Read Hakha Chin 1 CHANRELNAK 21 Bible Online

1 CHANRELNAK 21 - Hakha Chin bible

1 CHANRELNAK 21

¹Satan nih Israel mi kha a doh hna i David kha Israel mi cu rel awkah a forh.

²Cucaah David nih cun Joab le ralkapbu haotu hna kha a thawh hna i, “Va kal u law, Israel mi kha Dan in Beersheba tiang va rel hna u, cun zeizat an si kha ka hngalh nakhnga ka chim òhan u,” tiah a ti.

³Sihmanhsehlaw Joab nih a thawh i, “BAWIPA nih a mi hna cu atu i nak hin let za khat in chap ko seh! Siangpahrang ka bawipa, annih cu an dihlak tein ka bawipa sal an si ko lo maw? Zeicahdah ka bawipa nih mah hi cu na herh? Zeicahdah Israel mi cungah mawhnak na tlunter lai?” tiah a ti.

⁴Sihmanhsehlaw siangpahrang bia nih Joab cu a tei. Cucaah Joab cu a kal i Israel ram vialte kha a òol dih i Jerusalem ah a ra kir òhan.

⁵Cun Joab nih David kha minung a relmi hna a zat cu a pek. Israel ram chung dihlak ah vainam a tlai khomi nuai khat le sing khat an um, cun Judah ram chungah vainam tlai khomi sing li le sang sarih an um.

⁶Sihmanhsehlaw relnak chungah khan Levi mi le Benjamin mi cu a khumh chih hna lo, zeicahtiah a siangpahrang nawl pekmi cu Joab nih khan a duh hrimhrim lo.

⁷Sihmanhsehlaw Pathian cu hi thil cungah khan aa lawm lo i Israel mi kha a thah hna.

⁸Cun David nih Pathian sinah cun, “Hi thil ka tuahmi ah hin fak piin ka sual cang. Sihmanhsehlaw hruhnak piin ka tuah cang caah na salpa ka òhat lonak hi ka hlohpiak ko sawh, tiah kan nawl,” tiah a ti.

⁹Cun David ta a simi hmutu Gad kha BAWIPA nih a chawnh i,

¹⁰“Va kal law David cu, ‘Hi bangin BAWIPA nih, “Thil pathum kan pek i pakhat in i thim, cucu na cungah ka tuah lai,’ a ti,” tiah va chim,’ tiah a ti.

¹¹Cucaah Gad cu David sinah khan a ra i David cu, “BAWIPA nih hi bangin a ti. Na duhmi i thim:

¹²Kum thum chung mangòam maw, asiloah na ral nih nangmah kha thla thum chung hrawh maw, cu chungah cun na ral hna vainam nih nangmah cu an in phanh lai; asiloah BAWIPA vainam ni thum chung hrem dik, cucu ram chungah rai tlun le BAWIPA vancungmi nih Israel chung dihlak ah rawhnak tuah a si lai,” a ti. Cu Gad nih cun David cu, “A ka thlahtu sinah zei bialehnak dah ka kirpi lai, atu ah bia i khiak tuah,” tiah a ti.

¹³Cun David nih Gad cu a thawh i, “Harnak nganpi chungah ka um; BAWIPA kut cungah cun tla ko ning, zeitintiah anih cu a zaangfahnak a ngan ngaingai; sihmanhsehlaw minung kut chungah cun tla sawh hlah ning,” tiah a ti.

¹⁴Cucaah BAWIPA nih Israel mi cungah rai kha a tlunter i Israel mi cu sang sarih an thi.

¹⁵Cun Pathian nih vancungmi cu Jerusalem kha hrawh awkah a thlah; sihmanhsehlaw hrawh hnik a vun zalh ah khin BAWIPA nih a hmuh i òhat lonak kha BAWIPA cu aa ngaichih i hrawktu vancungmi sinah cun, “A za cang, na kut kha òhum cang,” tiah a ti. Cun BAWIPA vancungmi cu Jebus mi Ornan phuhri pawngah khan a dir.

¹⁶Cun David nih khua a hun zoh i van le vawlei karah BAWIPA vancungmi a dir kha a hmuh, a kut in vainam phawi cia aa put i Jerusalem lei kha a sawh. Khi tikah David le upa hna cu buri an i aih i vawlei ah an bawk.

¹⁷Cun David nih Pathian sinah. “Mi kha va rel hna u, tiah nawl petu cu keimah ka si lo mei? Sualnak a tuah i òhalo ngaiin a tuahtu cu keimah ka si. Sihmanhsehlaw hi tuu hna nih hin zeidah an tuah? Maw BAWIPA, ka Pathian, na kut cu keimah le ka pa innchungkhar cungah si ko seh, rai cu na mi hna cungah tlung sawh hlah seh, tiah kan nawl,” tiah a ti.

¹⁸Cun BAWIPA vancungmi nih Gad cu, David kha hung kal seh law Jebus mi Ornan phuhri ah BAWIPA caah biakòheng pakhat in hung ser seh, tiin David cu chimh awkah nawl a pek.

¹⁹Cucaah BAWIPA min in Gad nih a chimmi bia bangin David cu a hung kal.

²⁰Ornan cu changvut kha a rak cil len ko; aa mer i vancungmi kha a hmuh i amah sin i a ummi a fapa pali hna kha an i thup.

²¹David cu Ornan sin lei i a rat lioah khan. Ornan nih cun a hei zoh i David kha a hmuh i phuhri cun a va chuak i vawlei lei hoih in David cu upatnak kha a pek.

²²Cun David nih Ornan cu a thawh i, “Rai hi mi sinin a kian nakhnga, BAWIPA sin i biakòheng saknak caah phuhri hmun hi ka pe tuah § a man tling tein ka hau ko,” tiah a ti.

²³Cun Ornan nih David cu, “I lak tuah; cun siangpahrang ka bawipa nih a òha a timi paoh kha tuah ko seh; zohhmanh cawtum hna cu khangh thawinak caah, cun rawl velhnak fung hna cu thing caah, cun changvut cu changvut thawinak caah kan pek. A dihlak in kan pek dih,” tiah a ti.

²⁴Sihmanhsehlaw Siangpahrang David nih Ornan cu, “Asilo, a man tling tein kan cawk ko lai; BAWIPA caah nangmah ta a simi cu ka la lai lo i a man zeihmanh ka liam lomi khangh thawinak zong ka pechan lai lo,” tiah a ti.

²⁵Cucaah David nih Ornan cu cu hmun caah cun sui shekel za ruk a thlai i a pek.

²⁶Cun khika ah David nih BAWIPA caah biakòheng a ser i khangh thawinak le daihnak thawinak hna kha a pekchanh hna i BAWIPA kha a auh i amah nih cun khangh thawinak biakòheng cung i vancung in a tlami mei khan amah cu a leh.

²⁷Cun BAWIPA nih vancungmi kha nawl a pek i a vainam cu a kawng chungah a sawh òhan.

²⁸Khi caan ah khan, Jebus mi Ornan phuhri ah BAWIPA nih a ka leh tiah David nih a hmuh tikah, khika ah a raithawinak hna kha a tuah.

²⁹Zeitintiah ramlak ah Moses nih a sermi BAWIPA puan biakinn le khangh thawinak biakòheng hna cu khi caan ah khan Gibeon i khuahrum bo ah khan an um ko;

³⁰sihmanhsehlaw David cu BAWIPA kha va hal awkah a hmaiah cun a kal kho lo; zeicahtiah BAWIPA vancungmi vainam kha a òih.