Read Hano Mak 13 Bible Online

Mak 13 - Hano bible

Mak 13

¹Batena be Jisas mwa mwalue nin Imwa Tataro, vwate ninira non roron̄tai mwa bevea be, “Vagahi, gita! Vat lalavoa mai imwa tavtavuha!”

²Jisas mwa bwaliua be, “Gom ḡita imwa gaivua uhu vatuna gaituvwa sihav to te lol tanona. Vi vuvuian kaburai duluai!”

³Batena be Jisas mwa do mahuri la vusin gai Oliv bavtutui Imwa Tataro Pita, Semes, Jon, i Andru ram mai dahuligi vai abena

⁴Ram hudalinia be, “Vev luae lalai kamai be ginau kera geki rav loli baten hano, i goi vev seserai havanau gabe vi loli be men dovon̄ai mahavana be ginau duluai kera geki rav loli alolona.”

⁵Haḡe Jisas mwa bevea lalainira be, “Giv gitaḡoro be ihei si hav ruruhi te kimiu.

⁶Bwatuna be, atatu ivusi rav mai lol ihaku, rav vevea be, ‘Inau haḡea uhu!’ i rav ruruhi sinombu.

⁷Gisav virururu tehe batena giv ron̄ silon bwaloana abemiu mai roron bwaloana hautu. Ginau kera gea rav loli magea, take gisav binihia tehe be men vora nogonan gubwen̄.

⁸Vanua rav bwalo ginginira; ute Ratahigi rav bwalo ginginira. Sogai vi dum vataha ute duluai, maro vi lol vanua. Ginau duluai geki ram ḡun muan ron̄ḡagarasianan bavavana.”

⁹“Kimiu sibomiu giv gitaḡoro. Rav haḡo batugehi kimiu i rav lai kimiu vai lol imwan harahara. Rav wehi kimiu lol imwa tataro, i giv tu la lolmatara tomuai mai ira Ratahigi lavoa huriau, be gimen vev lua Roroi Tavuha lalainira.

¹⁰Ta amua nogonan gubwen̄i vi siv mai, vi toretore huri Leo Tavuha lalai sinombu duluai.

¹¹Batena be ram haḡo batugehi kimiu, i ram lai kimiu vai lol imwan harahara, gisav matagu te susuvwai huri havanau be giv vevea; batena be mahavana vi mai, giv avo alun havanau be mwa laia lalai kimiu baten gea. Huri avoana gabe giv avo aluna si hav vora te nomiu; rav mai nin Vui Sabuga.

¹²Atatu rav lin̄ mulei ira tuara huri mateana, ira tama rav lol mulei kunia lalai ira nitura. Naturirigi rav van burigai ira tamara i ratahira rav taura huri mateana.

¹³Atatu duluai rav varihai kimiu bwatuna inau. Take ihei tehe mwa du wasigi vaivotu nogonana kea vi rahu.”

¹⁴“Haḡe giv gita ‘Ginau bovonos hantai’ be vi tu lol ute gabe mwa hav tu te be vi tu aia.” (Ihei mwa basogo ginau geki vi ilo hano be nam bevea!) “La mahavana be giv ḡita ginau gea, kera nin kimiu gabe ram dogo Judia rav romaragai ba hae la vusi.

¹⁵Haḡe wani be mwa dogo la ibwirin imwana sihav lai te mahavana be men hivo ba haroro alolon imwana ba lai dagai non ginau be vi haḡoe bul maia.

¹⁶Wani be mwa dogo lol bilan ute loloara sihav mom dabagilu tehe mulei vai la imwana huri gaisagana.

¹⁷Lol mahavana kera gea, hahagavi lalai ira vavine gabe ram ros atatu i lalainira nitura la huhu radu!

¹⁸Tataro lalai God be ginau kera uhu rasav loli tehe lol taron ute hohoga!

¹⁹Bwatuna ginau hantai ata lol gubwen̄ kera gea vi hantai liu maragai, ureure mwa hav ilo te hohoinia mwa dau bwatuna batena God nu tau ureure vaivotu gubwen̄ garigi. I si hav mom loli te kunia vainon̄oiha.

²⁰Take Ratahigi nu lol vwelvwelei mahavana huba gea. Be sihav lolia te kunia, atatu sihav rahu tehe. Ta bwatuna ira hei gabe God nu gita luara, kea vi lol vwelvwelei mahavana gea.”

²¹“Be ihei tehe si vevea lalai kimiu be, ‘Gitae, Kraes teti! Sage Kraes kahaḡa!’ Gisav vinihi te mwasigi non avoana.

²²Bwatuna Kraes tentene i atatun vevsera tentene rai visirai i rav lol dovon̄ana i taro ririhai huri be si dumwi ta rav salainira gabe God nu gita luara.

²³Giv ron̄oe nam seserai ginau kera geki lalai kimiu amua ram siv loli. Giv gitaḡoro!”

²⁴“Haḡe ta atagun ginau hantai ata lol gubwen̄ kera gea, alo vi meto i vula sihav gigita tehe,

²⁵i visiu rav hovi nin lol ute atamare, i ginau muramura ata amare rav tagara nin tanora.

²⁶Lol mahavan gea inau Nitun Atatu nai visirai lol tenlan̄i mai muramura i sarisari.

²⁷Kea vi horara enjel vai la sigun ureure gaivasi, rav hara ḡoḡo ira atat gitalua non God.”

²⁸“Bwatun Vig na lai silo vagahi lalai kimiu batena be rarana ram bweibweihe i n̄olina mwa n̄oliga, gim iloe be mwa sosori gin mwagota.

²⁹Kunia mulei, mahavana be gim ḡita ginau kera geki, giv iloe be mahavana mwa abena be men tau bwatuna.

³⁰Nam bev mwasigi lalai kimiu be atatu be ram dogo kadogaha rasav mate te radu vaivotu ginau kera geki rav loli.

³¹Mahao i ureure vi nogo kaburai, take noḡu avoana sihav nogo tehe.”

³²“Ihei mwa hav ilo te gubwen̄ mai mahavana be ginau kerageki rav mai, ira enjel atamare sage inau Nitun God; take tata gaituvwa n̄an mwa iloe.

³³Giv mamata, giv lol dautau, bwatuna gim hav iloe te huri mahavana gabe vi mai.

³⁴Vi ḡun atatu gabe mwa ban dagai nin vanuana vai la vanua dolua hautu i mwa dari non atatun rovoga rituai be rav gitaḡoro vataha tatan̄an rovoga be mwa laia vatvatahara be rav lolia. I mwa bevea lalai wani mwa ḡitaḡoro gatava be vi mamata.

³⁵Giv mamata, bwatuna gim hav iloe te huri mahavana gabe vuigin imwa vi tabagilu mulei alolona, daga vi visirai mulei uteravravi sa abobon bon̄i. Sa lol toa totoreto sa batena alo mwa hae.

³⁶Be kea mwa mai vilvilehi, sihav habwe te kimiu be gim maturu.

³⁷Havanau gabe nam bevea lalai kimiu, nam bevea lalai atatu duluai be: Giv mamata!”