Read Hano Mak 16 Bible Online

Mak 16 - Hano bible

Mak 16

¹Haḡe ataguna be gubwen̄ mambuharai mwa nogo, Mere Makdalen, i Mere gabe ratahin Semes mai Salome ramuru bol hun wai sasasav bonboni be raru men van ba sasav rebehin Jisas ginia.

²Haḡe mwa ran mabon̄ gaituvwa la Sande alo nu hae huba, ramuru ban vai aben malan̄a.

³La hala ramuru avo maginira be, “Ihei vi tatui dum dagai vatu lalai gidaru nin bwan̄on malan̄a?” (Bwatuna vatu gaivua maragai.) Haḡe ramuru garere, i ramuru ḡitae be vatu nu tatuian dagai huba.

⁵I ramuru haroro lol malan̄a, ramuru ḡita mwalaḡelo vwate mwa dogo la mwatuan malan̄a nu saga gaisaga maita ramuru dan̄an̄a maragai.

⁶Haḡe atatu mwa avo maira mwa bevea be, “Giru sihav matagu tehe, nam iloe be gumuru hiḡe Jisas ata Nasaret, kea gabe ran voha bolvoloe vai alun volovolo. Kea sigai teti nu tomare mulei! Gita tanona uhu gabe ran taua aia.

⁷Giru van ba bev roroi uhu lalai ira non roron̄tai mai Pita: ‘Be kea mwa ban dotomua nin kimiu vai Kalili giv gitae aia, kunia gabe nu vev daua lalai kimiu amua.’ ”

⁸Haḡe ramuru mwalue nin malan̄a ramuru matagu maragai ramuru rovo. Ramuru hav vev te dum ginau gabe raru gitae lalai atat dolua bwatuna ramuru matagu. [

⁹[1]Ataguna be Jisas nu tomare mulei nin mateana mabon̄ gaituvwa la Sande, nu visirai amua aben Mere Makdalen, kea gabe Jisas nu hora lua vui hantai gaibitu ninia.

¹⁰Nu van mwa bev serae abera ira buluana non Jisas, i kera ram ron̄mwahantai i ram dei.

¹¹Batena ram ron̄ Mere mwa bevea be Jisas nu rahu mulei, i kea nu gitae sibona, ta kera ram hav binihi te mwasiginia.

¹²Haḡe atagun ginau geki Jisas mwa bisirai la hala dolua aben ira tarua gairua batena ramuru lago dagai nin bwatutun vanua.

¹³Ramuru dabagilu ramuru bevurinia lalainira rituai take ram hav binihi te mwasiginira.

¹⁴Haḡe la nogonana, Jisas mwa bisirai abera han̄vul domwan gaituvwa mahavana be ram ḡan ginau. Kea mwa avo gin avoan wasi lalainira bwatuna nora binihimwasigi garagusi sigai bwatuna be lolora nu wasi be rai binihimwasiginira gabe ran gitae nu rahu.

¹⁵Haḡe Jisas mwa bevea lalainira be, “Gin van lol ureure duluai ba doretore huri Leo Tavuha.

¹⁶Ihei tehe mwa binihimwasigi i mwa ḡaruhisabuga vi rahu; ihei mwa hav binihi te mwasigi vi vevegia huria.

¹⁷Kera gabe ram binihimwasigi vi lai roron̄o lalainira be rav lol ginau dan̄an̄a ivusi; rav goro lua vui hantai ivusi lol ihaku; rav avo gin avoan dodolua;

¹⁸be ras haḡo domarei teltel gagasi sa ras mwin wai hantai, sihav lol te hantai dumwira, rav tau limara alun ira harova, kera rav rahu.”

¹⁹Haḡe ataguna be Jisas nu avo vuvuri maira, kea mwa hae mulei vai amare mwa dogo la mwatuan God.

²⁰Ira roron̄tai ram ban ram doretore vataha ute, i Ratahigi mwa lalaḡo bul maira i mwa dovon̄ainia be nora toretore nu mwasigi gin ginau dan̄an̄a ivusi be ram lolia.] [ NOGONAN AVOANA MULEI LOL LEO TAVUHA NON MAK Mak 16.9,10 [2] Ira vavine ram ban vai aben Pita mai non buluana duluai ram lai vev huri vwelvwele lalainira huri ginau duluai be nu veveana lalainira. Ataguna geki Jisas sibona mwa lalaḡo lua roroi sabuga gabe vi togo vai tuai sivi non roron̄tai lol ureure duluai huri rahuana vai tuai.]