Read Hano Matiu 6 Bible Online

Matiu 6 - Hano bible

Matiu 6

¹“Nomiu lalaḡova duluai be gim lolia lalai God, ta giv lalaḡoinia la mwasin halana. Gisav lolira te lolmatan sinombu be atatu men gita kimiu. Be giv didi lolia kunia, Tamamiu lol ute atamare si hav tavwe te kimiu huria.

²“La mahavana gim lai nomiu ginau vwate lalai ira hiru, gisav uv te taiva gi dovon̄ana, kun ira hoḡoiḡoro ram lolia lol imwa tataro i lolmatan ute be atatu ramen gitara ba binihi marahinira. Nam bev mwasigi lalai kimiu, bwatuna ran lolia kunia, ran lai tavwera huba.

³Take la mahavana be gim lai nomiu ginau lalai ira hiru, giv lol ron̄oe be limamiu mwairi si hav ilo te hano be limamiu mwatua mwa lolia.

⁴Lalaḡova kunia huri buluiana ginau dahuligi. Tamamiu gabe mwa ḡita buluiana be gim lol dahulinia vi tavwe kimiu huria.

⁵“Mahavana be gim dataro, gisav lolia te kun ira hoḡoiḡoro. Kera ram doron be rav tu amare ba dataro lol imwa tataro i mulei la hal bulbulu huri be atatu ramen gitara. Nam bev mwasigi lalai kimiu be kera gea gabe ram lolia kunia, ram lai tavwera huba.

⁶Take mahavana be gim dataro, giv haroro gahemiu lol vwavwan imwamiu ba dataro lol gatav goro lalai Tamamiu be tam hav gitae tehe. Haḡe Tamamiu gabe vi gita hano be gim lol dahulinia vi tavwe kimiu huria.

⁷“Mahavana be gim dataro, gisav tataro te gin avoan ivusi, kun ira len̄len̄aga. Kera gea ram lolia kunia bwatuna ram binihi be God vi ron̄ora huri be nora tataro n̄ava.

⁸Kimiu gisav lolia te kunira geki. Mahavana gim hav hudali te Tamamiu radu gin ginau be gim doronia, kea mwa iloe huba.

⁹Bwatuna gea, giv tataro kungeki be: ‘Tata amare: ihamwa na sabuga:

¹⁰Nom ute na mai; Nom doron na dum ataa lol ureure kun ute atamare.

¹¹Lai garigi lalai kamai ginaganiana vi dadariha huri kamai.

¹²Goi binihi kaburai vuromai, kun kamai gam binihi kaburai vurora hei be ram lolia lalai kamai.

¹³Gosav lin̄ te kamai lol kalkaliana, Gov lai kamai nin bwatigoro.’

¹⁴“Be kimiu gim binihi kaburai vuron irahei dodolua be ram buroga mai kimiu, Tamamiu lol ute atamare vi binihi kaburai vuromiu.

¹⁵Take be gisav vinihi te kaburai vurora hei dolua, haḡe Tamamiu si hav binihi te kaburai vuromiu.

¹⁶“La mahavana be giv garagara vwavwa, lolmatamiu si hav vin̄arin̄ari tehe, kun ira hoḡoiḡoro ram lolia. Kera geki ram lago mai lolmat vin̄arin̄ari, kun gabe maro mwa ḡasira, huri be vataha atatu vi gitara be ram ḡaragara vwavwa. Mwasigi, nam bevea lalai kimiu be kera geki gabe ram lolia kunia be ran lai tavwera huba.

¹⁷La mahavana be gim ḡaragara vwavwa, giv bwaga lolmatamiu i giv ari ilumiu,

¹⁸huri be atatu rasav iloe tehe be gim ḡaragara vwavwa ita Tamamiu tam hav gitae tehe vi iloe. I kunia Tamamiu gabe mwa ḡita hano be gim lol dahulinia vi tavwe kimiu huria.

¹⁹“Gisav hogon te rosomiu ata lol ureure geki. Ute kunia kakurus vi gan dumwia i vi boboga dumwi, i atat surasura rav haroro surai dum alolon imwa i rav surai dumwia.

²⁰Ta giv hogon rosomiu tavuha ba vi togo lol ute atamare aben God, lol ute gabe kakurus rasav gan te dumwia i si hav boboga tehe, i atat surasura rasav lol te bovorae, rasav sura te dum.

²¹Huri be lol ute haḡe gea be rosomwa mwa dogo aia, lolomwa vi togo aia mulei.

²²“Matamiu kun gabe gigita huri rebehimiu. Be matamiu vi gigita tavuha, rebehimiu n̄oto vi togo lol gigita.

²³Sa be matamiu vi hantai, rebehimiu n̄oto mwa dogo lol ute meto. Be gigita alolomiu mwa bogi gi ute meto, vi vora ginau meto hantai maragai!

²⁴“Atatu si hav vora te turin rovoga dum lalai ratahigi gairua. Bereva gim hun̄ai vwate i gim dabe vwate. Sage vi gogonai vwate i vi gita hantai vwate. Gisav haḡo te bul rovoga non God mai rovogan mwane.

²⁵“Bwatuna gea, nam bevea lalai kimiu be gisav binihi te dadaligi lol nomiu togoana, be gim binihia be, ‘nav gan hano garigi?’ sage ‘nav mwin hano garigi?’ sage ‘nav sagasagai hano?’ Giv iloe be rahumiu barabe vi rahu n̄an alun ginaganiana, take nu liu ninia. Sage rebehimiu si hav rahu te alun gaisaga, take nu liu ninia.

²⁶Giv taria alun manun mahava. Kera ram hav ririvu tehe, sage ram hav lai te ginaganiana vai la imwa. Itake Tamamiu lol ute atamare mwa lai ginaganiana lalainira. Matu gin hav tavuha tehe nin manu duluai?

²⁷Matu be gim binihi dadaligi huria huri hano, gisav tarihou te dum taul dolua mulei lol rahumiu.

²⁸“Huri hano be gim binihi dadaligi huri gaisagamiu? Giv taria alun virangai be ram mauri lol ute vono, be ram mauri kun hanigi. Ram hav lol te rovoga sage ram hav ligo te gaisaga.

²⁹Take nam bevea lalai kimiu be lavoa Solomon amua, kea atat rosoga maragai, itake gaisagana nu hav ḡalana tehe kun virangai duluai kera uhu.

³⁰Huri God n̄ano mwa saga ḡoro mwanea gabe ram du lol ute vono mwanea mwa mauri garigi i vaigogo mwa ḡoru mulei i mwa bohaiana lol gabi. Be God mwa saga ḡoro mwanea, vi lolia mulei kunia lalai kimiu. Nomiu binihimwasigi garagusi kolo maragai!

³¹“Huri ginau duluai gea, gisav binihi te dadaligi be ‘Garigi tav gan hano? Nav mwin hano? Sage nav sagasagai hano?’

³²Ta kea binihiva gabe ira len̄len̄aga ram dogo maia. I Tamamiu lol ute atamare mwa iloe be gim doron ginau duluai geki.

³³Take kimiu giv gitaḡoro didinigi be giv tabe God gabe nomiu Ratahigi i be giv lol ginau vavtutu duluai gabe kea mwa doronia, i vi hogoi lalai kimiu ginau duluai kera geki mulei.

³⁴Take gisav binbinihi te dadaligi huri vaigogo, huri be vaigogo matanhalana mwa eno huba. Ginau gagarasi huri gubwen̄ gaituvwa si hav mom dari houana tehe.