Read Hano Matiu 19 Bible Online

Matiu 19 - Hano bible

Matiu 19

¹La mahavana be Jisas mwa bevuri vuvuri, mwa derai Kalili, mwa bano vai lol udun vanua Judia haltavalun wai Jodan.

²Sinombu ivusi ram huria, i mwa lol barahura aia.

³Ira Varise rituai ram mai vai abena be ramen lol ron̄oe gin avoan hudaligi rituai. Haḡe ram bevea be, “Kun hanigi? Be atatu vi vev dagara tasalana huri havanau tehe, nu vavtutu hurin Silo sa sigai?”

⁴Haḡe Jisas mwa bwaliura be, “Daga gim hav vasogo te ute lol Ravrava Sabuga gabe mwa bevea be, la bwatun tauva God nu tau atatu, atamwan i vavine.

⁵Vuvuri God mwa bevea be, ‘Bwatuna gea, atamwan mwa lin̄ tamana mai ratahina, i mwa bul mai tasalana, haḡe ramuru bora rebehi gaituvwa.’

⁶I kunia, ramuru hav mom bora te rebehi gairua, take gaituvwa. Bwatuna gea, atatu si hav hara te bora hano gabe God mwa harabultainia huba.”

⁷Haḡe ira Varise ram hudalinia be, “Be kunia, huri hano be Moses nu tau silo be, atatu vi lai pepa huri vev dagara tasalana, haḡe vi vev dagara dumwia?”

⁸Haḡe Jisas mwa bwaliura be, “Moses mwa mahin̄a be giv vev dagara dum tasalamiu, bwatuna be bwatumiu nu wasi maragai. Take nu hav vora te kunia la bwatun tauva.

⁹Nam bev mwasigi lalai kimiu be ihei tehe be tasalana mwa hav vahala tehe i kea mwa bev dagarae i mwa lagi mai vavine dolua, wani gea mwa lol bwatigoro.”

¹⁰Haḡe non roron̄tai ram bevea lalainia be, “Be silon lagiana nu wasi kunia, nu hav tavuha tehe be atatu vi lagi.”

¹¹Take Jisas mwa bwaliura be, “Noḡu avoan vagahi uhu mwa hav dum te lalai atatu n̄oto, take lalai irahei n̄an gabe God mwa hogoinia lalainira.

¹²Ginau dodolua rituai ram du ḡoro atatu rituai be kera rasav lagi te dum. Rituai ram hav lagi tehe bwatuna be la mahavana gabe ram vora mai, ta nu tau rebehira haḡea kunia. I rituai bwatuna be atatu ram lol hantainira. I rituai ram hav lagi tehe huribe Ute Lavoa atamare. Ihei vi lai dum avoana geki, vi laia.”

¹³Atatu rituai ram mai mai naturirigi vai aben Jisas be men tau limana alura i vi vatavuhainira. Ta non roron̄tai ram avo wasi lalainira be ramen tu ḡorora.

¹⁴Haḡe Jisas mwa bevea be, “Giv lin̄ naturirigi ba rav mai huriau, gisav tu te ḡorora. Bwatuna Ute atamare nu vora non kera kun geki.”

¹⁵Haḡe Jisas mwa dau limana alura, mwa siv derainira.

¹⁶Lol gubwen̄ vwate, atatu vwate mwa mai vai aben Jisas, mwa hudalinia be, “Vagahi, nav lol hava rovoga tavuha huri be nav haḡo dum rahuana vai tuai?”

¹⁷Haḡe Jisas mwa bwaliua be, “Huri hano gom hudaliau huri havanau be nu tavuha? Wani n̄an gaituvwa be nu tavuha. Be gom doron be gov lai dum rahuana gea, gov ḡoḡoi ḡoro leo horai non God duluai.”

¹⁸Haḡe wani gea mwa bwaliu Jisas be, “Hava leo horai?” Haḡe Jisas mwa bwaliua be, “Gosav wehi te atatu. Gosav surai te vavine. Gosav surasura tehe. Gosav tul te bonogai.

¹⁹Gov vinihi marahi tamamwa mai ratahimwa. I gov tabe atatu duluai kunia gabe gom dabego sibomwa.”

²⁰Haḡe mwalaḡelo gea mwa bwaliu Jisas be, “Leo horai kera gea nam lol hurinira duluai. Hano te mulei be nam hav lolia te radu?”

²¹Haḡe Jisas mwa bevea lalainia be, “Be gom doron be gov to vavtutu rahurahu, vano ba salei nom viloḡoana, i gov lai homuna lalai ira hiru. Kunia, gov lai rosomwa lol ute atamare. Vuvuri gov mai ba huriau.”

²²Haḡe mahavana gabe mwalaḡelo gea mwa ron̄ vuvuri avoana non Jisas, mwa ban dagai gin ron̄ mwahantai, bwatuna gabe rosona gaivua maragai.

²³Haḡe Jisas mwa bevea lalai non roron̄tai be, “Nam bev mwasigi lalai kimiu be, vi ririhai maragai huri atat rosoga be vi haroro dum lol Ute Lavoa atamare.

²⁴I nam bevea mulei lalai kimiu be, nu ririhai be kamel vi bwihi dum la halan tereti ata la nidil, i nu ririhai liu huri atat rosoga be vi haroro dum lol rahuana gara.”

²⁵La mahavana be non roron̄tai ram ron̄ non avoana ram dan̄an̄a maragai. Haḡe ram bevea be, “Ihei vi rahu dumwi?”

²⁶Haḡe Jisas mwa ḡita bohavohara, mwa bevea lalainira be, “Ginau geki atatu si hav lol te dum wai, itake God n̄an vi lol dumwia.”

²⁷Haḡe Pita mwa av lua, mwa bevea be, “Gita, kamai gam lin̄ nomai vataha ginau, i gam hurigo. Hano vi ḡauhi kamai huria?”

²⁸Haḡe Jisas mwa bevea lalainira be, “Nam bev mwasigi lalai kimiu be, la mahavana rahuana gara uhu vi mai, inau Nitun Atatu nav togo la tanoḡu sarisari, gabe tanon lavoa, la mahavana gea, kimiu han̄vulu domwan gairua gabe gim huriau, kimiu mulei giv togo alun tanomiu gabe tanon lavoa, giv ratahigi ḡoro vara n̄avul gaituvwa domwan gairua ira Jius.

²⁹I mulei kera gabe ram derai imwara, sa ira tuara, sa ira hogosira, sa ira tamara sa ira ratahira, sa ira nitura, sa ira bilara talu huriau, kera gea rav lai liu vavudolua. I rav haḡo rahuana vai tuai.

³⁰I kera ivusi gabe ram domua, rai vora tatagui, i kera tatagui, rav vora tomuai.