Read Hakha Chin 1 PETER 4 Bible Online

1 PETER 4 - Hakha Chin bible

1 PETER 4

¹Khrih zong nih khan a pum in a rak in caah nannih zong nih cu bantuk thinlung le lungput cun nan tha nan i òhawnter ve awk a si. Cu bantukin temhinnak a ingmi hna cu sualnak chungah khan an i tel ti lo.

²Cucaah atu thawk in, hi vawlei cung i nan nun chung cu, minung duhnak kha si ti loin Pathian duhnak tu kha i ukter cang u.

³Lawkihmi nih an rak tuah tawnmi kha a za ceo nan rak tuah ve ko cang. Pumsa duhnak tehna, hornak tehna, zu ritnak tehna, zu hmun i nuamhnak tehna, bawilamnak tehna le fihnung a simi siasal biaknak tehna kha nan rak tuah hna.

⁴Cun atu cu Lawkihmi hna kha, cu bantuk nunning ah cun nan telpi duh ti hna lo caah an khuaruah a har i nannih kha an in serhsat hna.

⁵Sihmanhsehlaw a nungmi he a thimi he bia a ceihtu ding Pathian hmaiah cun an chuak ve lai i an bia cu an i chim ve te ko lai.

⁶Cu ruangah cun mithi mi hna sin zong i Thawngòha chim a si venak cu a si. Annih cu midang cio bantuk khan an pum in an nun lioah khan biaceih cu an si ve ko cang; sihmanhsehlaw annih sin i Thawngòha chim a sinak cu thlarau in an nunnak ah hin Pathian a nun bantukin an nun khawh ve nakhnga ding caah a si.

⁷Zeizong vialte donghnak caan hi a nai ko cang. Cucaah cun thla nan cam khawh nakhnga, mah le mah aa uk khomi le ralring tein a ummi nan si lai.

⁸Zeidang vialte nakin, pakhat le pakhat lungtak tein i daw u, zeicahtiah dawtnak nih cun sualnak tampi kha a khuh khawh.

⁹Phunzai loin pakhat le pakhat tlun inn i onh u.

¹⁰Pathian laksawng kengtu òha bantukin Pathian sinin nan hmuhmi laksawng kha midang ca òhatnak ah hmang cio u.

¹¹Zeizong kip ah Jesuh Khrih thawngin Pathian nih thangòhatnak a hmuh nakhnga, phung a chimmi nih Pathian bia kha chim u, rian a òuanmi nih Pathian pekmi thazang khan òuan u, sunparnak le lianhngannak cu zungzal in zungzal tiang amah ta a si. Amen.

¹²Ka dawtmi ka hawile hna, a fakmi temhinnak nan in caah hin, nan khuaruahhar hlah u, kan cungah a um bal theng lomi thil a tlung tiin ruat hlah u.

¹³Khrih inmi temhnak kha nan in ve caah a lawmh tu in i lawm u, zeicahtiah a sunparnak cu a langh tikah lunglawmhnak in nan khat lai.

¹⁴Khrih zultu nan si ruang i serhsatnak nan in ahcun, nan caah lunglawmh awk a va si dah; cu nih cun sunparnak a ngeimi Thlarau, Pathian Thlarau kha nan cungah a um, ti kha a langhter.

¹⁵Lainawng si ruang le mifir si ruang le miòhalo si ruang le midang rian i vaa sawhkalh ruang bel ah ahohmanh temhnak ing hlah u.

¹⁶Khrihfa nan si ruang i temhnak nan in tu ahcun, nan ning zak hlah u; Khrih min kha nan i put caah Pathian tu kha lawm u.

¹⁷Biaceihnak thawk caan cu a phan cang i biaceih hmasa bik ding cu Pathian mi hna kha an si lai. Kanmah in thawh a si ahcun, Pathian sinin a rami Thawngòha a zum lomi hna kha, zeitindik an donghnak a va si te ual lai?

¹⁸Cathiang nih a chim bangin, “Mi òha ca hmanh ah khamhnak hmuh a har, Cucaah Pathian zei i a rel lomi hna le sualnak a tuahmi hna cu, zeidik an hei lawh te lai.”

¹⁹Cucaah Pathian duhning a si ruang i temhnak a ingmi hna nih cun thil òha an tuahmi thawng khan Pathian sinah i pe ko hna seh § Pathian cu anmah a Sertu hna kha a si i a biakam kha a tlolh bal lo.