Read Hakha Chin 1 KORIN 14 Bible Online

1 KORIN 14 - Hakha Chin bible

1 KORIN 14

¹Cucaah dawtnak hi biapi bik ah chia u. Thlarau laksawng hmuh awk kha i zuam hna u law cu hna lakah cun Pathian bia chimnak laksawng kha hmuh i zuam khun u.

²Holhtheihlo in a holhmi cu minung sinah si loin Pathian sinah bia a chim a si, zeicahtiah ahohmanh nih a chimmi kha a sullam an hngal lo. Thlarau nih khan cu ti bia chim khawhnak cu a pek cu a pek ko lai, sihmanhsehlaw a chimmi cu hngalh lomi thil a si.

³Asinain Pathian bia a chimtu nih cun minung sin tu ah khan a chim i bawmhnak le lungòhawnnak le hnangamnak kha a pek hna.

⁴Holhtheihlo in a holhmipa cu amah le amah lawng kha aa bawm, sihmanhsehlaw Pathian bia a chimmi nih cun khrihfabu kha a ning piin a bawmh.

⁵Nan dihlak in holhtheihlo i holh cu kan duhpiakmi hna zong a si ko hnga, sihmanhsehlaw kan duhpiak deuhmi hna cu Pathian bia chim khawhnak laksawng kha ngei u ti hi a si. Zeicahtiah Pathian bia a chimmi cu holhtheihlo in a holhmi nakcun a òhahnem deuh suaumau. Khrihfabu nih an òhathnempi khawh nakhnga caah a let khotu an um òung lo ahcun holh theih lo cu zeihmanh a òhahnem lo.

⁶Cucaah ka u le ka nau hna, nan sin i ka rat tikah holhtheihlo cun bia in chim hna ning law nan caah ka òhathnemnak zeital a um hnga maw? Um hlah. Pathian nih a phuanmi bia siseh, hngalhnak bia siseh, biatak fianter khawhnak siseh, cawnpiaknak siseh, kan chimhmi hna chungah khan aa tel òung lo ahcun zeihmanh kan òhathnem hnanak a um lai lo.

⁷Nunnak a ngei lomi aw dawh tumnak thilri hmanh nih khin fiang tein an aw cu an chuahter lo ahcun zei aw dah an tum ti kha hngalh khawh a si lo. Tingtang a si zongah, thonglawi a si zongah, cuticun an si ko.

⁸Cun muko tumtu zong nih fiang tein a tum lo ahcun, ahodah raltuknak hmun ah cun a chuak lai?

⁹Cu bantuk cun holhtheihlo in nan holhmi cu sullam fiang zeihmanh a ngeih lo ahcun aho nih dah nan chimmi cu an hngalh lai? Thlitu lak biachim bantuk men pei a si ko lai cu.

¹⁰Vawlei cungah hin holh phun dangdang tampi an um ko i sullam ngei lomi pakhat hmanh an um lo.

¹¹Asinain a chimtupa nih a hmanmi holh kha ka hngalh lo ahcun amah cu ka caah holh theih lo mipa a si i kei zong a caah holh theih lo mipa ka si ve.

¹²Thlarau laksawng hmuh a duh ngaingaimi nan si kha ka hngalh, cucaah zeidang zeidang nakin khrihfabupi a òhanchotertu ding laksawng kha duh khun u tiah kan duh hna.

¹³Holhtheihlo in a holhmi nih khan a chimmi cu leh khawhnak a ngeihnak hnga thlacam seh.

¹⁴Cu bantuk holh cu ka thlacamnak i ka hman ahcun ka thlarau nih cun thla cu a cam taktak ko, sihmanhsehlaw ka lungthin cu, cu thlacamnak ah cun aa tel lo.

¹⁵Cucaah zeitindah ka tuah awk a si lai? Ka thlarau in thla ka cam lai i ka lungthin zongin ka cam fawn lai; ka thlarau in hla ka sa lai i ka lungthin zongin ka sak fawn lai.

¹⁶Pathian sinah thlarau lawngin lawmhnak bia cu na chim ahcun, zeitindah pumhnak i a um vemi mi sawhsawh hna nih khan lawmhnak bia na chimnak ah cun Amen an rak in tipi khawh lai? Na chimmi cu a sullam zeihmanh an hngalh òung lo.

¹⁷Cucaah Pathian sin i lawmhnak in thla na cam cu a òha ko lai nain midang cu zeihmanh a òhathnem hna lo cu ta!

¹⁸Nanmah nakin holhtheihlo in tampi ka holh deuh caah Pathian cu ka lawmh ko.

¹⁹Sihmanhsehlaw pumhnak ah cun midang cawnpiaknak ding caah, holhtheihlo in bia thong hra chim nakin theihmi holh in bia fang nga ka chim deuh lai.

²⁰Ka u le ka nau hna, khua nan ruahning ah hin ngakchia bantuk si hlah u; òhat lonak kongah cun ngakchia bantuk si u, sihmanhsehlaw khuaruahning ah cun nutling patling si u.

²¹Cathiang chungah, “Hi mi hna sinah hin holh phun dang in a holhmi hna kha hmang in bia ka chim lai i Ramdangmi hna hmur kha hmang in an sinah bia ka chim lai, Asinain cu hmanh ah cun ka bia an ngai lai lo, tiah Bawipa nih a ti,” tiin aa òial.

²²Cucaah cun holhtheihlo in holh cu Pathian a zummi hna caah si loin a zum lomi hna ca i hmelchunhnak a si i Pathian bia holhtheih in chim cu a zum lomi hna caah si loin a zummi hna ca i hmelchunhnak a si.

²³Cucaah khrihfabu cu hei i pum u law, cu nan i pumhnak ah cun nan dihlak in holhtheihlo in hei holh u law § mi pakhatkhat maw, asiloah Pathian bia lomi maw rung lut seh law, mihrut an i ti hna hnga lo maw?

²⁴Asinain nan dihlak in Pathian bia tu nan chim ahcun, a zum lomi maw asiloah mi pakhatkhat maw a rung luh tikah a theihmi bia nih cun a lungthin kha a vun dahter lai i a sualnak kha a hngalhter lai.

²⁵A lungchung in a thli tein a ruahmi thil kha an hung lang lai i kun in Pathian kha a biak lai i, “Nan sinah hin Pathian a um taktak,” a ti lai.

²⁶Cucaah ka u le ka nau hna, ka chim duhmi cu hihi a si: Pathian biak awk i nan i pumh tikah pakhat nih hla thawh awk nan ngei ko lai, pakhat nih cawnpiak awk nan ngei ko lai, pakhat nih Pathian nih a sinah a phuanmi bia chim awk nan ngei ko lai, pakhat nih holhtheihlo in phung chim ding nan ngei ko lai i pakhat nih cu holhtheihlo a sullam leh khawhnak cu nan ngei ko lai. Cu vialte cu a zeipaoh hmanh kha, khrihfabu òhathnemnak ding caah tuah si hna seh.

²⁷Holhtheihlo in holh a duhmi an um ahcun, a tam bik ah pahnih pathum tiang nih chim hna seh law a chaan in i chaang hna seh, cun a lettu an um hrimhrim lai.

²⁸Sihmanhsehlaw a let khotu ahohmanh an um lo ahcun holhtheihlo in a holhmipa cu pumhnak chungah cun dai tein um ko seh, amah le amah lawng kha i chawn ko seh law Pathian zong cu chawn ko seh.

²⁹Cun Pathian bia chim awk a ngeimi, pahnih pathum nih chim hna seh law a dang nih khan an chimmi cu a òhat òhat lo tuaktan hna seh.

³⁰Cun pumhnak i a òhu vemi pakhatkhat nih khan bia chim awk Pathian sinin a hmuhmi a um ahcun, a chim liomi nih khan a chimmi cu a ngol lai.

³¹Nan dihlak in cawnpiaknak le thazang òhawnnak kha nan hmuh khawh nakhnga Pathian bia cu aa chaang lengmang in nan dihlak in nan chim cio ko lai.

³²Pathian bia chimnak caah Pathian nih an pekmi hna laksawng cu a chimtu nih khan a uk awk a si,

³³zeicahtiah Pathian nih a kan auh cu ningcang lo piin um awkah si loin daite le rem tein um awk tu ah a si.

³⁴Pathian mi aa pummi hna an i pumh tikah a si cio tawn bantukin, pumhnak ah cun nu cu dai tein um awk an si ko. Bia kha chimter awk an si lai lo. Judah mi Phung nih a ti bangin, pumh uktu an si lai lo.

³⁵Hngalh an duhmi thil a um ahcun inn ah an vale kha hal ko hna seh. Pumhnak i nu bia chim len cu ningzak a si.

³⁶Pathian bia cu nanmah in dahra a hram aa thawk? Cu bia nih a phakmi hna cu nanmah lawng dahra nan si?

³⁷Ahohmanh nih Pathian lamkaltu ka si tiin aa ruah ah siseh, thlarau laksawng ngeimi ka si tiin aa ruah ah siseh, a hngalh awk cu, nan sin i ka òialmi hi Bawipa nawlbia a si, ti kha a si.

³⁸Asinain hihi zei i a rel lo ahcun, amah zong kha zei ah rel ve hlah u.

³⁹A tawinak in, ka u le ka nau hna, Pathian bia chim kha duh u; holhtheihlo holh kha thlauh hna hlah u,

⁴⁰asinain zei paohpaoh kha dawhte le ningcang tein tuah hna u.