Read Hadiyya 1 Saamu'eel Kitaaba 7 Bible Online

1 Saamu'eel Kitaaba 7 - Hadiyya bible

1 Saamu'eel Kitaaba 7

¹Qiriyaat Yi'aarii'm manni Hidi'l Saga'l Saaxina massita'a duunanne hee'oo Aminaadaab mine aagisso'o. Ee Hidi'l Saga'l Saaxina egeroo'isinam ixxi beet Ali'aazara Waa'i awwaadina annanni ihaakkoo manchi issita'a keesso'o.

²Waa'ik Hidi'l Saga'l Saaxin qeeraa'l ammanina Qiriyaat Yi'aariimanne afuurukko. Ookkim lamiyyi hiinchinatte hee'ukko. Ee ammane Isra'ee'l minaadab hundim hara'mmoo'isina hassa'a Waa'i kollonne laatto'o.

³Saamu'eelim Isra'ee'l minaadabina «Ki'nnuwwi wo'm wodaninne Waa'i kollonne daba'llitakkolas mulli waa'uwwaa Astaarootaa ki'nnuwwi lambe'iinsi qeessehe. Ki'nnuwwi gaga hundoomam Waa'ina uwwitakka'a xale'i ixxena otossi'llehe. Ixxim Filisxee'm manni angiinsi ki'nnuwwa gatisookko» yukko.

⁴Ee bikkina Isra'ee'l minaadab Ba'aalaa Astaaroota yakkam waa'uwwaa qeessita'a xale'i Waa'ina otossito'o.

⁵Ee lasage Saa'mu'eel «An ki'nnuwwina ee beyyonne ihaa Waa'a uunxoommi bikkina Misiphphanne wixxi'llehe» yaa Isra'ee'l minaadaba hundam weeshukko.

⁶Ixxuwwim Misiphphanne wixxito'o; wo'om inkiitta'a Waa'i illagenne kitim issitta'a dunta'a ee balla hundoomam soommanta'a «Neese Waa'a hawwondaammo» yita'a baaxiilo biiraa yito'o. Saamu'eelim Isra'ee'l minaadaphphi lambe'enne oogatam hee'ukkok Misiphphannette.

⁷Isra'ee'l minaadab Misiphphanne wixxito'isa macceesso'i ammanenne ontem Filisxee'm adilluwwim Isra'ee'l minaadaba qasseena ixxuwwi gaadaano awwonsita'a fitto'o. Isra'ee'l minaadabim ee woshsha macceesso'i ammanenne baddito'o.

⁸Saamu'eelinam «Filisxee'm manni angiinsi neese gatisoo'isina Ni Moollanni Waa'a cawwitaa uunxe» yito'o.

⁹Saamu'eelim anuuna urubee'i gereechchi geexa duraa hundoomam shokkiisakka'a uwwakkam kitim issaa Waa'ina hincaa'ukko; ee lasage Isra'ee'l minaadabina hara'mmoo'isina Waa'a uunxukko; Waa'im ixxi uunxato macceesukko.

¹⁰Saamu'eel kitima hincaa'ukkuuyyim Filisxee'm manni Isra'ee'l manna qasseena gaaddo'o. Ihukkaarem Waa'i Filisxee'm manni hanenne kee'mmaalli guga iimaninne macceesisukko; muggisukkome. Isra'ee'l manni illagiinsi gibbo'o.

¹¹Isra'ee'l mannim Misiphphiinsi fitta'a Beetikaariinsi woroon yoo uullanne affeebe'e hollansitu'uuyyi shito'o.

¹²Saamu'eelim mat kina massaa Misiphphaannonnee Sheen lambe'ennee uullisaa «Waa'i neese kaballi afeebe'e hara'mmaakko» yeena «Abeni'eezera» yaa weeshukko.

¹³Filisxee'm manni ee'isinne kaa'anto'o. Saamu'eel hee'u doollenne hundannem la'mmeka ee lasage Isra'ee'l gabalanne hincito'oyyo.

¹⁴Filisxee'm manni Eeqiroonii ki'isaa Gaatanne afeebe'e amadda'a hee'llo'i beero'uwwi hundim Isra'ee'l minaadabina daba'llukko. Isra'ee'l minaadabim ixxuwwi uulla Filisxee'm angiinsi gatisso'o. Isra'ee'llaannonnee Amoore'i minaadaphphi lambe'ennee xummi hee'ukko.

¹⁵Saamu'eelim ixxi hee'u umu'l doollenne hundannem Isra'ee'l minaadaba awwonsukko.

¹⁶Maarag hundam Beeteela, Gelgelaa Misiphphaa marukkuuyyi oogatam hee'ukko.

¹⁷Ixxi minim Raama'annette hee'u bikkina ee beyyo daba'llamukkuuyyi daannoo'm baxo baxam hee'ukko. Ee beyyonnem Waa'ina kitimakkam beyyo baxukko.