Read Hadiyya 1 Saamu'eel Kitaaba 6 Bible Online

1 Saamu'eel Kitaaba 6 - Hadiyya bible

1 Saamu'eel Kitaaba 6

¹Waa'i Hidi'l Saga'l Saaxin Filisxee'm uullanne lamar agana afuuraa lasge

²Filisxee'm minaadab ixxuwwi qeessuwwaa kiiraanoo weeshsha'a «Hidi'l Saga'l Saaxina maha issimmi niina e'llookko? Hee'u beyyonne dabarimmina hinkid issinaa asse'nnoomda'e niina bilaato kullehe» yito'o.

³Ixxuwwim «Isra'ee'l Waa'ika Hidi'l Saga'l Saaxina dabattakka'a asse'llakkeena hassakkolas ki'nnuwwi hawwoddakko'i hawwojjina guzumo'i ihoo luwwa eddakka'a asse'immi hasisookko. Waa'i Hidi'l Saga'l Saaxin matem guzumo'im exxoo'n marimmi hasisooyyo. Eehid issitakkolas ki'nnuwwi jabbiinsi fayye'llakamo ixxi ki'nnuwwa qoxxaallisa guzumo'u mashka'am laqqakkamo» yito'o.

⁴Filisxee'm minaadabim «Ni bi'ishshi bikkina guzumo'i ihoo'isina hinkido'i luwwa endaa asse'nno? yita'a xa'mmito'o. Ixxuwwim «Ee dashshi kobi'llanne baxanto'oo onti worqi gawje'ee filisxee'm adilluwwi xigonne odim dabayya kobi'llanne baxamu onti worqi gawje'ee ihimmi hasisookko. Mashka'oomim ki'nnuwwannee ki'nnuwwi adilluwwannee asse'amu booban mato» yito'o.

⁵Ki'nnuwwi uulla bi'isimmina asse'anto'i dabayyannee dashshannee kobi'llissakka'a baxxakka'a kitim ihoo'isina hincaa'imminne Isra'ee'l Waa'ina lomba uwwimmi hasisookko. Eekka issitakkolas ayyi la'ukko ki'nnuwwa, ki'nnuwwi waa'uwwaa ki'nnuwwi uullaa guzumo'oo boobana egedeena xanookko.

⁶Gibxi uulli adilii Gibxi uulli mannii issito'isa mahina ki'nuwwi wodano duudissakamuulla? Isra'ee'l minaadab Gibxi uulla fatakita'a fitto'ok Waa'i Gibxi uulli manna qoxxaallisa guzumo'aa lasageyyonnihe?

⁷Ee bikkina haareechchi Faraxxi gaarre'ee gaanjaqqi issamubee'i lam siichcham laroo gudissehe. Ee lamem laronnem gaanjaqqa issitakka'a faraxxi gaarre'ika ludo ee gaanjaqqanne kallehe; ee la'l wo'llooma mine daballehe.

⁸Ee lasage Waa'ika Hidi'l Saga'l Saaxina massitakka'a ee faraxxi gaarre'enne dissehe. Ki'nnuwwi bi'ishshi bikkina guzumo'i ihoo'isina ixxenne maqire asse'llakkeena baxxakko'i annanni annanni worqa Saaxinanne issitakka'a Waa'i Hidi'l Saga'l Saaxi'n gadanonne dissehe; ee faraxxi gaarre'em ixxi gaginnem marona googo amadiissakka'a fataki'llehe.

⁹Ee lasage maroo kollo moo'llehe. Marookkokim Beetisheemeesh beero'i kollonne ihulas ka u'nnisoo boobana neesenne fatakukkok Isra'ee'l Waa'i ihukkisa moo'isookko. Ihukkaarem ee kollonne marubeelas oo booban niina waarukkok dangonnette bagaan Waa'i asse'ubee'an ihukkisa lanqoommo» yito'o.

¹⁰Ixxuwwim ee kuramukkisa issito'o; lamem larom massita'a oo faraxxi gaarre'i karamu gaanjaqqanne qaashsho'o; ee la'l wo'llam orodonne aagissa'a gooca xuffo'o.

¹¹Hidi'l Saga'l Saaxinam massita'a dabayyi kobi'llannee dashshi kobi'llannee baxamu worqi wo'mmu saaxininne maqirem faraxxi gaarre'enne dissito'o.

¹²Oo larim googo fatakitoo'nnii makki kollonnee qeddi kollonnee daba'llitoo'nnii xabbita'a Beetisheemeesh kollonne matto'o. Mattu'uuyyim «Humbaa» yita'a muuntam hee'llo'o. Ontem Filisxee'm adilluwwim Beetisheemeesh gabal afeebe'e awwonta'a geegeesso'o.

¹³Ee ammane Beetisheemeesh manni cebbi woronne arasa muttam hee'llo'o. Ixxuwwim xabbita'a moo'llo'i ammanenne Hidi'l Saga'l Saaxina moo'llo'o; eekka moo'llo'i bikkina lobakata liiranto'o.

¹⁴Oo faraxxi gaarre'im Beetisheemeeshanne hee'oo Iyyaas uullanne waaraa geejji ki'n gadano afaa uullukko. Oo minaadabim ee faraxxi gaarre'ika haqqa anto'o; ee larom dutta'a Waa'ina shokkoo kitim issita'a hincaa'llo'o.

¹⁵Leewi'i mannim Waa'ika Hidi'l Saga'l Saaxinaa ixxenne maqire hee'u worqi wo'mmaakkoo Saaxinaa ki'issa'a ee lob ki'n hanenne dissito'o. Oo Beetisheemeesh mannim shokkiisakka'a hincaa'akkam kitimaa mulli kitimaa hundam Waa'ina hincaa'llo'o.

¹⁶Filisxee'm ontem adilluwwim ka hundam moo'llu'uuyyi hossa'a ee ballam Eeqiroo'n beero'o daba'llito'o.

¹⁷Filisxee'm manni ixxuwwi hawwojji bikkina hincoo kitim ihoo'isina Waa'ina asse'llo'i dashshi kobi'llanne baxamu onitem worqi gawje'uwwim Ashdooda, Gaaza, Asqaloona, Gaataa Eeqiroonaa yakkam ixxuwwi beero'uwwi summinne asse'amaakkoohan hee'ukko.

¹⁸Oo worqi dabayyi xigim ontem Filisxee'm adilluwwi gassitam girbamaakkoo beero'uwwaa ee beero'uwwi hegeegguwwaa ixxuwwi bikkoohan hee'ukko. Beetisheemeeshanne hee'u Iyyaas uullanne Hidi'l Saga'l Saaxina dissakko'i oo lob kin kaballi afeebe'e naqaash ihaa siidamookko.

¹⁹Beetisheemeesh manni Hidi'l Saga'l Saaxi'nneka woro moo'llo'i bikkina Waa'i quuqaa ixxuwwiinsi lamarayyi mancho shukko. Waa'im eehaa'n manna guullu bikkina Beetisheemeesh manni kichche'lla'a wi'llito'o.

²⁰Beetisheemeesh manni «Ka keesammi Waa'i illagenne ayyi uulleena xanookko? Ku Hidi'l Saga'l Saaxindu ka beyyiinsi firaa ayyi beyyo marookko?» yito'o.

²¹Ee lasage Qiriyaat Yi'aariimanne hee'llam manni beyyo asse'amaano asse'lla'a «Filisxee'm manni Hidi'l Saga'l Saaxina ni beyyo eebbo'ookko. Waattakka'a massehe» yito'o.