Read Hano Matiu 28 Bible Online

Matiu 28 - Hano bible

Matiu 28

¹Haḡe atagun gubwen̄ mambuharai, mabon̄ gaituvwa la Sande, muan gubwen̄ ata lol wik, Mere ata Makdala mai Mere vwate mulei ramuru bano be raru men gita bwaru.

²Haḡe gita, mwa sogai gaivua maragai, bwatuna be enjel non God Ratahigi mwa himai nin ute atamare, mwa datui dagai vatu nin bwan̄on malan̄a i mwa do mahuri aluna.

³Gitanana nu ḡun vilehi i gaisagana nu abwaga kun tenlan̄ maita.

⁴Ira matmatai ḡoro ram mataguinia i ram birururu maragai, ram du kun atatmate.

⁵Haḡe enjel mwa avo maira vavine, mwa bevea be, “Giru si hav matagu tehe. Nam iloe be gumuru hiḡe Jisas gabe ran vohae alun volovolo.

⁶Kea sigai teti. Take nu tomare mulei, kun nu vevea huba. Giru mai teti ba ḡita tanona gabe nu en aia.

⁷Giru van vilvilehi ba seserainia lalai non roron̄tai be, ‘Kea nu tomare mulei nin mateana, i kadogaha mwa bano dotomua vai Kalili, i giv gitae aia.’ Kea haḡea noḡu avoana.”

⁸Haḡe ramuru romaragai vilehi nin malan̄a, ramuru matagu, take lolora mwa masiri gin samsamwara, i ramuru rovo be raru vi vev serae lalai non roron̄tai.

⁹Haḡe gita, Jisas mwa bisogari maira, mwa bevea be, “Tamwata abemiu.” Haḡe ramuru la sosoria, ramuru sisiabwau ḡoroe, ramuru haḡo bwalagena.

¹⁰Jisas mwa bevea lalainira be, “Giru si hav matagu tehe. Take giru van ba bevea lalai ira tuaku be rai van vai Kalili, i rav gitau aia.”

¹¹Lol mahavana be vavine gairua ramuru ban la hala, atatu rituai nin vatugi mataiḡoro ram ban lol bwatutun vanua, ram seserai lalai ira muai tataroi ginau duluai be ran loli.

¹²Ira muai tataroi mai ira bwatmetua ram ḡoḡo utegaituvwa, ram daritari huria, i ram hara homu ivusi lalai ira matmatai ḡoro,

¹³ram bevea be, “Giv vevea be, non roron̄tai ran mai bon̄i, ram lai surai rebehina mahavana be gim maturu.

¹⁴Take be Tomuai Vevev si ron̄oe, kamai gav lol bavtutui ginau gea maia, huri be kimiu gisav lai te silo vevegi huria.”

¹⁵Haḡe ira matmatai ḡoro ram lai homu gea i ram lol hano kun gabe ran vevea lalainira. I avoana gea mwa bavatuiana abera Jius vai votu garigi.

¹⁶Ira roron̄tai non Jisas han̄vul domwan gaituvwa ram bano vai Kalili, la vusi be Jisas nu horara huria.

¹⁷Batena ram ḡita Jisas, ram sisiabwau ḡoroe, take rituai ram binihi lalan̄aga.

¹⁸Jisas mwa mai sosorira, mwa bevea be, “God mwa lai roron̄o lalaiau ḡoro ute atamare i ataa lol ureure.

¹⁹Bwatuna gea, giv van vai lol sinombu duluai vataha ute, i giv lolira gi noḡu roron̄tai. Giv garuhisabugainira vai lol ihan Tata i Nitui i Vui Sabuga.

²⁰I giv vagahira be rav ḡoḡoi ḡoro ginau duluai gabe nan vevea lalai kimiu. Haḡe gita, inau mai kimiu vataha gubwen̄, vai votu nogonan ureure.”