Read Hakha Chin JOHAN 18 Bible Online

JOHAN 18 - Hakha Chin bible

JOHAN 18

¹Jesuh nih hi bangin thla a cam dih hnuah a zultu hna he khan Kidron varek ralchan ah khan an kal. Cuka ah cun dum pakhat a um i cu dum chungah cun Jesuh le a zultu hna cu an lut.

²Cu dum a umnak hmun cu leitu Judas nih khan a hngalh, zeicahtiah Jesuh le a zultu hna cu khika hmun ah khan voi tampi an i tong tawn.

³Judas cu dum ah cun a va kal i tlangbawi upa hna le Farasi mi hna nih an fialmi ralkap tlawmpal le biakinn cawngtu palik nih khan an zulh; hriamnam kha an i put i meiinn le meifar zong kha an i vanh.

⁴A cung i a tlung ding kha Jesuh nih cun a rak hngalh dih ko i cucaah cun hmailei ah a va chuak i, “Ahodah nan kawl?” tiah a ti hna.

⁵“Nazareth khuami Jesuh,” tiah an leh. “Keimah hi amah cu ka si,” tiah a ti hna. Leitu Judas kha an sinah cun a dir ko.

⁶Jesuh nih, “Amah cu keimah hi ka si,” tiah a ti hna tikah khan, hnulei ah an i tawn i vawlei ah an tlu.

⁷Jesuh nih cun, “Ahodah nan kawl?” tiah a hal òhan hna. “Nazareth khuami Jesuh,” tiah an ti.

⁸“Amah cu keimah hi ka si, tiah pei kan chimh cang ko hna cu. Keimah nan ka kawl a si ahcun a dangtu hi cu kalter hna u,” tiah a ti.

⁹(Hitihin a chimmi cu, “Ka Pa, na ka pekmi hna cu pakhat hmanh ka thlau hna lo,” tiah a rak timi a tlin naklai caah khan a si).

¹⁰Simon Peter nih khan vainam pakhat aa ken i aa zuh i Tlangbawi Ngan salpa kha a orhlei hnakhaw pet lakin a tuk. Cu sal a min cu Malkhas a si.

¹¹Jesuh nih Peter cu a thawh i, “Na nam kha a kawng ah sawh òhan. Ka Pa nih a ka pekmi hrai, nganfah innak hrai cu ding loin a um hnga ti ah maw na ka ruah?” tiah a ti.

¹²Ralkap hna le an bawipa le Judah palik hna nih cun Jesuh cu an tlaih i an khih i

¹³a hmasa bik ah Annas sinah khan an kalpi. Annas cu Kaiafas nupi pa a si; Kaiafas cu, cu kum i Tlangbawi Ngan rian a òuanmi a si.

¹⁴Mi vialte caah mi pakhat a thih cu a òha deuh tiin Judah mi ruahnak a petu hna kha Kaiafas cu a si.

¹⁵Simon Peter le zultu dang pakhat nih Jesuh kha an zulh. Cu zultu dang cu Tlangbawi Ngan he khan aa theihngalmi an si caah Jesuh sinah khan Tlangbawi Ngan intual chungah cun a vung lut.

¹⁶Peter cu lengah, kutka pawngah khan a rak um. Tlangbawi Ngan he aa theihngalmi zultu dang kha a va chuak i kutka i a ummi ngaknu kha a va chimh i Peter kha a chungah a luhter.

¹⁷Kutka i a ummi ngaknu nih khan Peter cu a thawh i, “Khipa zultu khi na si ve ko lo maw?” tiah a ti. Peter nih, “Ka si lo,” tiah a leh.

¹⁸Khua a sih caah sinum pawl le palik pawl nih khan meihol an tih i dir buin an to. Peter zong cu an sinah khan a va kal i dir buin a va to ve.

¹⁹Tlangbawi Ngan nih khan Jesuh cu a zultu hna kong le a cawnpiaknak kong kha a hal.

²⁰Jesuh nih cun, “Langhngan in mizapi kha ka chimh zungzal ko hna; ka cawnpiak hnanak cu a dihlak in Judah mi an i pumhnak inn le biakinn ah a si ko. A thli in zeihmanh ka chim bal lo.

²¹Cucaah zeicahdah keimah cu na ka hal? Ka bia a theimi kha ta na hal ko hna. Anmah kha ka chimhmi hna cu hal ko hna § ka chimmi cu an hngalh ko khah,” tiah a ti.

²²Cu bia a chim tikah cuka i a ummi palik pakhat nih Jesuh cu a bengh i, “Zeitindah Tlangbawi Ngan sinah cu bia cu na chim ngam?” tiah a ti.

²³Jesuh nih cun, “Ahmaan lomi bia ka chim a si ahcun, hika i a ummi hna hi cucu ahmaan lo tiah chim hna. Sihmanhsehlaw ka chimmi cu ahmaanmi a si òung ahcun, zeicahdah na ka bengh?” tiah a leh.

²⁴Cuticun, an khih bu cun, Annas nih khan Tlangbawi Ngan Kaiafas sinah khan a hei kuat.

²⁵Cuka i Peter cu a dir buin mei a toh lioah khan a dang nih, “Khipa zultu kha na si ve ko lo maw?” tiah an ti. Sihmanhsehlaw Peter nih cun aa pheh i, “Ka si lo,” tiah a ti.

²⁶Tlangbawi Ngan salpa pakhat, Peter nih a hna pet lakin a tukmipa rualchan nih khan a hun i thawh i, “Amah sinah dum ah khan kan hmuh ve pei ka ti?” tiah a ti.

²⁷Peter nih aa pheh òhan i cun ar a hung khuang colh.

²⁸Jesuh cu Kaiafas inn khan an chuahpi i Mangki bawi inn ah an kalpi. Cu caan cu zingkate a si. Judah mi cu mangki bawi inn chungah khan an lut lo, zeicahtiah phunglam lei in thian i cheh i Lanhtak Puai rawl ei khawh kha an duh.

²⁹Cucaah Pilat cu a va chuak i annih cu, “Hi pa hi zei a sual nan ti dah?” a ti hna.

³⁰Annih nih, “Zei a sual lo ah maw na sinah cun kan ratpi hnga,” tiah an leh.

³¹Pilat nih cun a thawh hna i, “I kalpi u law nan phung ningin va ceih ko ngat u,” tiah a ti hna. Judah mi hna nih cun, “Ahohmanh thah khawhnak nawl kan ngeih lo cu ta,” tiah an leh.

³²(Jesuh nih zei bantuk thihnak dah ka in lai tiah a rak chimchungmi a tlinnak ding caah hi bangin thil a hung um cu a si).

³³Pilat cu inn chungah khan a vung lut òhan i Jesuh kha a auh. “Judah mi hna siangpahrang cu na si maw?” tiah a hal.

³⁴Jesuh nih cun, “Hi ti na ka hal hi nangmah lungtho in maw a si, midang nih dah ka kong kha an in chimh?” tiah a hal.

³⁵Pilat nih cun, “Kei cu Judah mi ah maw na ka ruah? Nangmah na phun hawile an tlangbawi upa hna nih pei ka sin an in phakter ko cu. Na tuahmi cu zeidah a si?” tiah a leh.

³⁶Jesuh nih cun, “Kei ka pennak cu hi vawlei ta hi a si lo; ka pennak cu hi vawlei ta hi rak si seh law cu, Judah mi nih an ka tlaih khawh nakhnga lo, ka zultu hna hi heh tiah an cawl ve hnga. Kei ka pennak cu hi vawlei ta hi a si lo,” tiah a ti.

³⁷Cucaah Pilat nih cun, “Siangpahrang cu tah na si kun maw?” tiah a hal. Jesuh nih, “Siangpahrang na si tiah na ka ti. Hi vawlei ah ka chuah chan le ka rat chan cu biatak kong chim hi a si. Biatak kha a hna a phihkanh lomi paoh nih cun ka bia kha an ngaih,” tiah a ti.

³⁸“Zei cu dah biatak cu a si?” tiah Pilat nih a hal. Cun Pilat cu lengah a va chuak òhan i, Judah mi hna cu, “Kei nih cun a sualnak zeihmanh ka hmu lo.

³⁹Sihmanhsehlaw nan phung tawn bantukin Lanhtak Puai ah cun thongtla pakhat cu kan chuahpiak zungzal hna, Judah siangpahrang cu in thlahpiak hna ning law nan duh maw?” tiah a ti hna.

⁴⁰An au i, “Amah cu kan duh lo. Bar-abbas kan duh,” an ti. (Bar-abbas cu damiah a si).