Read Hakha Chin 1 KORIN 2 Bible Online

1 KORIN 2 - Hakha Chin bible

1 KORIN 2

¹Ka u le ka nau hna, nan sin i Pathian biathli chim awk i ka rat ah khan, biathluan sausau le cathiam sang pawl nih an hmanmi bia kha ka hmang hna lo.

²Zeicahtiah nan sin i ka um lioah khan Jesuh Khrih le vailam i an thahnak kong dah ti lo cu a dang zeihmanh ruah le khah kaa timhmi a um lo.

³Cucaah nan sin i ka rat ah khan tla hnimhniamte le therphang lengmang in ka um i

⁴kan cawnpiaknak hna le ka phungchimmi ah khan nan lung an pemtu hna cu minung fimthiamnak holh dawhdawh kha si loin Pathian Thlarau òhawnnak tu kha a si deuh.

⁵Cucaah cun nan zumhnak cu minung fimnak ah aa bunhmi si loin Pathian òhawnnak i aa bunhmi tu a si deuh.

⁶Asinain nutling patling a si cangmi hna sinah cun fimnak bia kha ka chim ko. Sihmanhsehlaw cu ka chimmi fimnak bia cu, hi a liam lio lengmangmi chan fimnak hi a si lo, hi a liam lio lengmangmi chan a uktu hna òhawnnak fimnak zong a si lo;

⁷ka chimmi fimnak cu Pathian biathli fimnak, minung hngalh lomi, vawlei ser hlan hrimhrim in Pathian nih kan sunparnak ding ca i a rak timhmi fimnak tu kha a si.

⁸Hi vawlei a uktu hna nih hin, cu fimnak cu an rak hngal lo. Rak hngal hna seh law cu, sunparnak Bawi kha vailam ah an rak khenh hnga lo.

⁹Sihmanhsehlaw Cathiang nih, “Ahohmanh nih an hmuh bal lomi le an theih bal lomi, A si kho lai, tiah ahohmanh nih a ruah in an ruah bal lomi, Kha thengte kha Pathian nih amah a dawtu hna ca i a timhmi cu a si,” a ti bang khan a si taktak.

¹⁰Cu biathli cu Pathian nih a Thlarau in kannih sinah khan a phuan. Thlarau nih cun zeizong vialte kha a dah a hriah dih, Pathian nih aa tinhmi a thukmi hmanh kha a coih dih hna.

¹¹Minung cu a chung i a ummi amah a thlarau nih khan a konglam cu a dihumnak in a hngalh; cu bantukin Pathian zong cu Pathian Thlarau lawnglawng nih a konglam kha a dihumnak in a hngalh ve.

¹²Kannih kan hmuhmi thlarau cu hi vawlei thlarau hi a si lo, Pathian nih a kan pekmi vialte cu kan hngalh khawh nakhnga, Pathian nih a run thlahmi Thlarau cu kan hmuh cang.

¹³Cucaah Thlarau a ngeimi hna sinah thlarau lei biatak kha a sullam kan chim tikah minung cawnpiakmi bia kha hmang loin Thlarau cawnpiakmi bia tu kha kan hman.

¹⁴Sihmanhsehlaw Thlarau a ngei lomi nih cun Pathian Thlarau sinin a rami laksawng cu an hmu kho lo. Fiang in an hngal kho ngaingai hna lo; laksawng a sunning kha thlarau lei lawngin hngalh khawh a si caah annih caah cun pakpalawng men a si ko.

¹⁵Thlarau a ngeimi nih cun zeizong vialte kha an òhat an chiat an khing an thlai khawh, sihmanhsehlaw anmah tu cu ahohmanh nih sual an phaw kho hna lo.

¹⁶Cathiang nih, “Bawipa cu aho nih dah a lungthin an hngalh? Amah cu aho nih dah ruahnak an cheuh khawh?” a ti bangin a si taktak. Sihmanhsehlaw kannih cu Khrih lungthin a ngeimi kan si.