Read Hano Matiu 11 Bible Online

Matiu 11 - Hano bible

Matiu 11

¹La mahavana Jisas mwa avo vuvuri lalainira hala domwan gairua, mwa derai ute gea, mwa bano be vi vagahi i vi toretore la vanua bwatutuga rituai sosori aia.

²La mahavana be Jon Garuhisabuga, mwa dogo lol imwa vauvauhi, mwa ron̄ roroi huri rovoga duluai gabe Jisas mwa lolia, haḡe mwa hora non roron̄tai rituai vai aben Jisas

³be rav hudalinia be, “Giḡo haḡe wani gabe Jon nu vevea be vi mai, sage gav hohov radui atat dolua?”

⁴Haḡe Jisas mwa bwaliura be, “Giv tabagilu ba bevea lalai Jon havanau gabe gim ron̄oe i havanau gabe gim ḡitae.

⁵Ira matagara ram ḡita dum ute, ira luḡu ram lago, ira leba ram melmelo mulei, ira bwerovono ram ron̄ dum ute, ira atatmate ram domare mulei, haḡe ira hiru ram ron̄ toretore huri Roroi Tavuha.

⁶Samwarana gaivua huri ihei gabe mwa hav vinihi te gairuruai aluku!”

⁷La mahavana be roron̄tai non Jon ram dabagilu mulei, Jisas mwa dau bwatuna mwa bevuri huri Jon lalai sinombu, mwa bevea be, “Batena be gin vano huri Jon la vanua vuroi, gin vinihia be giv gita hano? Ariu ram magibegibe gin lan̄i?

⁸Gin vano be giv gita hano? Atatu be mwa sagasagai gaisaga ḡalkalana? Atatu kunia ram dogo n̄an lol imwan ira lavoa.

⁹Giv vevea, gin vano be giv gita hano? Atatun vevsera vwate? Asia, mwasigi haḡea, take wani gim ḡitae kea liu nin ira atatun vevsera.

¹⁰Bwatuna Jon uhu wani gabe God mwa bevea lol Ravrava Sabuga be, ‘Geki haḡea noḡu horata, nav horae amua ninigo be vi havan̄ matanhala hurigo.’

¹¹Nam bev mwasigi lalai kimiu be Jon Garuhisabuga uhu nu liu nin vataha atatu ran vora lol ureure. Take wani gabe mwa do hivhivo lol Ute Lavoa atamare, kea higea nu liu nin Jon.

¹²La mahavana be Jon Garuhisabuga nu vavora mwa doretore vai votu garigi be Ute Lavoa atamare, mwa habwe taro ririhai gin ginau hahantai, i atat muramura kera geki ram lol ron̄oe be rav lai luara be rai vora nora atatu.

¹³Ira atatun vevsera mai Silo non Moses ran avo huri be God vi vora nora Ratahigi lavoa vai votu gubwen̄in Jon,

¹⁴i be gim doron be giv binihimwasigi nora avoana, Jon haḡea kea Elaija, gabe non maiana Ravrava Sabuga nu vev daua.

¹⁵Be ihei bwerona abena, na ron̄oe!

¹⁶“Nav dovon̄ai alen̄ara ata lol gubwen̄ garigi alun hano? Kera gea kun gabe naturirigi ram do lol tanon volvoligi, tatan̄an vwate mwa ulo lalai tatan̄an dolua, mwa bevea be,

¹⁷‘Gam uv buabava huri lagiana, take gim hav savwogoro tehe. I gam lol iboin tavtavigi, take gim hav dei tehe!’

¹⁸La mahavana be Jon nu mai, nu garagara vwavwa, i nu hav mwin te waen. Take sinombu ram bevea be vui hantai alolona.

¹⁹Take inau Nitun Atatu na mai, i nam ḡan i na mwinmwin. Haḡe atatu duluai ram bevea be, ‘Gin gitae! Kea mwasin atat gangan i mwinmwin gaivua, i mwa bora buluana nora harahara homu i ira vev duli!’ Take mataisao non God mwa lol bisirai non mwasigi gin vwain non lalaḡova.”

²⁰Jisas mwa dau bwatuna mwa av wasigi lalai sinombu la vanua duluai be nu lol lalaḡova muramura ivusi aia, bwatuna ram hav binihi te leahi nin vurora,

²¹mwa bevea be, “E, kimiu ata Korasin, nam hagav maragai kimiu! I kimiu mulei ata Betsaeda, nam hagav maragai kimiu. Huri be lalaḡova muramura be nan lolira lol tanomiu daga be atatu vwate si lolia kunia la vanuara Taea mai Saidon, tuai mau sinombu aia ras sagasagai gav buburasiga, i rai bwasa rebehira gin taniavu, huri be men lol seserainia be ram binihileahi nin vurora.

²²Nam bevea lalai kimiu be lol gubwen̄ vevegi God vi hagav maragai sinombu la vanua Taea mai Saidon liu nin kimiu.

²³I kimiu mulei ata Kapanium! Gin doron be giv hagai kimiu sibomiu vai lol ute atamare. Ta vi vohai kimiu vai lol mateana! Huri be lalaḡova muramura be non lolira la vanuamiu daga be atatu vwate si lolia kunia lol Sodom tuai, kunia Sodom si to radu garigi.

²⁴Nam bevea lalai kimiu be lol gubwen̄ vevegi God vi hagav maragai sinombu ata Sodom liu nin kimiu!”

²⁵Lol mahavana gea Jisas mwa bevea be, “Tata, giḡo Ratahigi ḡoro ute atamare i lol ureure, nam avkari maragainigo, bwatuna gon lol bisirai lalainira bwaḡele hano gon tahulinia nin ira mataisao.

²⁶Mwasigi, Tata, geki halana gon doron be vi loli haḡea kunia.

²⁷“Tamaḡu nu lai ginau duluai lalaiau. Atatu vwate mwa hav ilo te Nitui, take Tata n̄an. Haḡe atatu vwate mwa hav ilo te Tata, take Nitui n̄an, i irahei Nitui mwa doron be vi lol bisirainia lalainira.

²⁸“Kimiu duluai be gim lol rovoga hahavwani, i gim datal ginau marahi, giv mai huriau, i nav lai mambuana lalai kimiu.

²⁹Giv haḡo lua noḡu gai tatauleo vai la isibwamiu, i giv huhui ginau niniau, bwatuna inau nam maḡemu i nam do tirigi lol binihiva. I giv habwe mabuana.

³⁰Huri gai tatauleo be nav laia lalai kimiu nu maron̄ron̄o, i marahin hano nav taua alumiu nu mamara.”