Read Hadiyya 1 Saamu'eel Kitaaba 9 Bible Online

1 Saamu'eel Kitaaba 9 - Hadiyya bible

1 Saamu'eel Kitaaba 9

¹Biiniyaam sulliinsi Qiisa yakka'a weeshakkam la'amaakkoo mat goddaanchi manchi hee'ukko. Ixxim Abi'eel beet hee'u Xaroor beet beet ihaa Afiih moolliinsi won miniinsette hee'ukko.

²Qiisinam daninne ixxenne gudookkok matim bee'ek Saa'oola yakkam beet hee'ukko; Saa'ool uullichchinne Isra'ee'l oos hundiinsim lophphoo qeeraa'l hee'ukko; danonnem Ayyeensim lophphoohan hee'ukko.

³Qiisik halli bi'aa hee'ukko; ee bikkina ixxi Saa'oolina «Awwaadaanika mato eddaa mattaa ka bi'u halla hase» yaa ijaajukko.

⁴Saa'oolii awwaadaanchii ki'lla'a duunaam Efireem uullannee Shaallish uullinnee higga'a halla hasimma asheetto'o; ihukkaarem halla siiddeena xanto'oyyo. Eehanniinsim Shaa'iliim uulli kollinne higga'a siiddoo'nnim gotto'o; odim Biiniyaam gassi kollinne higgo'o; ihukkaarem kabadem siiddeena xanto'oyyo.

⁵Xuufa yakkam uulla affo'i ammanenne Saa'ool ixxenne maqire hee'u awwaadaanchina «Kaba mi'n kolli daba'llinona; mashka'oomam niyyanni ixxi halliinsi loboka ni bikkina kichche'ookko» yukko.

⁶Ixxi awwaadaanchim «Hino'o egere ka beero'onne lobakata lombaam ihaakkoo mat Waa'i manchi yookko; ixxi wocoo woshshi hundim wo'mmoohane; ee bikkina ixxi kolli mallona; ayyi la'ukko halla siindeena xannoommi beyyo ixxi kureena xanookko» yaa dabarukko.

⁷Saa'oolim «Marimma'i mallona; ihukkaarem ee Waa'i manchina hinkido'i irifo'o uwwineena xannoommo; googina amaxxinummi hurbaatim ni caniinsi beeddaakko; ee bikkina mulli luwwi uwwinoommi luwwi mah yookko?» yukko.

⁸Ixxi awwaadaanchim «Iina mat kin bi'llek soo'l suum yookko; an eekka uwwaa uroommo; ixxim ni halla hannonne siindeena xannoomda'e niina kurookko» yaa dabarukko.

⁹Saa'oolim «Er sawwite! Eehid ihulas mallona» yukko; Ee bikkina Waa'i manchi hee'oo beero'o matto'o; ee beero'o affeena beqera fittu'uuyyim wo'o inkiitteena fitto'oo landa siidda'a «Kaaltaam manchi ka beero'onne yoohonnihe?» yita'a landa xa'mmito'o. Ee doollenne hiraagaan hundim «Kaaltaamo» yamanta'a weeshantam hee'llo'i bikkina Waa'iinsi mat luwwa xa'mmaa siideena hasu manni hundim «Kaaltaam manchi beyyo mallona» yam hee'ukko.

¹²Oo landim «Eeyya, kaaltaam manchi yookko! Hore'oomam ki'nnuwwi illagennetti ihaa marukkuuyyi yoo bikkina qaqqissakka'a fittakkolas affakkamo; beero'i kolli aaggakku'uuyyim qaqqisom siiddakkamo; ixxim kaballa beero'i kolli waaraakko; mashka'oomim minaadab duunanne kitima hincaa'akkam beyyonne hincaa'immina guddo'ookko; gaassaa ee kitima maasse'immi ixxena hasisookko; weeshanto'i mannim ixxi waaroo'n mat luchchom duuqqamoyyo; ee bikkina kaba fittakkolas ixxi hurbaata iteena duuna fireena illageen siiddakkamo» yita'a dabatto'o.

¹⁴Ee lasage Saa'oolii oo awwaadaanchii ee beero'i kolli fitto'o. Ee beero'i kolli aaggu'uuyyim Saamu'eel ee otossakkam beyyo mareena ixxuwwi kolli waarukkuuyyi moo'llo'o.

¹⁵Ee balliinsi illageen Waa'i Saamu'eelina

¹⁶«Biiniyaam suulliinsi mat mancho soodo kido'i ammanenne ki beyyo asse'oommo; Isra'ee'l I minaadabina adil ihoo'isina ee mancho doo'lle; ixxim I minaadaba Filisxee'm angiinsi gatisookko; mashka'oomam an I minaadaphphi u'nna moo'aammo; I kolli hincaa'llo'i laachcham macceesaammo» yaa kuraa hee'ukko.

¹⁷Saamu'eel Saa'oola moo'u ammanenne Waa'i Saamu'eelina « ‹I minaadabina awwonsaanchi ihookko› yaa kurummi manchi kane» yukko.

¹⁸Saa'oolim qash gooc gadanonne hee'u Saamu'eel kolli hincaa «Kaaltaam manchik min hinkane?» yukko.

¹⁹Saa'mu'eelim «Kaaltaam manchi anette iinniinsi gaassitaa ee otossakkam beyyo mare; ki'nnuwwim kaballa iinninne maqire hurbaata ittakkamo; soodo daram ki xa'mmichchuwwi hundinam dabachcha uwwaa geegeesoommaare elle'llootto.

²⁰Sas balliinsi ellageen bi'aa hee'u halli siidamaakko; kichche'llitte. Ihukkaarem Isra'ee'l minaadab ayye siidimmina mixukko labookko? Ixxuwwi hassammok keesee kiyyanni mineyyonnihe?» yukko.

²¹Saa'oolim «An Isra'ee'l sulluwwi lambe'iinsi hore'em hoffan ihu Biiniyaam sulliinsette; ka sulli woronnem ihuta'n i abaroos lobakata hoffane; eehannah kido'i woshsha iina mahina kuttoolla?» yaa dabarukko.

²²Ee lasage Saa'oolaa ixxi awwaadaanchoo massaa lob mine aagisaa sade ihoo qax mannanne edaa hurbaata ittona hundiinsi lophphoo lombi beyyonne afuussukko.

²³Saamu'eelim hurbaata gudisaancho weeshaa « ‹Mullam disse› yaa uwwummi maara eebe!» yukko.

²⁴Ee bikkina hurbaata gudisaanchi doo'l maara eebaa Saa'ool illagenne dissukko; Saamu'eelim Saa'oolina «Moo'e kuk kiina annanni ihaa dissamaakkoo doo'l maara; an weeshummi koyyinne maqirem ittoo'isina dissumman ihu bikkina kaka ite» yukko. Ee bikkina ee balla Saa'ool Saamu'eelinne maqirem itukko.

²⁵Ee otossakkam beyyiinsi dillita'a beero'o aaggo'i ammanenne Saa'ool iinse'oo ara'a Saamu'eel ixxi mi'n fooqanne gudisukko. Saa'oolim ee beyyonne iinse'aa garukko.

²⁶Soodaraaronne Saamu'eel fooqiinsi Saa'oola weeshaa «Eelle'lloo'isina geegeesoommo kaba ki'e!» yukko. Saa'oolim iinse'u beyyiinsi ki'aa Saamu'eelinne maqirem googonne fitto'o.

²⁷Ee beero'i tochcho affa'a lasage Saamu'eel Saa'oolina «Ki awwaadaanchi higaa maroo'isina kure» yukko. Oo awwaadaanchim higaa maraa lasage Saamu'eel Saa'oolina odim «At ka beyyonne hoffokam egere an Waa'i kuru woshsha hundam kuroommo» yukko.