Read Hakha Chin MARKA 15 Bible Online

MARKA 15 - Hakha Chin bible

MARKA 15

¹A thaizing zingkate ah tlangbawi upa hna cu haotu upa hna le phungbia cawnpiaktu saya hna le biaceihtu vialte hna he khan hnawhsare in an i pum i khua an khang. Jesuh cu thir cikcin in an khih i an kalpi i Pilat kut chungah khan an pek.

²Pilat nih, “Judah mi siangpahrang cu na si maw?” tiah a hal. Jesuh nih, “Na chim bangin ka si,” tiah a leh.

³Tlangbawi upa hna nih khan Jesuh cu bia tampi an puh.

⁴Cucaah Pilat nih cun a hal òhan i, “Na let hna lai lo maw? An in puhmi hi a tam òung,” tiah a ti.

⁵Jesuh cu holh loin a um i Pilat cu a khuaruah a har.

⁶An Lanhtak Puai paoh ah khan Pilat nih an duhmi thongtla pakhat kha a chuahpiak tawn hna.

⁷Cu lioah cun ral a thomi, midang hna he ral an thawhnak i lai a nawngmipa Barabbas kha thong chungah cun a um.

⁸Mizapi nih khan, voi dang i na kan tuahpiak tawnmi kha kan tuahpiak rih tuah, tiah an ra hal tikah,

⁹Pilat nih cun a rak thawh hna i, “Judah mi siangpahrang hi kan chuahpiak seh, ti nan ka duhmi cu a si maw?” tiah a rak hal hna.

¹⁰Jesuh ka kut chung i an ka pek hi, tlangbawi upa nih an nahchuah caah a si, ti kha Pilat nih òha tein a hngalh.

¹¹Sihmanhsehlaw tlangbawi upa pawl nih cun mizapi kha, Barabbas na kan chuahpiak lai, tiah Pilat kha nan hal lai, tiah an forh hna.

¹²Pilat nih mizapi cu a thawh òhan hna i, “A si ahcun, Judah siangpahrang nan timi pa hi tah zeitindah ka tuah kun lai?” tiah a ti hna.

¹³“Vailam ah tah ko,” tiah an au.

¹⁴Pilat nih cun, “Zei sualnak dah a tuah?” tiah a ti. Sihmanhsehlaw fak chinchin in an au i, “Vailam ah tah ko,” an ti.

¹⁵Mizapi kha Pilat nih an lung ton a duh hna caah Barabbas cu a thlahpiak hna. Cun Jesuh cu fung in a tukter hna i vailam i tah awkah a pek hna.

¹⁶Ralkap nih Jesuh cu Mangki bawi inntual ah khan an luhpi i an hawidang zong kha an auh hna.

¹⁷Jesuh cu puan sen kha an aih i hling in an phiarmi bawiluchin kha a lu ah an chinh.

¹⁸Salaam kha an pek i, “Judah mi Siangpahrang hi saupi nung ko seh!” an ti.

¹⁹A lu ah cun fung in an tuk i an cil an chak i an khuk an i bil i a hmaiah cun an kun.

²⁰Cu ti i an cawhdeh dih in puan sen kha an hawh i amah puan kha an aihter òhan. Cun vailam i tah awkah an chuahpi.

²¹Lampi ah mipa pakhat a min Simon a simi, khuate lei in Jerusalem leiah a kalmi kha an ton. Amah cu Jesuh vailam tahnak thing kha an hnek i an putter. (Hi Simon hi Sairin khuami Alekzandar le Rufas pa kha a si).

²²Jesuh cu Golgotha hmun kha an phakpi, Golgotha a sullam cu Luruh Hmun tinak a si.

²³Mitsur zu, Mura an timi he an cawhmi kha an hun tuh i a ding duh lo.

²⁴Cuticun vailam ah cun an khenh chih i a puan kha an i phaw i aho nih dah a zei zawn hi a co lai tinak caah, camcawh fung in an zuh.

²⁵Vailam i an khenh chih kha zinglei suimilam pakua ah a si.

²⁶Sual an phawtnak ca cu, “Judah mi hna Siangpahrang,” tiah an òial.

²⁷Jesuh sinah cun a orhlei kamah pakhat, a kehlei kamah pakhat, mifir pahnih an tah ve hna.

²⁸Cuticun Cathiang nih, “Misual hna sinah telh chih a si,” a timi cu a tling.

²⁹Aa chawkmi hna nih khan Jesuh cu an lu an thinhnawh i an nihsawh: “Biakinn cu na òheh dih i ni thum chungah na sak dih òhan taktak hi ta!

³⁰Atu cu nangmah kha vailam cung khan rung òum law i khamh tuah ngat,” an ti.

³¹Cu bantuk òhiamòhiam in tlangbawi upa hna le Phungbia cawnpiaktu saya hna nih khan Jesuh cu an nihsawh i, “Midang khamh òung in amah vial aa khamh kho òung lo hi ta!

³²Israel mi siangpahrang Messiah cu, atu hrimhrim ah hin vailam tahnak cung hin rung òum seh law pei kan hmuh hnga i kan zumh khawh hnga cu!” an ti. Cun a sin i vailam an tahmi pahnih hna zong nih khan an nihsawh ve.

³³Chun ah cu ram cu a dihlak in muihnak nih suimilam pathum chung a khuh.

³⁴Zanlei suimilam pathum ah Jesuh cu fak piin a au i, ``Eloi, Eloi, lema sabakthani,'' tiah a ti, a sullam cu, “Ka Pathian, ka Pathian, zeicahdah na ka kaltak,” ti a si.

³⁵Cuka i a ummi a cheukhat nih cu ti i a au cu an theih i, “Ngai hmanh u, Elijah a auh cuh!” an ti.

³⁶Pakhat pa cu a va tli i puanchia kha mitsur zu thor chungah khan a hnim i fung par ah a òemh i Jesuh cu a hmur ah khan a hun tuh. “Amah kha vailamtahnak cungin òhumh awkah Elijah kha a rung òum hnga maw, zoh hnik u sih,” tiah a ti.

³⁷Jesuh cu fak piin a au i a cat.

³⁸Biakinn chung i aa zarmi puan kha a lu in a taw tiang cheu hnih ah aa cheu.

³⁹Vailamtahnak hmai i a dirmi ralbawipa nih khan, Jesuh a au le a cah kha a hmuh tikah, “Hi pa cu Pathian Fapa a si hrimhrim ko,” tiah a ti.

⁴⁰Cuka ah cun nu tlawmpal an um i lamhlat nawn in an cuanh. Cu hna lakah cun Salome le. Mary Magdalin le Jeim ngakchia deuh le Joses i an nu Mary kha an um ve.

⁴¹Jesuh cu Galilee i an um lioah khan an rak zulh tawn i an rak bawmh tawn. Amah he Jerusalem ah a rami nu tampi zong cuka ah cun an um ve.

⁴²Zanlei sang tlai nawn a si cang i Arimathea khuami Josef kha a ra phan.

⁴³Amah cu biaceihtu bu chung i an upatmi pakhat a si ve i Pathian Pennak a rat lainak aa ruahchihmi a si. Cu ni cu cawnningani a si (cucu Sabbath ni a nizan kha a si). Cucaah Josef cu ralòha ngaiin Pilat sinah khan a vung lut i Jesuh ruak kha a hal.

⁴⁴Pilat nih Jesuh cu a thi cang, ti kha a theih tikah a khuaruah a har ngai. Ralbawipa kha a auh i Jesuh cu a thi cang maw, tiah a hal.

⁴⁵Ralbawi chimmi bia kha a theih hnuah Pilat nih Josef cu, Jesuh ruak kha na lak khawh, tiah a ti.

⁴⁶Josef nih cun khiangrang puan pakhat a cawk i a ruak cu a òhumh hnuah puan cun a zual i lung an vihmi thlan chungah a vui. Cun thlanka ah cun lung nganpi a khar.

⁴⁷Mary Magdalin le Joses nu Mary nih khan cucu an zoh i Jesuh an phumnak hmun kha an hmuh.