Read Halia Luk 3 Bible Online

Luk 3 - Halia bible

Luk 3

¹Turu hamalotonu tolimanu hiningal te Gamman Pania e Taibirius i Rom, e Jon e tanian hihatuts. Tara poata teka, e Pontias Pailat a Gamman tara provins i Judia, ne Herot te tara kapin a provins i Galili, ne toulanen e Pilip te tara kapin a provins i Ituria ni Trekonaitis. Ne Laisenias te tara kapin a provins i Abilin.

²Be re Anas mere Kaiapas te tsunono panir turu pris. Nonei tara poata teka u ranga tere Sunahan e la uama tara pien tere Sekaria e Jon te kaia tara latu pinopino.

³Be Jon e la uato tara mamana han i rehina Ramun i Jodan me hihatuts uana teka, “Habirits ba niam u markato u omi i tamilimiu ba te habaptaismiu, be Sunahan te lu ba nenou u markato u omi i tamilimiu, ba te tara pouts rano limiu.”

⁴Te mar koloto u e Aisaia a propet turu buk i tanen i manasa me poiena,“A toa katun e na ranga hapan noa romana tara latu pinopino ba te poiena,‘Kato hamatsköe iam a man markato i tamilimiu, taraha a Tsunono e ngilin sila nama romana tara maroro a matskö.

⁵U gohi hoboto e tatei hu riou, nu pokus hoboto e tatei hala pute riou. U kalana u kokoela e hamatskö riou, nu maroro u tuktukul e kato hamamarohane riou.

⁶Bu mamanu katun te tarer romana a nihitaguhu tere Sunahan!’ ” U koloto tere Aisaia e kapana teka.

⁷Bu katun u para e la uarima tere Jon te gi habaptaisia i tanen. Ba nonei e poiena, “Alimiu u katunur tara kukutsi a omi — alimiu u katun u gamogamo! Alimiu e ma antunan bus ba namoi a raharaha tere Sunahan te butu nou!

⁸Alimiu go habirits ba niam u markato u omi, ba limiu te mar kato hamana koru uamiu te kato uana a katun te habirits ba nena a markato a omi. Alimiu go ma tatei mar hakats uami teka: ‘Alam e nigam, taraha e Abraham a tubumulam.’ Alia e hatei rago limiu, e Sunahan e antunan katoe nei u hatu teka a pinaposa tere Abraham. E Sunahan e ma haniga pinopinoe nei a katun te pala uana tere Abraham. E moa. E hanige iena a katun te kukutiena u ranga tere Sunahan.

⁹Ne Sunahan e katsin ngats lupu hamanasena u roei hoboto te mamala hua haniga nei, ba te lapo naria turu tula. E kato uana, e Sunahan e hahune nou a katun te ma kato haniga nei.”

¹⁰Bu katun e rangatser e Jon, “Aha tala te katoe mou lam?”

¹¹Ba nonei e ranga palisina, “A katun te ka mena u huol u hasobu u ngahangaha e ga halan u toa tara katun te moana. Na katun te ka mena a kannou e ga kato has u i iesana.”

¹²U katun ti lulu a takis i la silema te gi mi habaptais uen, ba nori e rangatse ren, “Tson hihatuts, aha te go kati lam?”

¹³Ba nonei e poieto i taren, “Alimiu go lu takis hapopo mia te ranga uana a gamman, ba te ma lu lelmi.”

¹⁴Bu palair u soldia i rangata hase ten, “Ga lam, aha te go kati lam?” Ba nonei e poiena i taren, “Ma singatsemi ta katun ba te luemiu a moni i tanen. Na limiu go ma kot gamogamo has nami ta katun. Alimiu go sasala meiam a hihol i tamilimiu.”

¹⁵A barebana e tanian hakats ner e Mesaia e sukusukun lama, nonei a katun te hopu kapin e Sunahan, me hakhakats ner e Jon me poier nonei toum e Mesaia.

¹⁶Be Jon e poiena i taren hoboto, “Alia e baptais ragi limiu u ramun tun, kaba a toa katun te pan bala nano lia e la nama romana. Nonei a tsunono pan, na lia a tsikutupin katun papala koru. Nonei te baptais ranoi romana limiu u Namnamei u Goagono nu tula.

¹⁷Nonei e katsin kato hamanasena a toukui i tanen te go lu kakata menien u katun u niga nu katun u omi, te mar hapiraka menari a pemuna ngal. Nonei e haka renoa u katun u niga tara han a niga, ba nonei te tsuga mera nei u katun u omi turu tula te ma antunan hoso nari.”

¹⁸Na turu mamana has u mar ranga e Jon e kato hatakei rien u hakhakats tara barebana te hatuts rien u Bulungana u Niga.

¹⁹Be Jon e ranga sileta e Herot a Gamman, taraha nonei e töli e Herodias, a tahol tere toulanen pouts. Ne Herot e kato hakapi a palaina a markato a omi a para.

²⁰Be Herot e katoena a tana markato a omi koru te haka menien e Jon tara karabus. A tou baptais tere Iesu

²¹I murina ti habaptaisia a barebana hoboto, be Iesu e habaptais hasina. Tara poata te singo ien, bu Kolö e takalatana, bu Namnamei u Goagono e hakulue mata a peisanen me koul uanama i tanen. Bu toa u ranga e butu nama i Kolö me poe nama, “Alö a Pien Tson a tsomi koru i tar. Alia e haniga korue golö.” A solor u tubune Iesu

²³Poata te hatanieia e Iesu a toukui i tanen, ba nonei e ka toum mena u 30 u hiningal.E Iesu i ngöei a pien tere Josep.Ne Josep e tamanen e Hilai

²⁴Hilai e tamanen e Matat.Matat e tamanen e Livai.Livai e tamanen e Melkai.Melkai e tamanen e Janai.Janai e tamanen e Josep.

²⁵Josep e tamanen e Matataias.Matataias e tamanen e Emos.Emos e tamanen e Neham.Neham e tamanen e Eslai.Eslai e temanen e Nagai.

²⁶Nagai e tamanen e Meat.Meat e tamanen e Matataias.Matataias e tamanen e Semein.Semein e tamanen e Josek.Josek e tamanen e Joda.

²⁷Joda e tamanen e Joanan.Joanan e tamanen e Risa.Risa e tamanen e Serababel.Serababel e tamanen e Sialtiel.Sialtiel e tamanen e Nerai.

²⁸Nerai e tamanen e Melkai.Melkai e tamanen e Edai.Edai e tamanen e Kosam.Kosam e tamanen e Elmedam.Elmedam e tamanen e Er.

²⁹Er e tamanen e Josua.Josua e tamanen e Elieser.Elieser e tamanen e Jorim.Jorim e tamanen e Matat.Matat e tamanen e Livai.

³⁰Livai e tamanen e Simion.Simion e tamanen e Juda.Juda e tamanen e Josep.Josep e tamanen e Jonam.Jonam e tamanen e Elaiakim.

³¹Elaiakim e tamanen e Melia.Melia e tamanen e Mena.Mena e tamanen e Matata.Matata e tamanen e Netan.Netan e tamanen e Devit.

³²Devit e tamanen e Jesi.Jesi e tamanen e Obet.Obet e tamanen e Boas.Boas e tamanen e SalmonSalmon e tamanen e Nason.

³³Nason e tamanen e Aminadap.Aminadap e tamanen e Admin.Admin e tamanen e Arni.Arni e tamanen e Hesron.Hesron e tamanen e Peres.Peres e tamanen e Juda.

³⁴Juda e tamanen e Jekop.Jekop e tamanen e Aisak.Aisak e tamanen e Abraham.Abraham e tamanen e Tera.Tera e tamanen e Nehor.

³⁵Nehor e tamanen e Sirak.Sirak e tamanen e Riu.Riu e tamanen e Pilek.Pilek e tamanen e Iber.Iber e tamanen e Sila.

³⁶Sila e tamanen e Kenan.Kenan e tamanen e Arpaksat.Arpaksat e tamanen e Sem.Sem e tamanen e Noa.Noa e tamanen e Lemek.

³⁷Lemek e tamanen e Metusela.Metusela e tamanen e Inok.Inok e tamanen e Jeret.Jeret e tamanen e Mahalaliel.Mahalaliel e tamanen e Kenan.

³⁸Kenan e tamanen e Inos.Inos e tamanen e Set.Set e tamanen e Adam.Ne Adam e tamanen e Sunahan.