Read Hakha Chin LUKA 18 Bible Online

LUKA 18 - Hakha Chin bible

LUKA 18

¹Lungdong loin thla nan cam zungzal awk a si, ti cawnpiaknak caah Jesuh nih hi bianabia hi a chimh hna.

²Aa thawh i, “Khua pakhat ah hin Pathian zong a òih lo i mi zong a hmaizah lomi biaceihtu bawi pakhat a rak um.

³Cun cuka khua ah cun nuhmei pakhat a um ve i ka bia kha ka ceihpiak tuah, tiah atu le atu a ra ti lengmang.

⁴Biaceihtu nih caan saupi chung cu a al lengmang,

⁵sihmanhsehlaw a donghnak ah cun, ‘Pathian cu ka òih lo i minung kha ka hmaizah hna lo nain, hi nuhmeinu nih hin hnahnawhnak a ka pek lengmang caah a bia cu ka ceihpiak ko lai; cu lo ahcun a ra lengmang ko lai i ka re lam a ka theihter chin lai,’ a ti,” tiah a ti.

⁶Cun Bawipa nih cun a peh òhan i, “A ding lomi biaceihtu bawi nih a chimmi cu nan theih cang.

⁷Pathian nih tah amah a mi hna chunzan hlan in a sinah bawmh hal awkah a au lengmangmi hna cu thiamcoh loin maw a um hna hnga? Anmah bawmh awkah cun a khul a nuar ko hnga maw?

⁸Hihi kan chimh hna: anmah cu thiam a coh hna lai i cucu khulrang tein a tuah lai. Sihmanhsehlaw Mi Fapa nih a rat tikah vawlei ah hin zumhnak a hmu te hnga maw?” tiah a ti.

⁹Anmah kha kan òha tiah aa ruat i midang vialte kha zei a rel lomi hna sinah Jesuh nih hi tahchunhnak bia hi a chim.

¹⁰“Mi pahnih cu Biakinn i thlacam awkah an hung kal; pakhat pa cu Farasi mi a si i a dang cu ngunkhuai khawltu a si.

¹¹Farasi pa cu a dir i hi bantukin thla a cam: ‘Maw Pathian, kei cu midang bantukin hak a kaumi, lih a chimmi, nu le pa sualnak a tuahmi, ka si lo caah nangmah cu kan lawmh; cun khi ngunkhuai khawltupa bantuk zong khi ka si lo caah kan lawmh fawn.

¹²Zarh khat chungah voi hnih lengmang rawl ka ul i chawva ka hmuhmi vialte cheu hra cheu khat kan pek,’ tiah a ti.

¹³Sihmanhsehlaw ngunkhuai khawltupa cu lamhlatpi ah khin a dir i vanlei hmanh zoh ngam loin a òang aa cum i, ‘Maw Pathian, kei misual cungah hin zaangfahnak ngei ko,’ tiah a ti.

¹⁴Hihi kan chimh hna: Farasi mipa kha si loin hi pa tu hi a sualnak ngaihthiam in inn ah a òinmi cu a si. Zeicahtiah amah le amah aa ngantermi cu òhumh an si lai i mi tangah aa dormi cu mi ngan ah ser an si lai,” tiah a ti.

¹⁵Mi cheu nih an fale kha an cung i a kut a chuanpiak hna nakhnga Jesuh sinah khan an ratpi hna. Sihmanhsehlaw a zultu hna nih khan an rak hmuh hna i an sik hna.

¹⁶Sihmanhsehlaw Jesuh nih ngakchia cu a auh hna i, “Ngakchia kha ka sinah ratter ko hna u. Annih kha dawn hna hlah u, zeicahtiah Pathian Pennak cu hi bantuk mi hna ta hi pei a si cu.

¹⁷Hihi philh hlah u: Pathian Pennak hi ngakchia nih a rak i cohlan bantukin a cohlang lomi cu, cu Pennak chungah cun an lut bal lai lo,” tiah a ti.

¹⁸Judah mi haotu pakhat nih a thawh i, “A òhami saya, zungzal nunnak hmuh awkah zeidah ka tuah lai?” tiah a ti.

¹⁹Jesuh nih a thawh i, “Zeicahdah miòha tiah na ka ti?” tiah a hal i, “Pathian dah ti lo cu ahohmanh miòha an um òung lo.

²⁰Nawlbia kha na hngalh ko òung hna: Va cung in siseh, nupi cung in siseh, sual hlah, lainawng hlah, fir hlah, lih chim hlah, na nu le na pa upat hna, ti pei an si kha,” tiah a ti.

²¹Mipa nih cun aa thawh i, “Hi nawlbia vialte hi cu ka ngakchiat tein ka zulh lengmang cang hna,” tiah a ti.

²²Hi bia cu Jesuh nih a theih tikah, “Pakhat te na bau kun. Na ngeihmi vialte kha va zuar law tangka cu sifakmi kha va òhen hna, cun vancung khua ah chawva na ngei lai; cun ra law ka zul,” tiah a ti.

²³Sihmanhsehlaw hi bia cu mipa nih khan a theih tikah a ngaih a chia ngaingai, zeicahtiah amah cu mirum ngaingai a si.

²⁴Jesuh nih a ngaih a chiat kha a hmuh tikah aa thawh i, “Mirum caah cun Pathian Pennak chung i luh hi a va har hringhran dah.

²⁵Kalauk òhimka chung i luh nakin mirummi Pathian Pennak chung luh cu a har deuh suaumau,” tiah a ti.

²⁶A bia a theimi nih cun an hal i, “Ahodah khamhnak cu a hmu kho kun lai,” an ti.

²⁷Jesuh nih a leh hna i, “Minung tuah khawh lomi hi Pathian nih cun a tuah khawh ko,” tiah a ti.

²⁸Cun Peter nih aa thawh i, “Zohhmanh, kannih cu nangmah zulh awkah kan inn kha kan chuahtak ko hna,” tiah a ti.

²⁹Jesuh nih a leh i, “Asi, na chimmi cu ahmaan, cun hihi kan chimh hna: Pathian Pennak ruangah inn siseh, nupi siseh, unau siseh, nu le pa si hna seh, fale si hna seh, a kaltakmi cu

³⁰tu chan ah hin a let tampi in rulh an si lai i hmai chan ah zungzal nunnak an hmuh lai,” tiah a ti.

³¹Jesuh nih zultu pahleihnih kha a dang tein a kalpi hna i, “Ngai hmanh u, Jerusalem ah kan kal lai i khika ah profet hna nih Mi Fapa kong an òialmi paohpaoh kha a tling dih lai.

³²Jentail mi hna kut ah pek ka si lai i annih nih cun capo ah an ka saih lai i an ka nihsawh lai i cil an ka chak lai.

³³Fung in an ka tuk lai i an ka thah lai, sihmanhsehlaw ni thum ni ah nunnak ah ka tho òhan lai,” tiah a ti hna.

³⁴A zultu hna nih khan hi thil kong hi zeihmanh an hngal lo; a bia sullam kha thuhkanh an si i Jesuh nih a chimmi a sullam kha an hngal lo.

³⁵Jesuh cu Jeriko khua kha a hei phan deng i awkhlawh pakhat a mit a cawmi hi lam pawngah a rak òhu i thil a hal hna.

³⁶Mizapi an kal lulhmalh kha a theih tikah “Hihi zeidah a si?” tiah a hal hna.

³⁷Annih nih, “Nazareth khuami Jesuh a lanh lio a si,” tiah an leh.

³⁸Cun a au i, “Jesuh, David Fapa, ka zaangfah tuah,” a ti.

³⁹Hmai i a ummi hna nih cun an sik i dai tein um ko, an ti. Sihmanhsehlaw thang chinchin in a au i, “David Fapa, ka zaangfah tuah,” tiah a ti.

⁴⁰Cucaah Jesuh cu a dir i mitcawpa cu ka sinah ratpi u tiah a ti. A pawng a ra phak tikah Jesuh nih a thawh i,

⁴¹“Zeidah ka tuahpiak seh ti na ka duh?” tiah a hal. “Bawipa, khua hmuh òhan ka duh,” tiah a leh.

⁴²Cun Jesuh nih a thawh i, “Hmu tuah, na zumhnak nih an damter cang,” tiah a ti.

⁴³Hmakhatte ah khua cu a hun hmu kho i Jesuh kha a zulh i Pathian kha a lawmh. Mizapi nih cucu an hmuh tikah Pathian kha an thangòhat.