsha amadaa waaru manchim hegeegonne hundannem wocukkuuyyi macceesso'i manni hundim muggita'a laachcha gugisso'o.

¹⁴Eeli'im ee laachcha macceesaa «Ku laachchi hundim maruchcho» yaa xa'mmukko. Oo manchim ka woshsha eeli'ina kureena qaqqisaa marukko.

¹⁵Ee doollenne Eeli'i honsayyee sadeenti hiinchi lommanchoo hee'ukko. Ixxekim illi jaamaa hee'ukko.

¹⁶Oo woshsha kuram hee'u manchim hincaa «An o'l beyyiinsi xoraatette waarummok; kaballa keyye afummokim kee'mmaalli geellichchinnette» yukko. Eeli'im «I beetoo! Eehannah hinkidette?» yukko.

¹⁷Oo woshsha amadaa waaru manchim «Isra'ee'l gaadaan kaa'anta'a Filisxee'm gaadaa'n illagiinsi gibbo'o. Oo sholle'nnim neesenne afimmi lobakata kichche'isoohane! Ee beeddu manninne maqirem ki oos Hofiniinii Finihaasii leto'ookko. Waa'i Hidi'l Saga'l Saaxinim qeefadamaakko» yaa dabarukko.

¹⁸Oo manchim Waa'i Hidi'l Saga'l Saaxin qeefadamukkisa kuru ammanenne Eeli'i ooxxi gooc gadanonne afuuru barcumiinsi afa'llaachcha ubukko. Ixxim lomma'nnaahii lobakata geejjaahii hee'u bikkina ubu ammanenne qo'llo mu'llaa lehukko. Eeli'im Isra'ee'l minaadaba awwonsukkuuyyi hee'ukkok sor hiinchi hee'ukko.

¹⁹Finihaas mi'n amatte hee'llo'i Eeli'i beet are lamfooratte hee'llo'o; qattam ammanim hincaa hee'ukko. Waa'i Hidi'l Saga'l Saaxin qeefadamukkisaa is ballii is manchii leto'isaa macceesso'i ammanenne dangonnem xuuchchi amadukkaare qatto'o.

²⁰Isekim foor fireena ihukkuuyyi qassiissam meentichcho «Baddititte qoxxe! Goonchi beeto qattaatto» yito'o; ihukkaarem ise macceessa'a dabachcha uwwiteena xanto'ooyyo.

²¹Ihukkaarem hoffi sagarinne «Waa'ik lombi Isra'eeliinsi annanni ihukko» yita'a ee beet summa Iikaabood[1] yita'a fissito'o. Ka'isa yimmim Waa'i Hidi'l Saga'l Saaxi'n qeefadanchaa is ballikaa is manchikaa lehoo moo'isoohan hee'ukko.

²²Odim «Waa'i Hidi'l Saga'l Saaxin qeefadamu bikkina Waa'ik lombi Isra'eeliinsi annanni ihaakko» yito'o.