Read Hano Matiu 13 Bible Online

Matiu 13 - Hano bible

Matiu 13

¹Lol gubwen̄ n̄an kea Jisas mwa bwihavare, mwa ban vai la balsin numbu, i aia mwa do mahuri, mwa bagahi.

²Sinombu ivusi maragai ram ḡoḡo dalisia. Bwatuna kera ivusi, Jisas mwa ḡalo la waḡa mwa do mahuri, i sinombu ram du aute.

³Mwa bev ginau ivusi lalainira gin avoan dalogai. Mwa bevea be, “Atatu vwate mwa bano be men gaburai biri lolo ara.

⁴La mahavana be mwa ḡaburainia, rituai ram hovi la hala i manu ram mai, ram ḡan bebegainia.

⁵I rituai ram hovi lol tanogin vatu, gabe tano tirigi aia. Haḡe mwa sisiu hae, take tano nu manevnevi.

⁶Kunia mahavana alo mwa hahavwani, mwa ḡoru darihou, bwatuna be garona mwa hav hiv te hivhivo.

⁷Rituai ram hovi lol ḡauli. I ḡauli mwa bivihi haravuinira.

⁸Take biri rituai ram hovi lol mwasin tano, ram bwaevwae. Rituai mwa bwavwae vwaina vudolua, rituai n̄avul gaiono, i rituai n̄avul gaitolu.”

⁹Haḡe Jisas mwa bevea be, “Be ihei bwerona abena, na ron̄oe.”

¹⁰Haḡe roron̄tai non Jisas ram mai, ram hudalinia be, “Huri hano gom avo tagaro lalainira gin avoan dalogai?”

¹¹Haḡe kea mwa avkorora be, “Mwa hogoi lalai kimiu be gimen ilo ginau ririhai huri Ute Lavoa atamare, take mwa hav hogoi tehe lalainira.

¹²Ihei non ginau abena huba, vi lai lalainia amare liu nin non doroniva. Take ihei nona sigai, vi lai dagai havanau tirigi gabe nona huba.

¹³Bwatuna higea nam avo gin avoan dalogai lalainira, huri be ram ḡitae, ta ram hav gita te batoia, ram ron̄oe, ta ram hav ron̄ te batoia.

¹⁴Haḡe kunia avoan vevsera non Aesaia mwa bisirai alura: ‘Giv roron̄tai ba roron̄tai, take gisav ron̄ te batoia; giv gitae ba ḡitae, take gisav gita te batoia,

¹⁵bwatuna binihira mwa bwatoa, i bwerora nu vono, i ran bul matara. Bere ram ḡita dum gin matara, i ram ron̄ dum gin bwerora, bereva ram ḡita batoia, i ram garere huriau, God mwa bevea, i nav varahura.’

¹⁶Take huri kimiu, gim ron̄ mwandavuha! Bwatuna matamiu mwa ḡita batoia, i bweromiu mwa ron̄ batoia!

¹⁷Nam bev mwasigi lalai kimiu be ira atatun vevsera i ira atat vavtutu ivusi ran doron maragai be rav gita ginau be gim ḡitae, take ram hav gitae tehe, be rav ron̄ hano gim ron̄oe, take ram hav ron̄oe tehe.

¹⁸“Giv roron̄tai tavuha binihiva huri avoan dalogai huri wani gabe mwa ḡaburai biri.

¹⁹Kera gabe ram ron̄ avoana huri be God vi vora Ratahigi lavoa ḡoro atatu duluai, take ram hav ilo te binihiva huria, ram ḡun biri be nu hovi la hala. Vui hantai vi mai, vi rais dagai hano nu gaburaiana alolora.

²⁰Take biri gabe mwa hovi lol tanogin vatu gabe tano tirigi aluna, mwa du hurira hei ram lai avoana gin samsamwara lol mahavana be ram ron̄oe.

²¹Take avoana mwa hav garoga tehe alolora. Ram davuha mahavana vwelvwele. I la mahavana be ram habwe kalkaliana sa mwa lol bonogainira bwatuna avoana, ram hovi darihou.

²²Biri gabe mwa hovi lol ḡauli, nu ḡun atatu gabe mwa ron̄ avoana, take kalkalianan ureure i doroniva non rosomiu mwa haravui avoana tavuha be nu ron̄oe, i mwa hav vwae tehe.

²³Biri gabe mwa hovi lol mwasin tano, mwa du huri irahei gabe ram ron̄ batoia. Ram bwaevwae, rituai mwasina vudolua, rituai n̄avul gaiono, i rituai n̄avul gaitolu.”

²⁴Jisas mwa bev avoan dalogai vwate mulei, mwa bevea be, “Hala huri Ute Lavoa atamare vi kun geki. Atatu vwate mwa riv biri tavuha lol bilan ute lolo ara.

²⁵Lol mahavana vwate bon̄i atatu n̄oto ram maturu, non ivwalu vwate mwa mai mwa ḡaburai birin urute alolon koni, haḡe mwa romaragai.

²⁶Mahavana be birin koni mwa databwahu, mwa n̄an̄ava, vava mwa mwasiga, ram ḡitae take birin urute mwa databwahu, mwa mauri bultai mai koni.

²⁷Haḡe non atatun rovoga ram mai abena, ram bevea lalainia be, ‘Ratahigi, gon riv biri tavuha lol bilam ute lolo ara. Take urute ram mai behe?’

²⁸Haḡe mwa bwaliura be, ‘Noḡu ivwalu mwa lol ute kunia lalaiau.’ Haḡe non atatun rovoga ram bevea lalainia be, ‘Kun hanigi? Gom mahin̄a be gamen van be lua kaburai urute?’

²⁹Take mwa bwaliura be, ‘Awi sigai. Bwatuna be, bereva gim dan̄ koni mulei huri be ramuru mauri bulu huba.

³⁰Giv lin̄ koni mai urute raru vi mauri haragaituvwa vai votu harahara vi mai. Haḡe nai vevea lalai atatun rovoga baten harahara be rav hara urute amua ba bohainia utegaituvwa huri be vi vohaiana lol gabi. Vuvuri rav n̄ari koni vai utegaituvwa ba daura lolon imwa.’ ”

³¹Jisas mwa bev avoan dalogai vwate mulei lalainira sinombu be, “Ute Lavoa atamare kun geki. Atatu vwate mwa lai birin ramute i mwa ḡaburainia lol bilan umwa.

³²Take mahavana be mwa mauri, mwa ḡaivuaga liu nin vataha gai duluai, i manu ram mai ram dau inogira alun rarana.”

³³Haḡe Jisas mwa bev avoan dalogai vwate mulei, mwa bevea be, “Ute Lavoa atamare kun geki. Vavine vwate mwa lai is i mwa haḡo roiroia mai vulaoa lol dis gaivua. Haḡe is gea mwa lol vulaoa mwa buge.”

³⁴Mahavana Jisas mwa avo alun ginau duluai geki lalai sinombu, mwa avo gin avoan dalogai. Si hav avo te dagai nin avoan dalogai lalainira.

³⁵Ginau geki mwa lol seserai avoana non atatun vevsera be nu vevea tuai be: “God nu vevea kungeki be, ‘Nav avo n̄an gin avoan dalogai lalainira. Nai vev lua ginau dahuligi ata la bwatun tauva.’ ”

³⁶Haḡe Jisas mwa derai sinombu, mwa dalin̄oro lol imwa vwate. Haḡe non roron̄tai ram mai abena, ram bevea be, “Gam doron maragai be goi vev binihiva ata lol avoan dalogai huri urute.”

³⁷Haḡe Jisas mwa bwaliura be, “Wani gabe mwa riv biri tavuha kea haḡe Nitun Atatu.

³⁸Ute lolo ara kea haḡea sinombu gabe ram dabe God be kea Ratahigi ḡorora. Ta urute kera haḡea atat non Vui Hantai.

³⁹Ivwalu gabe nu riv urute kea haḡea Vui Hantai. Mahavan harahara kea haḡea nogonan gubwen̄, i atatun rovoga be ram hara koni kera ira enjel.

⁴⁰Kun urute vi haraḡoana i vi vohaiana vai lol gabi, kunia mulei vi loli la nogonan gubwen̄.

⁴¹Inau Nitun Atatu nav hora noḡu enjel rav lai luara duluai gabe ram hav tabeau tehe kun nora Ratahigi, kera gabe ram lol atatu ram buroga, i kera gabe ram lalaḡo hantai,

⁴²i rav vohainira lol gabi memea, i aia rav dei i rav gas livora.

⁴³Haḡe vuvuri sinombu non God rav gigita kun alo lol rahuan gara gabe Tamara mwa ratahigi alolona. Be ihei bwerona abena, na ron̄oe.”

⁴⁴“Ute Lavoa atamare kun geki. Atatu vwate mwa habwe ginau tavuha gabe nu tahuliana lol tano. Mwa haḡoi ḡoro muleinia, mwa ban dagai gin samsamwara, mwa salei non viloḡoana duluai, mwa dabagilu mulei i mwa bol lua tano gea.”

⁴⁵“Haḡe mulei, Ute Lavoa atamare kun geki. Atatu mwa hiḡe raumatan vatu be men volira,

⁴⁶i la mahavana be mwa habwe vwate gabe nu tavuha maragai, mwa dabagilu mulei, mwa salei non viloḡoana duluai, haḡe mwa siv vol raumatan vatu gea.”

⁴⁷“I mulei, Ute Lavoa atamare kun geki. Atatun ravrav ige ram dul nora gabe lol numbu gaivua, i ram raraḡo lalan̄an ige.

⁴⁸La mahavana be gabe mwa masiri gin ige, atatuna ram ravae vai aute, i rav to ataa ba hara bora ige duluai. Lalan̄an ige tavuha rav hogonia lol nora gete, ta rav vohai kaburai ige hahantai.

⁴⁹I kunia haḡea vi vora kunia la nogonan gubwen̄. Ira enjel rav mwalue, rav lai lua atatu hantai nin atatu tavuha,

⁵⁰i rai vohai kaburainira vai lol gabi memea. I aia rav dei i rav gan livora.”

⁵¹Haḡe Jisas mwa hudalinira be, “Gim ilo binihiva huri ginau uhu sage sigai?” Haḡe ram dame be, “Uwe, gam iloe.”

⁵²Haḡe mwa bwaliura be, “Geki gin binihiva be vagahin Silo gabe mwa roron̄tai huri Ute Lavoa atamare, kea kun vuigin imwa mwa lai lua ginau i maleiga nin vwavwan imwana.”

⁵³La mahavana be Jisas mwa bev haraharai avoan dalogai duluai, haḡe mwa derai ute aia vai la mwasin vanuana.

⁵⁴I aia mwa bagahi lol nora imwa tataro. I kera duluai be ram ron̄oe ram dan̄an̄a maragai, ram bevea be, “Wani uhu mwa lai non mataisao halabehe? I hanigi huri lalaḡova muramura duluai gabe mwa lolira?

⁵⁵Matu mwa hav vora te kea nitun atatun vohavoha imwa, i ratahina Mere, i ira tuana Semes i Joses, Saemon i Judas?

⁵⁶I ira hogosina ram dogo n̄an teti? Ke kea mwa lai ginau duluai uhu halabehe?”

⁵⁷I kera duluai ram daturai lol binihira huria, i ram barihainia. Haḡe Jisas mwa bevea abera be, “Atatun vevsera mwa binihi marahiana lol ute dodolua, ta la mwasin vanuana i maton ira havana sigai.”

⁵⁸Huribe kea mwa hav lol te dum lalaḡova muramura ivusi aia, bwatuna nora binihimwasigi garagusi sigai.