Read Hakha Chin EXODUS 8 Bible Online

EXODUS 8 - Hakha Chin bible

EXODUS 8

¹BAWIPA nih tiva kha a tuk hnu ni sarih ah, BAWIPA nih Moses cu a thawh i, “Va kal law Faro cu, ‘BAWIPA nih, “Ka mi hna cu luatter hna, keimah kha ka bia hna seh.

²Ngai hmanh, cucu na duh lo ahcun, na ram hi a dihlak in utlak in ka hrem lai.

³Tiva cu utlak in a khat lai i tiva cu an kaltak lai i na inn chungah an lut lai; na ihnak khaan le na ihkhun le na bawi pawl inn le na mi hna inn ah khan an lut lai; na tappi le na changreu sernak kheng chung tiangin an lut lai.

⁴Nangmah siseh, na mi si hna seh, na bawi pawl si hna seh an in kaihnawh hna lai,” a ti,’ tiah va chim,” tiah a ti.

⁵Cun BAWIPA nih Moses cu, “Aaron kha, ‘Na òhiangòhunh cu tiva cung le tilak cung le tidil cungah khan hler law Izipt ram chungah khan utlak kha chuak hna seh,’ tiah chim,” a ti.

⁶Cucaah Aaron nih cun a òhiangòhunh cu ti cungah khan a hler i utlak kha an chuak ciammam i ram kha a khah in an khat.

⁷Asinain camhthiam pawl zong nih khan utlak cu ram chungah khan an chuahter ve hna.

⁸Faro nih Moses le Aaron kha a auh hna i, “BAWIPA sinah cun thlacam u law ka mi hna sin hin utlak hi la hna seh, cun nan mi hna cu BAWIPA sinah raithawinak an pekchanh khawh nakhnga ka kalter hna lai,” a ti.

⁹Moses nih Faro cu, “Utlak nih cun nanmah le nan inn hna kha an in kaltak hna i tiva chung lawngah an um nakhnga, zeitik ah dah nangmah ca le na bawi pawl hna ca le na mi hna caah cun thla cu ka cam lai, ka chim tuah,” a ti.

¹⁰Faro nih cun, “Thaizing ah,” tiah a leh. Cun Moses nih, “Asi, na chim bantukin a si lai, zeicahtiah BAWIPA kan Pathian bantuk hi pathian dang ahohmanh an um lo ti kha na hngalh nakhnga,” a ti.

¹¹Cun, “Utlak nih cun nangmah le na inn hna le na bawi pawl hna le na mi hna cu an in kaltak hna lai i tiva chung lawngah khan an um lai,” a ti.

¹²Moses le Aaron nih Faro cu an kaltak i Faro cungah a tluntermi utlak kong ah khan BAWIPA sinah fak piin thla an cam.

¹³Moses nih a nawl bantuk khan BAWIPA nih cun a tuah i inn chung i a ummi le tual i a ummi le lo i a ummi utlak vialte kha an thi dih.

¹⁴Izipt mi nih cun a pon in an pon hna i ram cu a thut in a thu.

¹⁵Faro nih thil cu a hung òha deuh òhan ti kha a hmuh tikah a lung a hak òhan i BAWIPA nih a rak chim bantukte khan Moses le Aaron cu an bia ngaih kha a duh òhan hna lo.

¹⁶BAWIPA nih Moses cu, “Aaron kha, ‘Na òhiangòhunh in vawlei kha tu law leidip kha fikfa ah an i cang lai i Izipt ram kha an khat lai,’ tiah chim,” a ti.

¹⁷Cuticun an tuah. Aaron nih khan a òhiangòhunh cu a hler i vawlei kha a tuk. Leidip cu fikfa ah an i cang i mi le saòil kha a zual in an zual hna.

¹⁸Camhthiam pawl zong nih khan fikfa chuahter cu an i zuam ve, sihmanhsehlaw an tuah kho lo. Fikfa nih cun minung he saòil he awlok an chawnh hna.

¹⁹Camhthiam pawl nih khan Faro cu, “Hihi cu Pathian tuahmi a si,” an ti. Sihmanhsehlaw Faro cu a lung a hak ko i BAWIPA nih a rak chim bantuk te khan Moses le Aaron cu an bia a ngai duh hna lo.

²⁰BAWIPA nih Moses cu a thawh i, “Zingkate ah Faro cu tiva i a kal ah khan va tong law, ‘BAWIPA, nih, “An ka biak nakhnga ka mi cu kalter hna seh.

²¹Ka mi cu a kalter hna lo ahcun amah le a bawi hna le a inn hna cungah tho ka tlunter hrimhrim hna lai. Izipt mi vialte an inn cung dihlak ah ka tlunter lai, cun an dirnak vawlei hmanh kha tho in ka khahter lai.

²²Cu ni ah cun ka mi hna umnak Goshen ram kha cu ka zuah lai i cuka ah cun tho pakhat hmanh an um lai lo, zeicahdah cuticun a si lai ti ahcun, Faro nih keimah BAWIPA nih hi ram ah rian ka òuan kha a hngalh khawh nakhnga caah a si lai.

²³A mi le ka mi cu ka thleidan hna lai. Cun hi khuaruahharmi thil hi thaizing ah a tlung lai,” tiah nangmah cu an ti,’ tiah va chim,” tiah a ti.

²⁴Cuticun BAWIPA nih a tuah taktak i tho cu bu ngan pipi in Faro siangpahrang inn le a bawi pawl inn le Izipt ram dihlak ah cun an lut i ram cu tho nih cun a hrawh dih.

²⁵Cun Faro nih khan Moses le Aaron kha a auh hna i, “Va kal u law hi ram chungah hin nan Pathian sinah cun raithawinak cu va tuah u,” a ti.

²⁶Moses nih khan, “Cucu a òha lai lo, zeicahtiah BAWIPA kan Pathian sin i rai i kan thawimi saòil hna kha Izipt mi nih hin an fih hna lai. Izipt mi nih an fihmi saòil kha kan hman hna i an mit hmuh i kan thawi hna ahcun, lung in thi lakin an kan cheh lai.

²⁷Cucaah cun BAWIPA kan Pathian nih a kan fial bantukin thetse ram chung ni thum lamkal ah kan kal hrimhrim awk a si lai i cuka ah cun BAWIPA kan Pathian sinah khan rai cu kan vaa thawi lai,” a ti.

²⁸Faro nih cun, “Lamhlapi nan kal lo ding ahcun, thetse ram ah khan BAWIPA nan Pathian sin i raithawi awkah cun kan kalter ko hna lai. Thla ka campiak tuah u,” a ti hna.

²⁹Moses nih cun, “Thaizing ah tho nih hin nangmah le na bawi hna le na mi hna kha an in kaltak hna nakhnga, ka kal cangka hin BAWIPA sinah thla ka va cam lai. Asinain hlen cu na kan hleng ti hnga lo, BAWIPA sin i raithawinak va tuah awkah mi cu kalter loin na thlauh ti hna hnga lo,” a ti.

³⁰Moses nih Faro cu a kaltak i BAWIPA sinah khan thla a cam i

³¹BAWIPA nih cun Moses nih a nawl bantuk khan a tuah. Tho nih cun Faro le a bawi hna le a mi hna kha an kaltak hna i pakhat hmanh tang loin an kal dih.

³²Sihmanhsehlaw cu caan tiang zongah cun Faro cu a lung a hak òhan i mi kha a kalter duh hna lo.