Read Hano Matiu 9 Bible Online

Matiu 9 - Hano bible

Matiu 9

¹Haḡe Jisas mwa ḡalo la waḡa, mwa ban tuhi vai haltavalun numbu la mwasin bwatutun vanuana.

²La mahavana mwa botu mulei ta sinombu rituai ram mai mai atatu vwate be rebehina nu mate, mwa eno la bata. Jisas mwa ḡita batoi nora binihimwasigi garagusi, mwa bevea lalai wani rebehina nu mate be, “Mala, gov to mahurigi. Vuromwa mwa binihi kaburaiana.”

³Haḡe ira vagahin Silo rituai ram bevea ginginira be, “Wani uhu mwa av deḡeteḡe vai alun God!”

⁴Itake Jisas mwa ḡita batoi nora binihiva. Haḡe mwa bevea be, “Huri hano be gim binbinihi hantai lol lolomiu?

⁵Kehibehe nu maron̄ron̄o? Be men vevea be, ‘Mwa binihi kaburai vuromwa sa be men vevea be, ‘Tomare ba lago’?

⁶Take be gimen iloe be inau Nitun Atatu noḡu roron̄o abena la ureure be nav binihi kaburai vuro,” haḡe mwa bevea lalai wani rebehina nu mate be, “Tomare ba lai batamwa ba dabagilu mulei vai la imwamwa.”

⁷Haḡe wani gea mwa domare, mwa ban mulei vai la imwana.

⁸La mahavana be sinombu ram ḡitae, ram matagu. I ram uloi roron God, huri be mwa lai roron̄o lalai atatu kunia.

⁹Haḡe Jisas mwa derai ute aia i mwa la ban mwa ḡita harahara homu vwate, ihana Matiu, mwa dogo lol imwan harahara homu. I mwa bevea lalainia be, “Huriau.” Haḡe Matiu mwa domare mwa huria darihou.

¹⁰Ataguna gea Jisas mai non roron̄tai ram do mahuri ram ḡan ginau la imwa. Ira harahara homu ivusi maira vev duli ram mai ram do maira.

¹¹Ira Varise ram ḡitae, haḡe ram hudalinira non roron̄tai be, “Huri hano nomiu vagahi mwa ḡan ginau utegaituvwa maira vev duli?”

¹²Haḡe Jisas mwa ron̄ dum nora avoana, mwa bevea lalainira be, “Kera gabe rebehira harova sigai alura ram hav doron te dokta. Itake kera n̄an gabe ram haro.

¹³Take giv vano ba hiḡe binihiva ata lol Ravrava Sabuga non God geki, nu vevea be, ‘Inau nam hav doron tehe be giv gogonaiau gin tataroi tuntun, take gin tabeana.’ Inau nam hav mai tehe be nav uloi ira vavtutu, take ira vev duli.”

¹⁴Haḡe roron̄tai non Jon Garuhisabuga ram mai aben Jisas, ram hudalinia be, “Huri hano kamai maira Varise gam ḡaragara vwavwa vaivusi, take nom roron̄tai ram hav garagara vwavwa tehe?”

¹⁵I Jisas mwa bwaliura be, “La mahavana be atatu vwate mwa siv lagi i mwa dogo radu mai non sinombu, gim binihia be kera rav ron̄ mwahantai batena ram dogo radu maia? O sigai! Ta tarona vi mai be rav lai dagai wani lagi ninira, i la mahavana haḡe gea be non sinombu rav siv garagara vwavwa.

¹⁶“Nu hav tavuha tehe be gov lai tavihen gav gara ba bon ute mahera la gav maleiga, bere gav gara rav ḡuḡu gav maleiga.

¹⁷I mulei, ihei si hav sisiai te waen gara vai lol bwelehu ḡuramega, be si ḡunia, bwelehu vi mavovora i waen vi rov bwebweu, i bwelehu vi maverovero kaburai. Take rav sisiai waen gara vai lol bwelehu gara i ramuru dogo bonvonoigi saraḡo.”

¹⁸Jisas mwa avo radu lalai sinombu, lavoa vwate ata lol imwa tataro mwa mai aben Jisas, mwa hivbwaubwau hurin bwalagena, mwa bevea be, “Nituku vavine mwa siv mate. Nam doron be gov mai ba dau limwamwa aluna i kea vi rahu mulei.”

¹⁹Haḡe Jisas mai non roron̄tai ram domare, ram huria.

²⁰Vavine vwate mulei aia, daga rovrovo mwa lolia huri taul han̄vul domwan gairua, mwa hav mosi te dum. Mwa mai atagun Jisas, mwa sibweri ḡereḡeren gaisagana,

²¹bwatuna vavine uhu mwa binihi daua mahaḡea lol sibwen̄ina be, “Nas sibweri te dum ḡereḡeren gaisagana n̄an nas rahu.”

²²Jisas mwa ban burigai mwa ḡitae, mwa bevea lalainia be, “Nituku, gov togonainigo! Nom binihimwasigi garagusi mwa barahugo.” I darihou vavine gea mwa rahu.

²³Mahavana Jisas mwa botu la imwan lavoa huri imwa tataro, mwa ḡita atatun sin̄sin̄i huri mateana mai sinombu dodolua ram du ram dei.

²⁴Haḡe mwa bevea lalainira be, “Giv bwihavare dagai! Naturigi vavine uhu mwa hav mate tehe, take mwa maturu n̄an!” Mahavana Jisas mwa bevea kunia sinombu ram manuhia.

²⁵Batena sinombu mwa horan dagai, Jisas mwa dalin̄oro alolon vwavwan imwa be naturigi en aia, mwa haḡo limana i naturigi mwa domare.

²⁶Haḡe rorona mwa lon̄ahi vanua duluai aia.

²⁷Mahavana Jisas mwa mwalue nin ute, aia matagara gairua ramuru huria, ramuru haharigi be, “Nitun Deved, gov hagav kamaru!”

²⁸Jisas mwa dalin̄oro la imwa, haḡe ira matagara gairua uhu ramuru haroro abena. Jisas mwa hudalinira be, “Kun hanigi? Gumuru binihimwasigi be nav lol dum hano be gumuru doronia?” Ramuru bwaliua be, “Uwe, ratahigi.”

²⁹Haḡe Jisas mwa sibweri matara, mwa bevea be, “Vi dum lalai kimiru hurin nomiru binihimwasigi!”

³⁰Kadogaha matara mwa mata vugeri mulei i ramuru ḡita ute. Jisas mwa bisigai waswasigi ginira, mwa bevea be, “Giru si hav seserai te ginau geki lalai atatu dodolua.”

³¹Take ramuru mwalue ramuru bev roron Jisas liu daldalis vanua duluai gabe ramuru dogo aia.

³²Batena be ira tarua ramuru derai Jisas, atatu rituai ram mai mai buhi vwate vai aben Jisas. Wani gea vui hantai mwa lolia.

³³Jisas mwa hora lua vui hantai ninia, vuvuri mwa siv avo. Sinombu ram dan̄an̄a maragai, ram bevea be, “Mwa mai tuai, atatu mwa hav gita te ginau dan̄an̄a kunia Israel.”

³⁴Take ira Varise ram bevea be, “Wani geki ratahigi ḡorora vui hantai mwa lai muramura lalainia be vi hora luara vui hantai.”

³⁵Jisas mwa lago lol bwatutun vanua i vanua ririgi ivusi, i vataha imwa tataro duluai mwa bagahi sinombu. Lol non silo vagahi mwa seserai lua Roroi Tavuha be God vi vora Ratahigi ḡoro atatu duluai, i mwa barahura be ram haro, i kera be rebehira ran hahantai ram davuha mulei.

³⁶Mahavana be Jisas mwa ḡita sinombu mwa hagavira, bwatuna kera ram do dadaligi lol nora binihiva i ram hav wasi tehe, ram lago kun sipsip be nora radaiḡoro sigai.

³⁷Haḡe Jisas mwa bevea lalainira non roron̄tai be, “Gita, ginaganiana gaivua maragai lolo ara, take atatu gaiviha n̄an ram lol vatuvwai be rav laia vai an vanua.

³⁸Mwa du be vi hudali maragai wani be bilan ute huri be vi mom hora atatu rituai mulei rai van ba mom lai ginaganiana.”