Read Hano Matiu 14 Bible Online

Matiu 14 - Hano bible

Matiu 14

¹La mahavana gea roroi huri Jisas mwa botu aben lavoa Herod.

²Haḡe mwa bevea lalainira non tomuai be, “Kea Jon Garuhisabuga, mwa domare mulei nin mateana. Bwatuna higea non muramura abena be mwa lol lalaḡova lalavoa kunia.”

³Tuan Herod vwate ihana Vilip. Vilip mwa lagi mai vavine vwate ihana Herodias. Borabe vain̄ava lavoa Herod mwa surai vavine gea, mwa bora tasalana. Haḡe Jon mwa ḡitae, mwa bevea lalai Herod be, “Ginau gea gom lolia nu hav vavtutu tehe be gom surai tasalan tuamwa.” Bwatuna ute uhu Herod mwa hora non atatu be rav haḡo batugehi Jon, ba bauhia ba daua lol imwa vauvauhi.

⁵Herod mwa doron be vi wehi Jon. Itake mwa matagun sinombu, bwatuna be sinombu ram binihimwasigi be Jon kea atatun vevsera vwate.

⁶Haḡe gubwen̄ vorana non Herod mwa bulbulu. La mahavana gea nitun Herodias mwa savwogoro lol matara sinombu ram ḡoḡo aia. Herod mwa ḡitae, mwa samsamwara huria.

⁷Haḡe mwa lol tatauleo wasi vwate lolmatan sinombu lalai daulato, mwa bevea be, “Be gov doron havanau tehe be kun hanigi, nav laia lalainigo kekadogaha.”

⁸Haḡe daulato uhu mwa bano mwa hudali ratahina, haḡe ratahina mwa bevea be, “Goi vano goi vevea be ‘Nam doron bwatun Jon Garuhisabuga alolon dis vwate.’ ”

⁹La mahavana be Herod mwa ron̄oe mwa ron̄ mwahantai maragai huria. Itake si hav dumwi tehe, bwatuna be nu tatauleo wasi huba la lolmatara non buluana be ram dogo bul maia. I mwa dau avoana be vi vora kunia haḡea hurin doroniva non vavine.

¹⁰Haḡe mwa hora non atatun bwaloana vwate be vi van vi tav n̄andu mwagoron Jon Garuhisabuga lol imwa vauvauhi.

¹¹Haḡe atatun bwaloana gea mwa lol kunia, i mwa lai bwatuna lol dis vwate vai aben vavine gea, i mwa laia lalai ratahina.

¹²Haḡe roron̄tai non Jon ram ron̄oe, ram mai ram lai rebehina, ram davinia. I ram bev roroi huria lalai Jisas.

¹³La mahavana be Jisas mwa ron̄ roroi huri Jon, mwa ḡalo la botu vwate, mwa bano vai lol ute be atatu sigai aia. Haḡe sinombu ram ron̄oe, ram mwalue nin vanuara, ram lago aute, ram ban huri ute be Jisas mwa bano aia.

¹⁴La mahavana be Jisas mwa hae aute, mwa ḡita sinombu, i mwa hagavira, i mwa lol barahu ira harova abera.

¹⁵La mahavana be mwa abena gin ute ravravi, non roron̄tai ram mai abena, ram bevea be, “Ute geki ute vuroi, ginaganiana sigai teti. I mulei mwa abena gin ute bon̄i. Nu tavuha be gov hora dagainira, be rai vano ba lol gara ginau lol vanua.”

¹⁶Haḡe Jisas mwa bwaliura be, “Mwa hav tu tehe be tav hora dagainira. Nu tavuha be kimiu giv lai ginaganiana lalainira.”

¹⁷Haḡe ram bwaliu Jisas be, “Kamai gam haḡo bereti gailima mai ige gairua n̄ano.”

¹⁸Haḡe Jisas mwa bevea be, “Giv laira vai mai abeku.”

¹⁹Haḡe mwa bevea lalai sinombu be rav to ata lol bwatmwanea. Haḡe mwa lai bereti gailima gea mai ige gairua, mwa dada vai amare, mwa lai avoan avkari hurira lalai God. Haḡe mwa biha borara, mwa laira lalai non roron̄tai, i non roron̄tai ram laira lalai sinombu.

²⁰Haḡe sinombu duluai ran gani vava ram ḡubwa. Ataguna roron̄tai non Jisas ram haraḡoḡo mamarahan ginaganiana gabe dorena be ran hav gan te vuvuria, ram hogon bamasiri gete han̄vul domwan gairua.

²¹Kera duluai gabe ran gania atamwani vasan̄vul valima, ran hav vului te vavine mai naturirigi.

²²Jisas mwa hora non roron̄tai be rai van dotomua la botu vai haltavalun numbu gaivua, i mwa hora dagai sinombu mulei.

²³Ataguna be Jisas mwa hora sinombu vai la vanuara, mwa hae vai la vusi be men tataro. Ute nu ravravi huba, Jisas mwa dogo aia la vusi gahena.

²⁴Kadogaha botu mwa do bora sinen numbu gaivua, hautu nin vwavwanhao. Lan̄i mwa here wasi, i navo lalavoa ram bohai daltali botu.

²⁵Mahavana bwatun tahi mwa magorosi mabon̄ gaituvwa, Jisas mwa lago la ulun wai mwa mai be vi votuinira non roron̄tai.

²⁶Batena ram ḡitae be mwa lago la ulun wai mwa mai, ram matagu maragai i huira mwa ruru. Ram bevea be, “Atmate vwate kahaḡa,” i ram haharigi gin mataguana.

²⁷Ta darihou Jisas mwa avo lalainira be, “Gisav matagu tehe. Inau siboku.”

²⁸Haḡe Pita mwa av lua, mwa bevea be, “Ratahigi, be giḡo mwasigi, goi vevea lalaiau huri be namen lago la ulun wai ba mat hurigo.”

²⁹Jisas mwa bwaliua be, “Mai teti!” Pita mwa hiv mahuri nin botu, mwa lago la ulun wai, mwa ban huri Jisas.

³⁰Ta mahavana Pita mwa ron̄ silon lan̄i mwa dumwi maragai, i rebu lalavoa, mwa matagu, i mwa bavora mwa mwinu, i mwa haharigi mwa bevea be, “Ratahigi, varahuau!”

³¹Jisas mwa rarau vilvilehi mwa haḡo Pita la limana, mwa bevea be, “Giḡo, nom binihimwasigi garagusi tirigi maragai! Huri hano nom binihimwasigi mwa lalan̄aga?”

³²Vuvuri ramuru ḡalo mulei la botu, i lan̄i mwa mahuri.

³³Ira roron̄tai lol botu ram ḡogonai Jisas, ram bevea be, “Mwasigi, giḡo Nitun God!”

³⁴Ram ban tuhi numbu gaivua gea vai tavaluna, mwa uloi ute gea be Kenasaret.

³⁵Mahavana be sinombu lol ute gea ram ḡita Jisas, ram hora huri ira harova dalis vanua gea, i ram laira vai aben Jisas.

³⁶Ram hudali Jisas be vi mahin̄a dumwi be ira harova rav mai ba sibweri ḡereḡeren gaisagana. I harova duluai ram sibweri gaisagana, ram rahu mulei.