Read Hano Matiu 7 Bible Online

Matiu 7 - Hano bible

Matiu 7

¹“Gisav vevegi te atatu dolua, huri be God mulei si hav vevegi te kimiu.

²Bwatuna be God vi vevegi kimiu kunia gabe gim bevegi atat dodolua. I tovtovo gabe gim dovo ginia, God vi tovo kimiu mulei ginia.

³Huri hano gom ḡarerei han̄ora lolmatan tuamwa i gom hav vinihi te huri n̄andui gai gaivua lol matamwa sibomwa?

⁴Huri hano be gom bevea aben tuamwa be, ‘Tua, mahin̄a ba namen arilua han̄ora mwa dogo lol matamwa,’ itake n̄adun gai gaivua mwa eno lol matamwa sibomwa?

⁵Giḡo hoḡoiḡoro! Muana giḡo sibomwa gov lai dagai n̄adun gai gaivua lol matamwa, vuvuri gov siv gita dum tavuhai ute, kadogaha gov siv ari dagai han̄ora lolmatan tuamwa.

⁶“Gisav vohai te kaburai ginau sabuga lalai vwiriu, bereva ram ban burigai ba ḡas kimiu. I gisav vohai te nomiu ginau tavuha lolmatan boe, bereva ram barahi davinira.

⁷“Be giv hudaligi, vi lai lalai kimiu. Giv hiḡe, giv habwe. Giv dorodoro, vi havan̄ lalai kimiu.

⁸Huri ihei gabe mwa hudaligi, vi lai dum hano gabe mwa doron. I ihei gabe mwa hiḡe, vi habwe dum ginau gabe mwa hiḡea. I ihei mwa dorodoro, vi havan̄ lalainia.

⁹Ihei nin kimiu ira tama vi lai vatu lalai nituna mahavana nituna mwa hudaligi huri damu?

¹⁰Sa daga mwa hudaligi huri ige, i vi lai teltele lalainia?

¹¹Kimiu atat hahantai, take gim ilo halana be gim lai ginau tavtavuha lalai ira nitumiu. Haḡe kunia mulei, Tamamiu lol ute atamare vi lai ginau tavtavuha liu lalai irahei gabe ram hudalinia huria.

¹²“Mwa du be giv lol lalai irahei kunia be gim doron be ras lolia lalai kimiu. Geki haḡea binihiva ata lol Silo non Moses i silo vagahi non ira atatun vevsera.

¹³“Giv dalin̄oro alolon matgatava ḡuḡusi. Huri be matgatava gaivua i hala nu maron̄ron̄o, kea huri tanon gagarasi. Atatu ivusi maragai ram huri hala geki.

¹⁴Take matgatava ḡuḡusi i hala ririhai, kea haḡea halan rahuana, i gaiviha n̄an ram habwea.

¹⁵“Giv gitaḡoro ira atatun vevsera tentene. Ram mai abemiu kun boe mamavu. Take alolora kera kun vwiriu turu.

¹⁶Giv gita batoira alun hano ram lolia. Ḡauli laso mwa hav vwae te dumwi gi vwain gaon taligaon waen sa vwain vik.

¹⁷Gai tavuha mwa bwaevwae tavuha, i gai hantai mwa bwaevwae hantai.

¹⁸Gai tavuha si hav vwae te dum vwae hantai, i gai hantai si hav vwae te dum vwae tavuha.

¹⁹Gai be vwaina ran hantai, vi taiana, vi vohai kaburaiana lol gabi.

²⁰Take giv gita batoi ira atatun vevsera tentene alun nora lalaḡova.

²¹“Si hav vora te atatu duluai ninira ram uloiau be ‘Ratahigi, Ratahigi,’ rav dalin̄oro lol Ute Lavoa atamare, take kera n̄ano be ram lol dum doroniva non Tamaḡu lol ute atamare.

²²La mahavana gubwen̄ vevegi vi mai, atatu ivusi rai vevea lalaiau be, ‘Ratahigi, Ratahigi, kamai gan seserai avoana non God lol ihamwa, gam hora lua vui hantai lol ihamwa, i gam lol tagaro ivusi lol ihamwa,’

²³I vuvuri nai vev luae lol matara be, ‘Nam hav ilo te kimiu. Gin vis dagai, kimiu ira hantain lalaḡo!’

²⁴“Bwatuna gea, irahei gabe ram ron̄ siloku, i ram huri noḡu avoana, kera gea kun gabe atat mataisaoga, mwa lol bwatbwatun imwana alun vatu tu.

²⁵Ataguna uhe mwa uhe, wai ram rovo, lan̄i mwa here gaivua vai alun imwa gea. Itake imwa mwa hav hovi tehe, bwatuna be wani gea nu lol bwatbwatun imwana alun vatu tu.

²⁶“Take irahei gabe ram ron̄ siloku, i ram hav huri te noḡu avoana, kera gea kun atat dadaloiga, gabe mwa haḡo imwana alun one n̄an.

²⁷Ataguna uhe mwa uhe, wai ram rovo, lan̄i mwa here gaivua vai alun imwa gea. I mwa hovi, mwa masalan̄ai n̄oton̄oto.”

²⁸Mahavana be Jisas mwa avo vuvuri, sinombu ram dan̄an̄a maragai huri non silo vagahi.

²⁹Bwatuna be avoana non Jisas nu roron̄o, take mwa hav vora te kun avoana non ira atatun vagahin Silo.