Read Hano Matiu 23 Bible Online

Matiu 23 - Hano bible

Matiu 23

¹Haḡe Jisas mwa bevea lalainira sinombu maira non roron̄tai be,

²“Ira vagahin Silo maira Varise kera mahaḡea mwa du be rai vev lua binihiva ata lol Silo non Moses.

³Huri ginau geki, giv ron̄oe i giv lol hurinia be ram bevea lalai kimiu be giv lolia. Itake nu hav tavuha tehe be giv huri alen̄ara, huri be kera ram bev ginau kera gea, ita kera sibora ram hav lol te hurinia.

⁴Ram bauhi ginau marahi i ram daua la gatigun sinombu. Take ram hav lol te ginau gaituvwa be ramen bului atatu ba datal ginau marahi gea.

⁵Ginau gabe ram lolia, ram lolia n̄an be atatu ramen gitara. Gim ḡita tan̄ vavagaha huri udun Ravrava Sabuga gabe ram bauhia la rera i la limara be lalavoa maragai. I gim ḡita ḡereḡeren gaisagara be n̄an̄ava maragai.

⁶Kera uhu ram doron maragai be lol ginaganiana lalavoa rav togo la tanon togotogo haehae, i lol imwa tataro ram doron muan tanon togotogo.

⁷Ram doron be atatu rav viginago ginira lol ute bulbulu i rav uloinira be ‘Vagahi.’

⁸Ta kimiu gisav lolia tehe be atatu rav uloi kimiu be ‘Ratahigi’, huri be nomiu Ratahigi gaituvwa n̄an, i kimiu duluai ira huhugaituvwa.

⁹I mulei gisav uloi te ata la ureure geki be ‘Tata’, huri be kimiu duluai Tamamiu gaituvwa n̄an be mwa do lol ute atamare.

¹⁰I mulei gisav lolia tehe be atatu rav uloi kimiu be ‘Vagahi’, huri be nomiu vagahi gaituvwa n̄an, gabe inau, Kraes.

¹¹Ihei lavoa alolomiu vi vora atatun nomiu rovoga.

¹²Ihei gabe mwa lol gaivuainia sibona vi lol bahivoinia, i ihei gabe mwa lol bahivoinia sibona vi lol gaivuainia.

¹³“Hahagavi lalai kimiu, ira vagahin Silo maira Varise! Kimiu ira hoḡoiḡoro! Gim du ḡoro matanhalan Ute Lavoa atamare. Ta kimiu sibomiu gisav haroro tehe lol rahuana gea, i gim lol ḡoro atatu rituai gabe ram doron be rav haroro.

¹⁴“Hahagavi lalai kimiu, ira vagahin Silo maira Varise! Kimiu ira hogoi ḡoro! Gim ḡan bahiru ira bwero aten imwara i gim lol tataro n̄ava be men gitana. Bwatuna geki silo vevegi lalai kimiu vi wasi liu!

¹⁵“Hahagavi lalai kimiu, ira vagahin Silo maira Varise! Kimiu ira hoḡoiḡoro! Gim ban taval tahi i vataha vanua duluai be gimen lai dum atatu gaituvwa huri kimiu. I batena gim lai dumwia, gim lol wani gea mwa dadariha varua nin kimiu be vi haroro lol ute ron̄ ḡagarasi.

¹⁶“Hahagavi lalai kimiu, be gim domuai atatu, ta gim matagaraga! Gim bagahi kungeki be, ‘Atatu mwa av garagara vai alun Imwa Tataro, avoana gea si hav vauhia tehe. Ta be vi av garagara alun vatan̄oga lol Imwa Tataro, avoana gea vi vauhia.’

¹⁷Kimiu ira matagara daltale! Havanau be nu marahi, vatan̄oga sage Imwa Tataro be mwa lol sabugai vatan̄oga gea?

¹⁸I mulei gim bagahi be, ‘Atatu mwa av garagara vai alun olta, avoana gea si hav vauhia tehe. Itake be vi av garagara vai alun hogoi gabe mwa dogo la olta, avoana gea vi vauhia.’

¹⁹Kimiu ira matagara! Havanau be nu marahi, hogoi sage olta be mwa lol sabugai hogoi gea?

²⁰Kunia, ihei gabe mwa av garagara vai alun olta, mwa bev olta i hogoi duluai aluna.

²¹I ihei gabe mwa av garagara vai alun Imwa Tataro, mwa bev Imwa Tataro i God, gabe mwa dogo aia.

²²I ihei mwa av garagara vai alun ute amare, mwa bev tanon togotogon God i God gabe mwa do aluna.

²³“Hahagavi lalai kimiu, ira vagahin Silo maira Varise! Kimiu ira hoḡoiḡoro! La mahavana gim hogoi lalai God gin han̄vulun bilamiu ginau, gim hav binihi te malioi han̄vulun ginau ririgi kun ruḡuruḡu i an̄o, take gim binihi malioi ginau mutai ata lol Silo, kun silo vavtutu i lolohagavi i silo mwasigi. Amua giv lol ginau mutai kera geki, ta gisav tau te dagara ginau ririgi kera geki.

²⁴Kimiu gim domuai atatu ta gim matagaraga! Gim lai dagai han̄ora kokolo gabe ram hovi lol mamiu wai mwinu, take gim dolom duluai buluki gabe mwa dogo lolona!

²⁵“Hahagavi lalai kimiu, ira vagahin Silo maira Varise! Kimiu ira hoḡoiḡoro! Vataha mahavana gim bwaga tagun nomiu laha n̄an mai nomiu beleti. Itake alolona ginau kera gea nu masiri gin ginau gabe gin laira gin tenteneana i surana i bugurana.

²⁶Kimiu ira Varise, gim matagaraga! Muan ginau lalai kimiu giv bwaga lolon nomiu laha. Kunia higea ataguna vi siv melmelo dum.

²⁷“Hahagavi lalai kimiu, ira vagahin Silo maira Varise! Kimiu ira hoḡoiḡoro! Alen̄amiu kun gabe bwarura atatmate be ram ulia gin laem maita i gitanana nu tavuha avare. Itake alolona nu masiri gin hui i bobohan rebehira atatmate.

²⁸Kimiu haḡea kunia. Atatu ram ḡita kimiu halavare be gin vavtutu. Ita alolomiu gin masiri gin tenteneana i silo dahadaha.

²⁹“Hahagavi lalai kimiu, ira vagahin Silo maira Varise! Kimiu ira hoḡoiḡoro! Huri be gim lol bwarura ira atatun vevsera i gim sosori vatun binihi mulei huri ira vavtutu,

³⁰i gim bevea sibomiu be, ‘Be tas to tuai lol gubwen̄in ira tamanda, tasav lol te ginau kunia gabe kera ran lolia, tasav wehi te bonogai ira atatun vevsera.’

³¹Be kunia gim bevea be kimiu haḡea ata la mwasin varara gabe ran wehi ira atatun vevsera tuai.

³²Nu tavuha, gin lol haraharai ginau gabe ira tamamiu ran tau bwatuna tuai.

³³“Kimiu ira teltele i ira nitui teltele! Huri hano gim lol ron̄oe be gimen romaragai nin silo vevegi lol ute ron̄ ḡagarasi?

³⁴Huri ginau gea nam bevea lalai kimiu be nav hora ira atatun vevsera maira mataisao maira vagahi lalai kimiu, i giv wehi rituai, giv voha rituai vai alun volovolo, i giv vivilis rituai lol nomiu imwa tataro, i giv mwaloi rituai nin vanua vai la vanua dolua.

³⁵Huri ginau duluai kera gea, silo vevegi huri mateanan ira vavtutu duluai ata lol ureure geki vi dum kimiu, nu bwativuga alun mateanan Ebol atat vavtutu vai votui mateanan Sakaraia nitun Barakaia, gabe gin wehia lol davolan imwa i tanon tataroi Imwa Tataro.

³⁶Nam bev mwasigi lalai kimiu be, silo vevegi huri mateanara duluai kera geki vi dum kimiu gabe gim rahu garigi.

³⁷“Jerusalem, Jerusalem! Gim wehi ira atatun vevsera i gim bohara gin vatu gabe God mwa horara vai abemiu. Vaivusi maragai nam doron be nav tau limaḡu dalis kimiu, kun gabe toa mwa ov ira nituna, itake kimiu gim hav doroni tehe.

³⁸Kunia vanuamiu vi tu vuroi.

³⁹Nam bevea lalai kimiu be, nin kekadogaha gisav mom gitau tehe vai votu gubwen̄i be giv vevea sibomiu be, ‘Vatavuha lalainia gabe mwa mai la ihan Ratahigi.’ ”