Read Hakha Chin 2 SAMUEL 13 Bible Online

2 SAMUEL 13 - Hakha Chin bible

2 SAMUEL 13

¹David fapa Absalom nih khan far dawh ngai pakhat a ngei i a min ah Tamar a si; cun David fapa Amnon nih khan a duh.

²Cun Amnon cu a farnu Tamar ruangah cun a lungre a thei ngai i cucaah amah le amah aa zawtter; zeitintiah amah cu ngaknu thiang a si òung i zei thil hmanh hei tuah khi Amnon caah a si kho lo ding khi a lo.

³Sihmanhsehlaw Amnon nih cun hawi pakhat a ngei i a min cu Jonadab a si, amah cu David u Shimeah fapa a si i Jonadab cu mizer ngai a si.

⁴Cun anih nih amah cu a thawh i, “Maw siangpahrang fapa, zeicahdah zing khat hnu zing khat na hmai lawng a chiat ko? Na ka chim lai lo maw?” tiah a ti. Anih nih, amah cu, “Ka unau Absalom far Tamar khi ka duh,” tiah a ti.

⁵Jonadab nih anih cu, “Na ihkhun ah it law i zawtter; cun na pa nih nangmah zoh awkah a rat tikah, ka farnu Tamar kha ka sinah hin ra seh law, ei awk rawl ka pe seh law, cun ka hmuh khawh nakhnga ka mit hmuh ah hin rawl cu chuang tuah seh, a kut chung ta cu ka ei nakhnga,’ na ti lai,” tiah a ti.

⁶Cucaah Amnon cu a it i aa zawtter; cun amah zoh awkah siangpahrang nih a rat tikah, Amnon nih siangpahrang cu a thawh i, “Zaangfahnak tein ka farnu Tamar kha ra seh law, ka mit hmuh ah hin changreu hlum hnih in ka serpiak seh law, amah kut chung ta cu ka rak ei tuah lai,” tiah a ti.

⁷Cun David nih Tamar cu a inn ah khan bia a hei cah i, “Na òa Amnon inn ah khan va kal law, rawl va chuanpiak tuah,” tiah a ti.

⁸Cucaah Tamar cu a òa Amnon inn ah khan, a ih konak ah khan, a va kal. Cun changvut cet kha a lak i a nen i a mit hmuh ah cun changreu hlum cu a ser hna i changreu hlum cu a rawh hna.

⁹Cun ukang kha a lak i a hmaiah cun a bungh; sihmanhsehlaw a ei duh lo. Cun Amnon nih, “Ka sin i a ummi vialte kha chuak dih hna seh,” tiah a ti. Cucaah a sinin an dihlak in an chuak dih.

¹⁰Cun Amnon nih Tamar cu, “Na kut chung ta cu ka ei nakhnga, inn dal chungah hin rawl cu run luhpi tuah,” tiah a ti. Cun Tamar nih a sermi changreu hlum hna cu a hei kalpi hna i inn dal chungah a òa Amnon sinah cun a hei luhpi hna.

¹¹Sihmanhsehlaw ei awk i a pawng a hei phakpi tik hna ah a rak tlaih i, “Ra law, ka sinah ra it tuah, ka farnu,” tiah a ti.

¹²Cun anih nih a leh i, “Asilo, ka òapa, i hramhram hlah; zeitintiah hi bantuk thil cu Israel mi lakah tuah a si bal lo; hi hor hruhnak hi tuah hlah.

¹³Keimah lei ca in chim ah, hi ka ningzahnak cu khuazei ah dah kaa phorh khawh lai? Cun nangmah ca zongah, nangmah cu Israel mi lak i horhrutmi pakhat na si ve ko lai. Cucaah siangpahrang sinah chim tuah, tiah kan nawl, nangmah vat cu a ka thlauh lem lai lo,” tiah a ti.

¹⁴Sihmanhsehlaw a bia cu a ngai duh lo i amah cu a òhawng deuhmi a si caah hramhram in a ihpi.

¹⁵Khi tikah Amnon nih cun a fak ngaingaimi huatnak in a huat òhan òung i a rak duh lio i a dawtnak nakkhan a huatnak cu a ngan deuh òhan. Cun Amnon nih amah cu a thawh i, “Tho law, kal zok,” tiah a ti.

¹⁶Sihmanhsehlaw amah nih cun, “Asilo, ka òapa; na ka dawinak i na palhnak hi ka cung i na tuahmi nak hmanh khan a ngan deuh,” tiah a ti. Sihmanhsehlaw a bia cu a ngai duh lo.

¹⁷Amah a bultawltu tlangvalpa kha a hei auh i, “Hi minu hi ka hmaika in chuahter law, innka kha hrenhkanh,” tiah a ti.

¹⁸Amah cu angki fualpi, ban ngeimi aa hruk; zeitintiah cu bang cun hlan lioah cun, siangpahrang fanu thiang hna cu an i thuam tawn. Cucaah a sinum nih cun amah cu a chuah i innka cu a hrenhkanh.

¹⁹Cun Tamar nih cun a lu ah vutcam aa phulh i a ban a saumi a angki fual aa hrukmi cu a thleh i a lu cungah a kut kha aa chuan i a kal, a kalpah cun thang piin a òappah lengmang.

²⁰Cun a òa Absalom nih khan a thawh i, “Na òa Amnon nih khan an ihpi dahra? Ka farnu, dai tein um ziar ko; amah cu na òa a si; mah kong cu lung fak tuk in ruat hlah,” tiah a ti. Cucaah Tamar cu a òa Absalom inn ah khan thlavai kiang in a um.

²¹David Siangpahrang nih hi thil vialte hi a theih tikah a thin a hung ngaingai.

²²Sihmanhsehlaw Absalom nih Amnon sinah khan bia òha siseh, bia chia siseh, zeihmanh a chim lo, zeitintiah Amnon nih a farnu Tamar kha hramhram in a sual caah Absalom nih Amnon kha a huat.

²³Kum hnih kheng hnuah khin, Efraim pawng i Baalhazor ah Absalom nih tuu hmul mettu a ngei i Absalom nih siangpahrang fapa vialte kha a sawm hna.

²⁴Cun Absalom cu siangpahrang sinah khan a ra i, “Zohhmanh, na salpa nih tuu hmul mettu kha ka ngei hna; zaangfahnak tein siangpahrang le a sinum hna cu na salpa sinah hin ra tuah u,” tiah a ti.

²⁵Sihmanhsehlaw siangpahrang nih Absalom cu, “Asilo, ka fapa, kan dihlak cun kal hlah u si, na caah thilrit kan si sual lai,” tiah a ti. A hnek len, sihmanhsehlaw kal cu a duh lo, asinain a thluachuahnak cu a pek.

²⁶Khi tikah Absalom nih a thawh i, “Asilo ahcun, ka unau Amnon cu ka sinah kal seh, tiah kan nawl,” tiah a ti. Cun siangpahrang nih amah cu, “Zeicahdah na sinah cun a kal lai?” tiah a ti.

²⁷Sihmanhsehlaw Amnon le siangpahrang fapa vialte kha amah sinah cun a kalter hna hlantiang Absalom nih khan a hnek peng.

²⁸Cun Absalom nih khan a sinum hna cu nawl a pek hna i, “Amnon kha zu nih a lung a lawmhter tikah, i chingchiah u law, ‘Amnon kha tu u,’ kan ti hna tikah that u. Òih hlah u, keimah nih nawl kan pek hna a si lo mei? Nan ral òha u law nan lung òhawng ko u,” tiah a ti.

²⁹Cucaah Absalom sinum hna nih khan Absalom i nawl a pek hna bangin Amnon cungah khan an tuah. Khi tikah siangpahrang fapa vialte kha an tho i an laa cio kha an i cit i an zam.

³⁰Lampi i an um lioah khin David sinah, “Absalom nih siangpahrang fapa vialte kha a thah dih hna i pakhat hmanh an tang lo,” tiin thawng a rak thang.

³¹Khi tikah siangpahrang cu a tho i a puan kha a thleh hna i vawlei ah a ril; cun a sinum vialte a pawng i a ummi hna zong nih khan an puan cu an thleh ve.

³²Sihmanhsehlaw David cu Shimeah fapa Jonadab nih khan a thawh i, “Sihmanhsehlaw fapa tlangval vialte kha an thah dih hna tiin ka bawipa nih ruat hlah seh, zeitintiah Amnon lawnglawng kha a thimi cu a si; zeicahtiah a farnu Tamar hramhram in a sual ni thawk khan, hi thil hi Absalom nawl peknak bangin ruah chih a si diam cang.

³³Cucaah siangpahrang fapa vialte cu an thi dih tiin siangpahrang ka bawipa nih a lung ah i ken hlah seh, zeicahtiah Amnon lawng pei a thi ko cu,” tiah a ti.

³⁴Sihmanhsehlaw Absalom cu a zam. Cun ralvengtu tlangvalpa nih khan khua a hei cuan i zohhmanh, tlang pang i a kalmi Horonaim lam khan mi tampi an rat kha a hmuh.

³⁵Cun Jonadab nih siangpahrang cu, “Zohhmanh, siangpahrang fapa hna cu an ra cang; na sal nih a chim bangkhan a si taktak ko,” tiah a ti.

³⁶Cun a chim dih kate ah khin, zohhmanh siangpahrang fapa hna cu an ra i thang piin an òap; cun siangpahrang le a sinum vialte hna zong lunghno ngai tein an òap dih.

³⁷Sihmanhsehlaw Absalom cu a zam i Geshur siangpahrang Ammihud fapa Talmai sinah khan a va kal. Cun David nih a fapa cu ni khat hnu ni khat a òah lengmang.

³⁸Cuticun Absalom cu a zam i Geshur ah khan a va kal i khika ah kum thum a va um.

³⁹Cun Siangpahrang David cu Absalom kha a ngai hringhran; zeitintiah Amnon kha cu a thi cang ko cu ta, tiin a kong ah khan aa lungsak cang.