Read Hakha Chin NAMBAR 30 Bible Online

NAMBAR 30 - Hakha Chin bible

NAMBAR 30

¹Moses nih Israel mi hna i an phun hna lu hna sinah cun, “Mah hihi BAWIPA nawl pekmi cu a si.

²Mipa pakhatkhat nih BAWIPA sinah biakamnak a tuah ah maw, biakamnak in amah le amah cu i òem awkah chiat a ser ah maw, a bia cu a hrawk lai lo; a kaa chungin a chuakmi vialte bang khan a tuah lai.

³Asiloah, minu pakhatkhat nih a ngaknut lio a pa inn i a um lioah biakamnak in amah le amah cu i òem awkah biakamnak a tuah tikah,

⁴a pa nih a biakamnak le a biahrennak amah le amah aa òemnak cu a theih i zeihmanh amah sinah a chim lo ahcun, a biakamnak vialte cu a dir lai i amah le amah aa òemnak biahrennak vialte zong a dir ve lai.

⁵Sihmanhsehlaw, a pa nih a theih ni ah a hnatlak lonak kha a langhter ahcun, a biakamnak kha siseh, aa òemnak bia kha siseh, zeihmanh a dir lai lo i a pa nih a al caah BAWIPA nih a ngaihthiam lai.

⁶Cun a biakamnak tangah a um lioah siseh, ruah set loin a hmur nih a chimmi in amah le amah aa òem lioah siseh, va a ngeih ahcun,

⁷cun a va nih a theih i a theih ni ah amah sinah zeihmanh a chim lo ahcun, a biakamnak cu a dir lai i amah le amah aa òemnak biahrennak zong kha a dir lai.

⁸Sihmanhsehlaw a va nih a theih ni ah a hnatlak lonak kha a langhter ahcun, a cungah a ummi biakamnak le ruah set loin a hmur nih a chimmi in aa òemnak kha a hrawh lai i BAWIPA nih a ngaihthiam lai.

⁹Sihmanhsehlaw nuhmei maw makmi maw a si ahcun, bia aa kamnak nih siseh, amah le amah aa òemnak nih siseh, a nenh ko lai.

¹⁰Cun a va inn ah bia aa kam ah siseh, chiatser in amah le amah aa òem ah siseh,

¹¹a va nih a theih i a sinah zeihmanh a chim lo i a al lo ahcun, a biakamnak vialte cu a dir lai i aa òemnak bia vialte zong a dir lai.

¹²Sihmanhsehlaw a va nih a theih ni ah a hrawh hna ahcun, a biakamnak kong ah a hmur in a chuakmi zeipaoh siseh, amah le amah aa hrennak bia siseh, a dir lai lo; a va nih a hrawh hna i BAWIPA nih a ngaihthiam lai.

¹³Amah le amah i temhinter awkah biakamnak le chiatsernak a tuahmi paohpaoh cu a va nih a fehter khawh lai i a va nih a hrawh zong a hrawh khawh lai.

¹⁴Sihmanhsehlaw ni khat hnu ni khat a va nih zeihmanh a chim hlei lo ahcun, a cung i a ummi a biakamnak vialte siseh, a biahrennak vialte siseh a fehter a si; a theih ni ah amah sinah zeihmanh a chim lo caah a fehter hna a si.

¹⁵Sihmanhsehlaw a theih hnuah a hrawh hna ahcun a nupi òhat lonak kha amah nih a in lai,” tiah a ti.

¹⁶Mah hihi mipa le a nupi karlak kongah siseh, pa le a fanu a ngaknut lio i a pa inn ah a um lio i an karlak kongah siseh, BAWIPA nih Moses nawl a pekmi nawlbia cu an si.