Read Hano Matiu 8 Bible Online

Matiu 8 - Hano bible

Matiu 8

¹Jisas mwa hivo nin vusi i sinombu ivusi maragai ram huria.

²Atatu vwate aia leba nu dumwia mwa mai, mwa hiv bahudui lol bwalagen Jisas, mwa bevea be, “Ratahigi, be gos doron, gos lol melmeloiau.”

³Jisas mwa hagai lua limana, mwa sibweria, mwa bevea be, “Nam doron. Rebehimwa na melmelo.” Darihou rebehina mwa melmelo.

⁴Jisas mwa bevea lalainia be, “Ron̄oe! Gosav vevuri te lalai hei dolua huri ginau nam lolia lalainigo. Take goi van aben tataroi ba vi gitago. I gov vohai nom hogoi kun silo non Moses mwa bevea, huri be vi seserainia lalai sinombu be gon melmelo.”

⁵La mahavana be Jisas mwa dalin̄oro Kapanium, tomuai ḡoro vatugin bwaloana ata Rom mwa mai abena, mwa hudali mamaragainia be,

⁶“Ratahigi, noḡu atatun rovoga vwate mwa haro, mwa en la imwa, mwa hav rihui te dum rebehina, i mwa ron̄ ḡagarasi maragai.”

⁷Jisas mwa bevea lalainia be, “Nu tavuha. Nai matu be lol barahua.”

⁸Take tomuai ḡoro mwa bwaliua be, “O sigai, Ratahigi, nam hav dadariha tehe be gov dalin̄oro aten imwaḡu. Take gomen avo n̄ano, i noḡu atatun rovoga gim rahu.

⁹Huri inau mulei nam dogo halaten tomuai ḡoro rituai liuau, i mulei nam bora Tomuai ḡoro vatugigi vwate. Mahavana nam bevea lalai noḡu atatu vwate be, ‘Vano,’ haḡe mwa bano. I lalai vwate be, ‘Mai,’ haḡe mwa mai. Haḡe nam bevea lalai noḡu turin rovoga be, ‘Lol geki,’ haḡe mwa lolia.”

¹⁰Haḡe Jisas mwa ron̄oe i mwa dan̄an̄a maragai, i mwa bevea lalainira ram huria be, “Nam bev mwasigi lalai kimiu be, vataha ute duluai lol vanua Israel nam hav habwe te ihei gabe mwa binihimwasigi garagusi kun wani uhu.

¹¹Nam bevea lalai kimiu be atatu ivusi rav mai vai gin tanon matanial tavwaga i tanon al huhuni, rav tomahuri ba ḡan ginau mai Ebraham, Aisak i Jekob lol Ute Lavoa atamare.

¹²Take kera gabe ras dalin̄oro lol rahuan gara gea, God vi vohai kaburainira vai lol ute meto, i aia rav ḡoea i ba ḡan livora.”

¹³Haḡe Jisas mwa bevea lalai tomuai ḡoro gea be, “Tabagilu, bwatuna gom binihimwasigi ginau gom hudaligi huria vi dumwi lalainigo.” Lol mahavan alo n̄an gea non atatun rovoga mwa rahu mulei.

¹⁴Jisas mwa ban vai lol imwan Pita, mwa dalin̄oro i aia mwa ḡita ratahin tasalan Pita mwa eno, mwa haro gin rurutia.

¹⁵Haḡe Jisas mwa sibweri liman vavine gea, haḡe harova mwa lin̄ia, i vavine mwa domare darihou, mwa lol ginaganiana lalainia.

¹⁶Haḡe ute mwa ravravi. Sinombu ram mai mai atatu ivusi, vui hantai mwa lolira. Haḡe Jisas mwa hora lua vui hantai ninira gin non avoana i mwa lol barahu muleinira gabe ran haro vuroi.

¹⁷Mwa lol ginau kera geki be men lol seserai hano non atatun vevsera Aesaia nu vevea tuai be, “Kea n̄an gaituvwa be nu lai nonda harova vai aluna sibona i nu tau dagai nonda gagarasi duluai nin gida.”

¹⁸Jisas mwa ḡita sinombu ivusi ram mai ram dogo dalisia. Haḡe mwa bevea lalainira non roron̄tai be, “Tav mwalue nin teti, tai vano vai haltavalun numbu gaivua.”

¹⁹Haḡe vagahin Silo vwate mwa bevea lalainia be, “Vagahi, kadogaha nav tau hurigo vai halabehe tehe be gov lago.”

²⁰Haḡe Jisas mwa bwaliua be, “Vwiriu turu malan̄ara abena, i manu mulei inogira abena. Itake inau Nitun Atatu tanoḡu nu sigai huri maturuva sa mabuana.”

²¹Haḡe non roron̄tai vwate mwa bevea lalainia be, “Ratahigi, nan van huba ba davi tamaḡu.”

²²Haḡe Jisas mwa bevea lalainia be, “Huriau. Lin̄ atatmate ba ran tavi nora atatmate.”

²³Jisas maira non roron̄tai ram ḡalo la waḡa.

²⁴Haḡe vilehi n̄ano lan̄i wasi mwa domare lol numbu gaivua, i waḡara mwa abena be men moru. Take Jisas mwa eno mwa maturu.

²⁵Non roron̄tai ram bamatae ram bevea be, “Ratahigi, varahu gida. Mwa abena be tamen mate.”

²⁶Haḡe Jisas mwa bwaliura be, “Huri hano gim matagu? Nomiu binihimwasigi garagusi kolo maragai.” Haḡe Jisas mwa domare, mwa borotai lan̄i mai rebu, i mwa daro mulei.

²⁷Haḡe kera duluai ram dan̄an̄a, ram bevea be, “Ira tua! Hava atatu geki? Be lan̄i mai rebu ramuru ron̄ silona.”

²⁸Jisas mwa botui ute ram huia be Kadara, vanua gea mwa dogo haltavalun numbu gaivua, i mwa la habwe atatu gairua gabe ramuru mwalue nin malan̄an atatmate. Ira tarua uhu vui hantai ram do alolora ram lolira ramuru bubuaraga, atatu rasav lago te dum la hala gea.

²⁹Batena ramuru ḡita Jisas, ramuru haharigi darihou be, “Havanau gom doronia nin kamai, Nitun God? Gom mai daga be gomen lol ḡagaras susuvwai kamai?”

³⁰Ute uhu sosori vatugin boe gabe ram du ram huhua.

³¹Haḡe vui hantai kera geki ram hudali mamaragai Jisas be, “Be gov lus lua kamai, gov hora kamai vai lol vatugin boe kahaḡa.”

³²Haḡe mwa bevea lalainira be, “Gin vano.” Haḡe vui hantai ram mwalue i ram haroro n̄oto lol vatugin boe gea. I boe duluai gea ram rov viluslusi duliuliu vai la matavwen bwabwa, ram burere vai lol numbu gaivua, ram mwinu.

³³Haḡe kera gabe ran gitaḡoro boe ram romaragai ram bano vai la bwatutun vanua, ram bevuri huri ginau duluai i hurira gabe vui hantai nu bulusira.

³⁴Haḡe sinombu duluai ram mwalue nin bwatutun vanua gea, ram bano be rav visogari mai Jisas. La mahavana be ram habwea ram bev wasinia lalainia be vi van dagai nin vanuara.