Read Hano Matiu 21 Bible Online

Matiu 21 - Hano bible

Matiu 21

¹Batena Jisas mai non roron̄tai ram mai sosori Jerusalem, ram botu vanua Betvej la vusin gai Oliv. Haḡe Jisas mwa hora dotomua non roron̄tai gairua,

²mwa bevea be, “Giru vi vano vai la vanua mwa do vavtutu ban aia, i giru vi habwe darihou don̄ki vwate be ran vagohainia mwa eno mai nituna. I giru vi tugura ba laira vai abeku.

³Be ihei vi avo mai kimiru, giru vi vevea lalainia be, ‘Nomaru Ratahigi mwa doronira.’ Haḡe vi lin̄ darihoinira.”

⁴Ginau uhu mwa bisirai be men lol seserai avoana non atatun vevsera be nu vevea tuai be:

⁵“Giv vevea lalainira ata Saion be, ‘Giv gitae! Nomiu Ratahigi lavoa mwa mai huri kimiu. Kea mwa binihi maḡemuinia, mwa lago alun don̄ki, alun bwaloi don̄ki.’ ”

⁶I roron̄tai gairua uhu ramuru bano, ramuru lol hano be Jisas nu vevea lalainira,

⁷ramuru lai don̄ki gea mai nituna, i ramuru lelei gaisagara la ulun gatigun don̄ki gea, i Jisas mwa dogo amare aluna.

⁸Sinombu ivusi ram lelei gaisagara la hala, i rituai ram dai raran gai, ram bohainira la hala.

⁹Sinombu be ram domuainia i sinombu gabe ram du ataguna ram haharigi be, “Uloi roron Nitun Deved! God na vatavuhainia gabe mwa mai la ihana! Uloi roron God mwa do amare!”

¹⁰La mahavana be Jisas mwa dalin̄oro Jerusalem, vanua bwatutuga duluai ram daburi, ram hudali be, “Ihei uhu?”

¹¹Haḡe sinombu be ram hae bulu ram bwaliura be, “Geki haḡea Jisas, atatun vevsera ata Nasaret nin vanua Kalili.”

¹²Haḡe Jisas mwa dalin̄oro lol Imwa Tataro. Mwa ḡoro luara ram lealeahi i ram bolvoli alolona, i mwa dul burigai nora tebol gabe ram du ram lealeahi homu, i mwa bohai kakaburai nora tanon togotogo gabe ram du ram salei manbona.

¹³Haḡe mwa bevea be, “God mwa bevea lol Ravrava Sabuga be, ‘Imwaḡu vi uloiana gi Imwa huri Tataro,’ itake kimiu gim lolia gi imwan atat surasura.”

¹⁴Ira matagara i kera gabe bwalagera ran hantai ram mai vai aben Jisas lol Imwa Tataro, i mwa lol barahura.

¹⁵Ira muai tataroi maira vagahin Silo ram ḡita ginau dan̄an̄a gabe Jisas mwa lolira, i ram ron̄ naturirigi ram haharigi lol Imwa Tataro be, “Uloi roron Nitun Deved!” Haḡe lolora mwa horoinia,

¹⁶ram hudali Jisas be, “Gom ron̄ hano ram bevea?” Haḡe Jisas mwa bwaliura be, “Uwe, nam ron̄oe. Matu gim hav vasogo te Ravrava Sabuga be mwa bevea be, ‘Gon vagahi ira naturirigi lalavoa maira la huhu be rav uloi roroainigo’?”

¹⁷Haḡe Jisas mwa derainira, mwa mwalue nin Jerusalem, mwa ban vai Betani, i aia mwa maturu.

¹⁸Mwa rani mabon̄ gaituvwa, Jisas mwa dabagilu mulei vai Jerusalem. La mahavana be mwa mai la hala maro mwa ḡasia.

¹⁹I mwa ḡita gai vik aben hala. Haḡe Jisas mwa ban vai aben gai vik gea be men hiḡe ron̄ mwasina, take mwasina sigai, rauna n̄an. Haḡe Jisas mwa bevea lalai gai vik be, “Gosav mom bwae tehe!” Haḡe gai vik gea mwa ḡoru darihou.

²⁰Non roron̄tai ram ḡitae, ram dan̄an̄a maragai. Haḡe ram hudalinia be, “Huri hano be gai vik gea mwa ḡoru vilvilehi kunia?”

²¹Haḡe Jisas mwa bwaliura be, “Nam bev mwasigi lalai kimiu be, be nomiu binihimwasigi si wasi, i si hav vinihi te gairuruai, gis lol dum ginau kunia gabe nan lolia lalai gai vik gea. I mulei gis vev dumwia lalai vusi geki be, ‘Tomare ba bohainigo lol tahi,’ i vi vora kunia.

²²Be kimiu gim binihimwasigi alun God, havanau tehe be gim navohia lol nomiu tataro, vi laia lalai kimiu.”

²³Jisas mwa dabagilu mulei vai lol Imwa Tataro, i mwa bagahi. Haḡe ira muai tataroi maira bwatmetua ira Jius ram mai vai abena, ram hudalinia be, “Gom lai hava roron̄o be gomen lol ginau kera geki? Ihei mwa laia lalainigo?”

²⁴Haḡe Jisas mwa bwaliura be, “Inau mulei nav hudali kimiu huri ginau gaituvwa. Be giv vwaliu dumwia, haḡe inau mulei nai vev luae lalai kimiu hava roron̄o nam laia be nav lol ginau kera geki.

²⁵Jon nu lai non roron̄o huri garuhisabuga halabehe? Nin God sa nin atatu?” Haḡe ira lalavoa duluai gea ram biavoavo maginira, ram bevea be, “Be tai vevea be garuhisabuga non Jon mwa mai nin God, kea vi vevea be, ‘Huri hano gim hav vinihi te mwasiginia?’

²⁶Sa be tai vevea be mwa mai nin atatu n̄an, gida tam matagun sinombu, bwatuna be kera duluai ram bevea be Jon kea atatun vevsera vwate.”

²⁷Haḡe ram bwaliu Jisas be, “Gam len̄a.” Haḡe Jisas mwa bevea lalainira be, “Be kunia, inau mulei nasav vevea tehe be nam lai roron̄o be namen lol ginau kera geki halabehe.

²⁸“Haḡe kimiu gim binihi haninia? Atatu vwate nituna gairua. Gubwen̄ vwate mwa bevea lalai tuagai be, ‘Tari, garigi goi van ba lol rovoga lol bilaku ute loloara.’

²⁹Haḡe nituna mwa bwaliua be, ‘Nam barihai.’ Itake ataguna mwa leahi binihina, i mwa bano.

³⁰Haḡe tamara mwa ban aben gairuan nituna, mwa bev muleinia kunia lalainia. Haḡe nituna mwa bwaliua be, ‘Nu tavuha, tata.’ Itake atagu mwa hav vano tehe.

³¹Ihei ninira gairua uhu be nu lol hurin avoana non tamana?” Haḡe ram bwaliua be, “Tuagai.” Haḡe Jisas mwa bevea lalainira be, “Nam bev mwasigi lalai kimiu, be ira harahara homu maira vavin harahara homu kera haḡe gea rav haroro amua lol rahuan gara gabe God mwa ratahigi alolona, kimiu atagu.

³²Bwatuna Jon Garuhisabuga nu mai mwa bagahi kimiu gin matanhala tavuha be giv huria, itake gim hav binihi te mwasiginia. Ta ira harahara homu maira vavin rovrovoi homu kera ram binihimwasiginia. Kimiu gin gitae, take gim hav binihi te dori huria, be gimen binihimwasiginia.”

³³Haḡe Jisas mwa bevea lalainira be, “Giv ron̄ mulei avoan dalogai vwate. Vuigin talu vwate mwa riv taligaon waen lol taluna, mwa lol ara dalisia, mwa ḡel lulu vwate huri be vi lol vwain gao vi mai gi waen, i mwa lol imwa holomare vwate huri matmatai ḡoro. Haḡe vuigin talu mwa mahin̄ai talu lalai ira gitaḡoro rituai be rav lol rovoga alolona ba lai ududui lalainia, mwa derai vanuana, mwa ban dagai.

³⁴La mahavana be vwain gaon taligaon waen mwa metue, vuigin talu gea mwa hora non turin rovoga vai abera ira gitaḡoro huri be rav bete ududuna lalainira huria.

³⁵La mahavana be kera gea ram ḡita non turin rovoga, ram wehi vwate, ram wehi bamate vwate, i ram boha vwate gin vatu.

³⁶Haḡe vuigin talu gea mwa hora mulei non turin rovoga rituai liu nin amua. Ram lolira kunira amua.

³⁷Haḡe nogonana vuigin talu gea mwa hora mwasin nituna vai abera gea, mwa bevea sibona be, ‘Nam bev mwasigi, kera rav gita nituku, rai vinihi marahinia.’

³⁸Itake la mahavana be ira gitaḡoro ram ḡita nituna, ram bevea ginira be, ‘Geki mwasin nituna. Tan wehia, i tav lai non talu!’

³⁹Haḡe ram haḡo batugehia, ram lai dagainia nin tano gea, vuvuri ram wehi bamatea.”

⁴⁰Haḡe Jisas mwa hudalinira be, “La mahavana be vuigin talu vi mai, vi lol hano lalainira gabe ram ḡita ḡoro non tano?”

⁴¹Ram bwaliua be, “Kea vi wehi bamate ira atat hantai gea, i ataguna vi lai non talu lalai ira gitaḡoro dodolua, huri be lol mahavana be gao gea vi metue ita rav lai dum uduna lalainia.”

⁴²Haḡe Jisas mwa bevea lalainira be, “Matu gim hav vasogo tehe lol Ravrava Sabuga be mwa bevea be, ‘Gai mahan̄an imwa gabe kera ran vohai kaburainia kadogaha mwa bora mwasin gain imwa. Ginau gea Ratahigi sibona nu lolia, ginau dan̄an̄a la lolmatamai!’

⁴³“Bwatuna gea, nam bevea lalai kimiu be God vi lai dagai nin kimiu rahuan gara gabe kea mwa ratahigi alolona, i vi laia lalainira gabe rav vwae mwasin vwaina.

⁴⁴I gai mahan̄a gea be ihei vi hovi aluna vi wahai n̄andun̄andu rebehina, sa be si hovi alun atatu vwate, si momogai veroveroinia.”

⁴⁵Ira muai tataroi maira Varise ram ron̄ avoan dalogai kera uhu be Jisas mwa bevea, ram iloe sibora be mwa bevea hurira.

⁴⁶I ram lol ron̄oe be rav vwirihi Jisas. Take ram matagun sinombu be ram bevea be, Jisas kea atatun vevsera vwate.