Read Hakha Chin ISAIAH 30 Bible Online

ISAIAH 30 - Hakha Chin bible

ISAIAH 30

¹BAWIPA nih aa thawh i, “Keimah kha an ka doh caah Judah ram a uktu hna cu an lo cang. Ka khuakhanmi a si lomi kha an zulh i ka duh lo nain hnatlak òinak an tuah, sualnak pakhat cungah a dang pakhat an chap chin lengmang.

²Keimah hal hmasa loin Izipt ah an vung kal i bawmhnak an hal hna. Izipt nih kan huppheng seh ti an duh caah Izipt siangpahrang kha an i bochan.

³Asinain Izipt siangpahrang nih khan a bawm kho hna lai lo i Izipt nih, kan huhphenh hna lai, a timi cu rawhralnak in a dong lai.

⁴Judah mi cu, an lamkaltu kha Izipt mi hna khua Zoan le Hanes an phan cang nain,

⁵bochan awk a tlak lomi kha kan rak i bochan sual i a kan bawm kho òung lomi kha kan rak i hngatchan sual, ti in an i ngaihchih lai,” a ti.

⁶Thlanglei thetse ram chung i a ummi saram hna kong ah BAWIPA nih a chimmi bia cu hihi a si: “An lamkaltu hna cu, òih awk umnak ram, chiandeih le sivai ngeimi rul le zuan a thiammi rulpi an umnak ram tan khan an kal. Bawmhnak zeihmanh a pe kho òung hna lomi miphun phorh awkah khan an laa le an kalauk hna cu a man a fak ngaingaimi laksawng kha an phorhter hna.

⁷Izipt nih bawmhnak a pekmi hna cu santlailo a si. Cucaah Izipt cu ‘Òih awk tlak lo rulpi’ tiah min ka sak.

⁸Hi miphun hi zeidah an lawh ti kha cauk pakhat chungah a òial in na òial lai i cu na òialmi cu an ca i a hmunmi tehte a si lai, tiah Pathian nih a ka ti.

⁹Annih cu a zungzal in Pathian kha an doh, a zungzal in lih an chim, a zungzal in Pathian cawnpiaknak kha an al.

¹⁰Profet pawl kha, dai tein um ko u, an ti hna. An thawh hna i, “Zeidah a ding ti kha kan chim hlah u, theih kan duhmi kha ta nan kan chimh ko. Kan i ruahning in va um ko u sih.

¹¹Lam kan kian u law kan kalnak kha kan dawn hlah u. ‘Israel Pathian Thiang,’ nan ti lengmangmi theih hi kan duh lo,” tiah an ti hna.

¹²Sihmanhsehlaw Israel Pathian Thiang nih a chimmi cu hihi a si: “Kan chimhmi hna kha zei ah nan rel lo i zaang-ennak le hlennak tu kha nan i bochan.

¹³Nan sual hrimhrim ko. Nannih cu a tung in a kuaimi vampang sangpi bantuk nan si; chikkhatte ah nan tlu te lai.

¹⁴Tlak um bantukin an in den cikcek hna lai, fak tuk in nan keh nan kuai lai caah meiòil laknak caah a zami le tikhor ti suahnak ah a zami hmanh nan um lai lo,” a ti.

¹⁵Bawipa PATHIAN, Israel Pathian Thiang nih cun a mi cu a thawh hna i, “Ra kir u law dai tein keimah kha ka bochan ko u. Cu ti nan um ahcun nan òhawng lai i him tein nan um lai,” a ti hna. Sihmanhsehlaw cu bantukin um cu nan duh lo.

¹⁶Tlik a mumi rang kan i cit hna lai i cuticun kan ral hna kut in kan luat lai tiah khua nan khan. Asi, nan hmaan ko, nan zam a herh taktak lai. Sihmanhsehlaw kan rang cu an òhawng ve ko, tiah nan ruat lai nain nanmah an dawitu hna rang cu an òhawng chinchin lai.

¹⁷Ral pakhat nan hmuh tikah, thong khat nan zam lai i nan dihlak in an zamtertu hna dingah hin ral panga lawnglawng a za ko lai. Nan ralkapbu chung khan ahohmanh an tang lai lo, tlang par i alan nan thlainak tung te lawng kha a tang lai.

¹⁸Asinain nan cungah a velngeihnak langhter duh ah BAWIPA nih an hngah ko hna. Amah nih cun a dingmi thil kha a tuah zungzal caah nanmah zaangfah awk kha aa tim ko. Lunglawmhnak hi BAWIPA i bochannak chungin a chuakmi a si.

¹⁹Jerusalem khua i a ummi hna, nan òap ti lai lo. BAWIPA cu zaangfah a thiammi a si i bawmhnak nan hal tikah nan auhnak cu an leh hna lai.

²⁰BAWIPA nih harnak caan chungah an luhter hna lai, sihmanhsehlaw khi chungah khan nanmah cawnpiak awkah amah hrimhrim kha a rak um lai i nanmah nih amah kha kawl a herh ti lai lo.

²¹Lam in kehlei orhlei ah nan pial sual ahcun, “Lam cu hika leiah hin a si. Lam kha zul u,” tiah nan hnulei in a aw kha nan theih lai.

²²Ngun nan hutmi nan siasal hna le sui nan hutmi nan siasal hna kha nan i lak hna lai i hmunhnawm hlonh in nan hlonh hna lai i, “In hmu ti hna hlah u sih,” nan ti hna lai.

²³Thlaici nan tuh tikah BAWIPA nih ruah a surter lai i a khohter hna lai i kumvui òha an pek hna lai. Cun nan saòil nih ram hno tampi an hmuh lai.

²⁴Nan lei a thuangtu cawtum hna le laa hna nih khan cawhlek le fungòe in an thianhmi ram rawl òha bikbik kha an ei lai.

²⁵Nan ral hna cu an ralhruang nan chuh hna i an mi nan thah hna ni ah tlang kip le fing kip in ti an luang lai.

²⁶Thlapa cu ni tlukin a ceu lai i ni cu a let sarih in a ceu lai, ni sarih chung ceunak khi ni khat ah i fonh dih seh law cu bantuk cu a si lai. BAWIPA nih a mi hna cu an hma a menpiak hna i a damter hna ni ah hi thil vialte hi a tlung lai.

²⁷BAWIPA lianhngannak le sunparnak cu lamhlatpi in hmuh khawh a si. Mei le meikhu in a thinhunnak kha a lang. Bia a chim i a bia cu mei bantukin a alh.

²⁸Zeizong vialte a fenh dihtu ti lian bantukin thlitu kha a hmaiah a kalter. Miphun tampi kha a hrawh hna i a òha lomi an khuakhannak kha pakpalawng ah a canter.

²⁹Sihmanhsehlaw nannih Pathian mi hna cu nan i lawm lai i a thiangmi puai zan i hla an sak bantukin hla nan sa lai. BAWIPA, Israel Lungpi thangòhat in biakinn ah thonglawi aw zulh in a kalmi hna bantukin nan i lawm lai.

³⁰Bawipa nih mi vialte kha a rumra a ummi a aw kha a theihter hna lai i a thinhunnak hmual kha a hngalhter hna lai. Meizik le òotho le rial le a tuk ngaingaimi ruah kha an um lai.

³¹Assiria mi cu Pathian aw an theih tik le a dantatnak hmual kha an hngalh tikah a ther in an ther lai.

³²Pathian nih a tuk chih lengmang hna bantuk khan a mi hna zong nih cun an khuang le an dar kha an rak òhuanh chih lengmang ve hna lai. Pathian hrimhrim nih Assiria mi cu a doh hna lai.

³³Assiria siangpahrang khanghnak dingah meiphu nganpi tihnak ding hmun kha hlan piin timh a si cang. Cu meiphu tihnak ding hmun cu thukpi le kau piin cawh a si i a chung khat in thing chiah a si. Cu meiphu duahnak dingah cun BAWIPA nih a thaw ah meizik a chuah lai i cu nih cun a alhter lai.