Read Hano Mak 2 Bible Online

Mak 2 - Hano bible

Mak 2

¹Haḡe gubwen̄ gaiviha n̄an ataguna, Jisas mwa ban mulei vai Kapanium, i roroi mwa rovo be kea mwa dogo anvanua.

²Sinombu ivusi ram ḡoḡo utegaituvwa lol imwa mahavana mulei sigai vai votu matgatava. Haḡe Jisas mwa doretore lalainira huri Roroi Tavuha,

³batena atatu gaivasi ram datal atatu rebehina nu mate vai aben Jisas.

⁴Bwatuna be sinombu ivusi lol mahavana gea ram hav lai te dum wani vai aben Jisas. Haḡe ram dataloe vai amare i ram laḡas ulun imwa ram lin̄ia la batana mwa hiv alolon imwa ḡoro lolmatan Jisas.

⁵Batena Jisas mwa ḡita nora binihimwasigi garagusi mwa bevea lalai wani rebehina nu mate be, “Nituku nam binihi kaburai vuromwa.”

⁶Ira vagahin Silo rituai ran togo aia ram avo ginginira be,

⁷“Huri hano wani uhu mwa avo kungeki? Geki avoan deḡeteḡe! Atatu sihav tugu te dum kaburai vuro, God gaituvwa n̄an vi binihi kaburai dum vuro!”

⁸Jisas mwa ilo vilehi nora binihiv dahuligi mwa bevea lalainira be, “Huri hano gim binbinihi huri ginau kera geki?

⁹Behe nu maron̄ron̄o be men veveana lalai wani rebehina nu mate be, ‘Vuromwa mwa binihi kaburaiana’, sa be, ‘Tomare lai niniamwa ba lago’?

¹⁰Nav vev luae lalai kimiu giv iloe be, Inau Nitun Atatu nam haḡo roron̄o lol ureure be nav binihi kaburai vuro.” Haḡe mwa bevea lalai wani rebehina nu mate be,

¹¹“Nam bevea lalainigo tomare, lai batamwa ba dabagil mulei vai la vanuamwa.”

¹²Mahavana be kera duluai ram ḡitae, wani gea mwa domare mwa lai batana, mwa ban dagai vilehi. Kera duluai ram dan̄an̄a maragai i ram uloi roron God, ram bevea be, “Gam hav gita te hohoi ginau kunuhu!”

¹³Jisas mwa dabagil mulei mwa ban la balsin numbu gaivua Kalili. Sinombu ivusi ram mai huria i kea mwa dau bwatuna mwa bagahira.

¹⁴Mahavana be mwa lago mwa ban, mwa ḡita atatun harahara homu vwate. Ihana Livae kea nitun Alvius mwa dogo lol imwan harahara homu. Jisas mwa bevea lalainia be, “Huriau.” Livae mwa domare mwa huria darihou.

¹⁵Ataguna gea Jisas mwa ḡan ginau la imwan Livae. Ira atatun harahara homu maira vev duli ivusi ram mai ram dogo mai Jisas mai non roron̄tai.

¹⁶Ira vagahin Silo rituai gabe ira Varise, ram ḡitae be Jisas mwa ḡan ginau maira vev duli i ira harahara homu, haḡe ram hudali non roron̄tai ram bevea be, “Huri hano mwa ḡan ginau mai atatu kunira gea?”

¹⁷Haḡe Jisas mwa ron̄ dum nora avoana, mwa bevea lalainira be, “Kera gabe rebehira harova sigai alura ram hav doron te dokta. Itake kera n̄an be ram haro kera higea ram doronia. Inau nam hav mai te be namen uloi ira vavtutu take ira vev duli.”

¹⁸Lol gubwen̄ vwate ira roron̄tai non Jon Garuhisabuga mai non ira Varise ram ḡaragara vwavwa. Haḡe atatu rituai ram mai vai aben Jisas ram hudalinia be, “Huri hano ira roron̄tai non Jon Garuhisabuga mai ira Varise ram ḡaragara vwavwa take nom roron̄tai ram hav garagara vwavwa tehe?”

¹⁹Jisas mwa bwaliura mwa bevea be, Matu gim binihia be ira tausala rasav gan te ginau lol lagiana? O sigai! Be atatu mwa siv lagi mwa dogo radu mai non sinombu.

²⁰Take tarona vi mai be rav lai dagai atamwani be mwa lagi ninira la mahavana gea non sinombu rav siv garagara vwavwa.

²¹“Nu hav tavuha tehe be gov lai tavihen gav gara ba bon ute mahera la gav maleiga, bere gav gara gim rav ḡuḡu gav maleiga i gim siv lol lulu gaivua la gav maleiga.

²²Mulei ihei sihav sisiai te dum waen gara vai lol bwelehu ḡuramega, be si ḡunia, bwelehu vi mavovora i waen vi rov bwebweu kunia waen i bwelehu vi lol hantaiana, take rav sisiai waen gara vai lol bwelehu gara.”

²³Jisas mai non roron̄tai ram lago sivi umwan koni vwate lol gubwen̄ mambuharai. Non roron̄tai maro mwa ḡasira. Haḡe ram bavora ram n̄ari koni ram ḡania.

²⁴Mahavana be ira Varise ram ḡitara, ram bevea lalai Jisas be, “Gitae, nom roron̄tai ram lol n̄andu silo huri gubwen̄ mambuharai!”

²⁵Haḡe Jisas mwa bwaliura mwa bevea be, “Matu gim hav vasogoe tehe huri hano Deved nu lolia, mahavana kea maira non atatu maro nu gasira?

²⁶Kea nu dalin̄oro lol imwan God, mwa ḡan bereti gabe ram dataroi ginia lalai God. Ginau geki nu loli lol mahavana be Abiata nu vora Muai Tataroi lol mahavan gea. Hurin nonda Silo ira tataroi n̄an ram gania take Deved nu gania maira non atatu.”

²⁷Haḡe Jisas mwa bev nogonogoinia be, “Gubwen̄ mambuharai nu loliana maragai huri atatu; atatu nu hav loliana tehe huri gubwen̄ mambuharai.

²⁸Inau nitun Ratahigi haḡea ḡoro gubwen̄ mambuharai.”