Read Hakha Chin 1 CHANRELNAK 15 Bible Online

1 CHANRELNAK 15 - Hakha Chin bible

1 CHANRELNAK 15

¹David nih amah caah David khua chungah khan inn a sak hna i Pathian kuang caah khan hmun pakhat a timh i thlam pakhat a bunhpiak.

²Cun David nih, “Levi mi dah ti lo nih cun ahohmanh nih Pathian kuang cu i zawn hna hlah seh, zeitintiah annih cu BAWIPA nih BAWIPA kuang i zawnh awk le a rian òuan zungzal awkah a thim hna,” tiah a ti.

³Cun BAWIPA kuang cu a ca i a timhmi hmun i hun kalpi awkah, David nih Israel mi vialte cu Jerusalem ah a pumh hna.

⁴Cun David nih Aaron fapa hna le Levi mi hna kha a pumh hna:

⁵Kohath fapa hna chung khan, haotu bik Uriel le a unau za khat le pakul;

⁶Merari fapa hna lakin, haotu bik Asaiah le a unau za hnih le pakul;

⁷Gershom fapa hna chungin, haotu bik Joel le a unau za khat le sawm thum;

⁸Elizafan fapa hna chungin, haotu bik Shemaiah le a unau za hnih;

⁹Hebron fapa hna chungin, haotu bik Eliel le a unau sawm riat;

¹⁰Uzziel fapa hna chungin, haotu bik Amminadab le a unau za khat le hleihnih.

¹¹Cun David nih tlangbawi Zadok le Abiathar le Levi mi Uriel, Asaiah, Joel, Shemaiah, Eliel le Amminadab kha a kawh hna i,

¹²annih cu, “Nannih cu Levi mi hna chung i pale innchungkhar hna lu cio nan si; nannih nih BAWIPA Israel Pathian kuang kha, ka timhpiakmi hmun ah cun nan hunpi nakhnga nan unau le he i thianh tuah u.

¹³A voi hmasa bik ah khan nannih nih nan put lo caah BAWIPA kan Pathian nih kan cungah a thinhunnak a langhter; zeicahtiah kannih nih hitin tuah awk a si lai ti i fehter ciami ning khan kan rak zohkhenh lo,” tiah a ti hna.

¹⁴Cucaah BAWIPA, Israel Pathian kuang cu hun zawnh awkah tlangbawi hna le Levi mi hna cu an i thianh.

¹⁵Cun Moses nih BAWIPA bia ningin nawl a pek bangin, Pathian kuang cu Levi mi hna nih a lang hna khan an liang in an i zawn.

¹⁶David nih Levi mi haotu bik hna kha, nannih nan unaule hna cu hlasatu lunglawmhnak thawng thanter awkah, aw dawh thilri fak piin a tum ding le tingtang le thonglawi le sumsel a tum dingah nan thiah hna lai, tiah a ti hna.

¹⁷Cucaah Levi mi hna nih cun mah hna hi an thiah hna: Joel fapa Herman le a unau hna Berekhiah fapa Asaf le an unau hna Merari fapa hna lakin Kushaiah fapa Ethan;

¹⁸cun anmah sinah cun an unau hna dot hnihnak pawl, Zekhariah, Jaaziel, Shemiramoth, Jehiel, Unni, Eliab, Benaiah, Maaseiah, Matti-thiah, Elifelehu, le Mikneiah, cun kutka cawngtu Obededom le Jeiel.

¹⁹Hlasatu Herman le Asaf le Ethan cu dar sumsel tumtu ding an si;

²⁰Zekhariah, Azeiel, Shemiramoth, Jehiel, Unni, Eliab, Maaseiah, le Benaiah cu Alamoth aw in tingtang tumtu ding an si;

²¹Sihmanhsehlaw Mattithiah Elifelehu, le Mikneiah, Obededom, Jeiel le Azaziah hna cu Sheminith aw in thonglawi in hruaitu ding an si.

²²Levi mi hla ah a hruaitu hna Chenaniah nih hla cu a thiam caah a hruai awk hna a si lai.

²³Berekhiah le Elkanah cu kuang ca i kutka cawngtu an si lai.

²⁴Shebaniah, Joshafat, Nethanel, Amasai, Zekhariah, Benaiah le Eliezer, tlangbawi hna nih Pathian kuang hmaiah muko kha an tum hna lai. Obededom le Jehiah zong kuang ca i kutka cawngtu an si ve lai.

²⁵Cucaah David le Israel mi upa hna le a thong pawl haotu hna kha, BAWIPA biakamnak kuang cu Obededom inn in lunglawmhnak he va lak awkah an kal.

²⁶Cun BAWIPA biakamnak kuang a zawntu Levi mi hna cu Pathian nih a bawmh hna caah, annih nih cawtum pasarih le tuutum pasarih an thawi hna.

²⁷David cu lahmangòhia angki fual in aa thuam, kuang a zawntu Levi mi vialte hna le hlasatu hna le hlasatu hna i an hla a hruaitu Khenaniah zong kha cu bantuk cun an i thuam ve; cun David cu laa in tahmi tlangbawi angki aa hruk.

²⁸Cuticun muko le saki le sumsel aw zulh cun Israel mi vialte nih au pah in BAWIPA biakamnak kuang cu an hunpi i hla fak piin an sa i tingtang le thonglawi kha fak piin an tum hna.

²⁹Cun BAWIPA biakamnak kuang cu David khua i a rat lioah khan, Saul fanu Mikhal nih khan thlalangawng in a hei zoh i David Siangpahrang a lam len ko le aa nuamh len ko kha a hei hmuh i a lung chungin a nihsawh.