Read Hakha Chin HEBRU 11 Bible Online

HEBRU 11 - Hakha Chin bible

HEBRU 11

¹Zumhnak ngeih kan ti hi, kan i ruahchanmi kan hmuh òheo lai ti kan zumh le a taktak le a ngaingai a simi thil kan mit in kan hmuh khawh lomi hi an um ko ti kan zumh hi a si.

²Zumhnak an rak ngeih caah hlanlio mi hna nih khan Pathian cu a lung an rak ton.

³Van le vawlei cu Pathian bia nih a ser hna ti kha zumhnak in kan hngalh i cucaah hmuh khawhmi thil cu hmuh khawh lomi thil chungin ser a si ti kha a lang.

⁴Kain nih a pekmi raithawinak nakin a òha deuhmi raithawinak Abel nih Pathian a pekmi cu zumhnak in a si. Zumhnak thawngin amah cu Pathian nih miding ah a cohlan i cucu Pathian nih a laksawng a cohlanpiaknak ah khan a lang; cun a thih hnu zongah, zumhnak cu bia a chim òhiamòhiam ko rih.

⁵Enok kha thi loin Pathian sinah a kaitertu cu zumhnak a si; Pathian nih a lak caah khan ahohmanh nih an hmu ti lo. Cathiang nih a chimmi cu, Enok nih khan van i a kai hlanah Pathian lung kha a ton, ti a si.

⁶Ahohmanh nih zumhnak loin Pathian lung ton khawh a si lo; zeicahtiah Pathian a fuhmi paohpaoh nih cun, Pathian cu a um i amah a kawlmi cu laksawng a pek hna, ti kha an zumh awk a herh.

⁷Noah kha, a hmuh khawh lomi hmailei thil kongah, Pathian nih ralrinnak a pek tikah, cu ralrinnak bia a theihtertu cu zumhnak a si. Pathian bia kha a ngaih i lawng pakhat a ser i cu chungah cun amah le a innchungkhar kha him tein an um. Cuticun a zumhnak khan vawleicung mi vialte cu, an palh, ti kha a langhter i zumhnak thawngin a rami dinnak kha Pathian sinin a hmuh.

⁸Pathian nih Abraham kha a auh tikah, a bia a ngaihtertu le, kan pek lai, tiah a kamhmi ram i a kaltertu kha zumhnak a si. Khuazei ah ka kal ti hngal loin a ram kha a chuahtak.

⁹Pathian nih a kamhmi ram chungah khan zumhnak in ramdangmi bantukin khua a sa. Isak le Jakob he tiah thlam chungah khan khua an sa i cu hna zong cu Pathian biakamnak a hmumi an si ve.

¹⁰Zungzal in a hmunmi khuapi, Pathian sermi cu, Abraham nih cun a hngah.

¹¹Abraham kha a tar tuk cang i Sarah kha fa ngei kho lo a si nain, Abraham cu hringtu pa ah a sertu cu zumhnak a si. Pathian nih khan a biakamnak cu a tuah òheo lai, ti kha a zumh.

¹²Mithi bantuk a si ko cang nain, hi mipa pakhat chung hin, van i arfi zat a simi le rili kam i rel cawk lo thetse zat tefa kha an chuak.

¹³Hi mi vialte hna hi zumhnak ngei in an thi. Pathian nih a kamhmi hna cu an hmu lo, sihmanhsehlaw lamhlatpi in an rak hmuh i an rak i lawm i vawlei cungah hin khual le a vakvai menmi kan si, an rak ti.

¹⁴Cu bantukin bia a chimmi hna nih cun, anmah ta a simi ram an kawl kha an langhter.

¹⁵An kaltak ciami ram kha an ruat òhan ti lo, rak ruat òhan hna seh law cuka ram i kir òhannak caan òha an rak ngei ko hnga.

¹⁶Annih nih an ngaihmi ram cu, ram òha deuh vancung ram tu kha a si. Pathian nih an caah khua pakhat a timhpiak hna i cucaah annih nih Pathian cu, kan Pathian, tiin an kawh tikah, Pathian cu a ning a zak lo.

¹⁷Pathian nih Abraham cu a hneksak tikah, a fapa Isak kha raithawinak ah a pekchanhtertu cu zumhnak a si. Pathian nih bia a kamhmi cu Abraham kha a si, sihmanhsehlaw a fapa ngeihchunte pakhat kha raithawinak i pekchanh awkah aa tim kho ko.

¹⁸Pathian nih Abraham cu a rak thawh i, “Tefa na ngeih laimi cu Isak chung chuak hi an si lai,” a rak ti.

¹⁹Abraham nih khan, Pathian nih Isak cu thihnak in a thawhter khawh ko, tiah a rak zumh i cu bantuk cun Pathian nih Isak cu thihnak in a thawhter ti awk a si taktak.

²⁰Jakob le Esau cu, hmailei ah thluachuahnak nan hmu lai, tiah Isak nih zumhnak in bia a kamh hna.

²¹Josef fapa kha an dihlak in Jakob nih a thih laite ah zumhnak in thluachuahnak a pek hna; a òhiangòhunh kha aa hngauh i Pathian kha a biak.

²²Josef nih khan a thih lai ah, Israel mi cu Izipt ram in an chuak te lai, tiah zumhnak in a chim. Cun a pum kha, zeitindah run tuah awk a si lai tiah bia a chiahtaktertu zong kha zumhnak òhiamòhiam a si.

²³Moses kha a chuah hnu thla thum tiang a nu le a pa nih an thuh i cu a thuhtertu hna cu zumhnak a si. Fa chuak thiam ngai a si kha an hmuh i siangpahrang nawlbia al kha an òih lo.

²⁴Cun Moses kha a hung upat tikah Faro fanu fapa si a duhter lotu kha zumhnak a si.

²⁵Sualnak chung i caan tawite chung i nuamh nakin Pathian mi hna sin sifah in kha aa thim deuh.

²⁶Messiah ruang i nihsawhnak in cu Izipt ram chawhlawn vialte nakin a sung deuh ah a rel i cucu zeicahdah a si tiah, hmailei hmuh laimi laksawng kha a rak i ruah chih caah a si.

²⁷Siangpahrang thinhunnak kha òih loin Moses cu Izipt ram khan a chuak i cu a chuahtertu cu zumhnak a si; hmuh khawh lomi Pathian kha hmu seh law cu bang, a kir in a kir duh ti lo.

²⁸Lanhtak Puai a sertertu le innka ah thisen nan thuh lai, a titertu kha zumhnak a si; kha an tuahmi kha Thihnak Vancungmi nih Israel mi hna fater kha that hna hlah seh ti caah a si.

²⁹Rili Sen, vawlei ro cung bantukin Israel mi a tantertu hna kha zumhnak a si; Izipt mi nih tan an timh ve tikah ti nih khan a dolh hna.

³⁰Israel mi nih ni sarih chung an vel hnuah Jeriko khua kulhnak vampang a cimhtertu kha zumhnak a si.

³¹Pathian nawl a ngai lomi hna sinah khan hlawhhlangnu Rahab cu a thi lo, kha a luattertu kha zumhnak a si i cucu mingiatu pawl a rak thuhphenh hna caah khan a si.

³²Ka chim lengmang ko rih hnga maw? Gideon tehna, Barak tehna, Samson tehna, Jefthah tehna, David tehna, Samuel tehna, le profet hna kong chim awk tampi a um ko nain a chimnak caan ka ngei ti lo.

³³Zumhnak in ram ngan pipi kha an tuk hna i an tei hna. A dingmi thil kha an tuah i Pathian nih bia a kamhmi hna kha an hmuh. Chiandeih kha an ka an phih hna,

³⁴mei òihnung kha an hmih i vainam thahnak in an luat. Annih cu an rak der, sihmanhsehlaw miòhawng ah an cang, raltuknak hmun ah khan a òhawngmi an si i ramdangmi ralkap kha an tei hna.

³⁵Zumhnak in nu hna cu an mithi kha nun òhanterpiak an si. A dang cu a òha deuhmi nunnak i thawhter si kha an duh deuh caah, luatnak kha i lak duh loin hremnak in an thi.

³⁶A cheu cu nihsawhnak le fung tuknak kha an ing i a cheu cu òemnak le thongthlaknak kha an ing.

³⁷Lung in an cheh hna, hluah in cheu hnih ah an chuah hna, vainam in an thah hna. Tuu phaw le meheh phaw i aih in an vak hniapmap i hremnak le serhsatnak kha an ing.

³⁸Vawlei hi an caah umnak ah a òha theng lem lo. Ralzam bantukin ramlak le tlang ah an zam i vawlei tang lungkua le khor ah khua an sa.

³⁹Hi mi vialte hna hi an zumhnak ruangah hin zeitluk in dah thangòhat awk an tlak? Asinain Pathian nih a kamhmi hna thil kha a hmuh hmanh an hmu lo,

⁴⁰zeicahtiah kan caah Pathian nih khuakhannak òha deuh a ngeih caah a si; annih kha kanmah he lawngin tlinnak a hmu kho ding an rak si.