Read Hano Mak 4 Bible Online

Mak 4 - Hano bible

Mak 4

¹Jisas mwa bagahi mulei la balsin numbu gaivua Kalili. Sinombu ram du dalisia maragai, i mwa ḡalo la waḡa, i mwa domahuri aluna, sinombu duluai ram du la balsin numbu gaivua.

²Kea mwa bagahira la avoan dalogai huri ginau ivusi lol non silo vagahi, mwa bevea lalainira be:

³“Giv roron̄tai! Lol mahavan vwate atatu vwate mwa ban be men ḡaburai birin koni.

⁴Mahavana gabe mwa ḡaburai biri lol talu, tavaluna ram hovi la hala, manu ram mai ram ḡan kaburainira.

⁵Tavaluna ram hovi la vatu lol tano ta tano mwa hav vora te gaivua dadariha i biri mwa dabwahu, ta tanogira nu hav roro tehe.

⁶Mahavana be alo mwa domare i mwa havwanira ta bwatuna ririgi radu i garora ram hav hiv te maragai radu vai lol tano, mwa hav n̄ava tehe ram ḡoru.

⁷Biri rituai ram hovi lol utevono lol ḡauli ram mauri i ḡauli mwa bivihira i ram hav tau te dum vwaira.

⁸Take biri rituai ran hovi lol mwasin tano, ram dabwahu ram mauri, vaivotu ram bwae: rituai vwaira n̄avul gaitolu, i rituai n̄avul gaiono, i rituai vudolua.”

⁹Haḡe Jisas mwa bev nogo nogoinia be, “Giv roron̄tai, be bweromiu abena!”

¹⁰Mahavana be Jisas mwa do gahena, kera rituai gabe ran ron̄oe ram mai vai abena mai ira roron̄tai han̄vul domwan gairua ram hudalinia be men vev sinen avoan dalogai be nu vevea.

¹¹Haḡe mwa avkarira be, “Mwa hogoi lalai kimiu be gimen ilo ginau ririhai huri rahuan gara gabe God mwa Ratahigi alolona. Take lalainira ata avare ram ron̄ ginau duluai gin avoan dalogai,

¹²huri be, ‘Rav gitae ba ḡitae, take rasav gita te batoia; rav roron̄tai ba roron̄tai, take rasav ron̄ te batoia. Bereva ram ron̄ batoia ba dabagilu huri God, i vi binihi kaburai vurora.’”

¹³Haḡe Jisas mwa hudalinira be, “Matu gim hav ilo te sinen avoan dalogai uhu? Be kunia giv ilo hanini avoan dalogai dodolua?

¹⁴Atatu mwa gaburai biri mwa riv avoana non God.

¹⁵Atatu rituai ran ḡun biri gabe ram hovi la hala; batena gabe ram ron̄ avoana, Setan mwa mai mwa lai dagainia.

¹⁶Atatu rituai ran ḡun biri gabe ram hovi la ulun vatu gabe tano tirigi aluna, mwa du huri ira hei ram lai avoana gin samsamwara lol mahavana be ram ron̄oe.

¹⁷Take avoana mwa hav garoga te alolora, ram davuha mahavan vwelvwele. La mahavana be ram habwe kalkaliana, i mwa lol bonogainira bwatuna avoana, ram hovi darihou.

¹⁸Atatu rituai ran kun biri gabe ran hovi lol ḡauli. Kera geki ram ron̄ avoana,

¹⁹take lalaḡova ata lol ureure, kun silo tabetabe huri roso, i ginau dorodoron rituai ram hae bul maira i ram bivihi avoana i mwa hav vwavwae te dum.

²⁰Take atatu rituai kun biri gabe nu gaburaiana lol mwasin tano, kera gabe ram lai avoana i ram ḡoḡoi ḡoroe i ram bwae rituai n̄avul gaitolu, rituai n̄avul gaiono i rituai vudolua vatuvwa.”

²¹Jisas mwa avo radu gin avoan dalogai mwa bevea be, “Matu atatu mwa dau hohoi bulu aten gete sa aten bata? Matu si hav taua tehe la mwasin tanona?

²²Ginau mwa hav hili te hohoigi be mwa hili ta vi seseraiana radu, ginau gabe mwa do dahuligi vi visirai lol gigita.

²³Giv ron̄oe, be atatu bwerona abena na ron̄oe ginia.”

²⁴Haḡe mwa bevea lalainira be, “Giv lai ḡoḡo ginau gabe gin ron̄oe; tovtovon silo gim bevegi atatu ginia God vi vevegi mulei kimiu ginia ta vi vora gaivua liu nin kea.

²⁵Atatu gabe non ginau sigai, vi lai ginau duluai dagai ninia son̄o be mwa haḡo hano tirigi maia ta vi lai dagai n̄otoe.”

²⁶Jisas mwa bev rahurahuinia be, “Ute Ratahigi non God huri Rahuan Gara gabe mwa Ratahigi ḡoro non sinombu alolona kun geki. Atatu vwate mwa ḡaburai biri lol taluna.

²⁷Bon̄i mwa maturu, mwa mamata uterani, lol mahavan gea biri ram dabwahu i ram mauri. Take mwa hav iloe tehe be ram mauri hanigi.

²⁸Tano mau sibona mwa lol ririvuana ram mauri vaivotu ram bwae; muana mwa matai siu, vuvuri bwatun bagana mwa bisirai, ataguna mwasina mwa bisirai lol bwagavina.

²⁹Mahavana be koni mwa metua atatu gea mwa dau bwatuna mwa n̄aria i mwa dau dagainia lol tanona bwatuna taron harahara mwa mai?”

³⁰Haḡe Jisas mwa bevea be, “Tas vev haninia be ute Ratahigi non God huri rahuan gara gabe mwa Ratahigi ḡoro non sinombu alolona nu ḡun hano? Hava avoan dalogai nu vavtutu huria?

³¹Mwa bevea be nuḡun birin ramute, biri tirigi maragai lol ureure. Atatu mwa laia i mwa rivua lol tano.

³²Ataguna gea mwa mauri mwa mai gi gai gaivua lol gai rivrivu duluai. Kea mwa sogai lua rarana ivusi manu ram mai ram dau gairan̄osira la rarana.”

³³Jisas mwa doretore lalai sinombu gin avoan dalogai ivusi kunira geki, la hala be rav ron̄ batoi dumwira.

³⁴Mwa hav avo te dagai gin avoan dalogai, mwa avo lalainira gin avoan dalogai duluai, take mahavana be kea mwa dogo gahena maira non roron̄tai mwa siv seserai binihiva ata lol avoana duluai lalainira.

³⁵Haḡe ute ravrav lol gubwen̄ n̄an kea. Jisas mwa avo lalai non roron̄tai mwa bevea be, “Tan van vai haltavalun numbu gaivua.”

³⁶Haḡe kera ram ban dagai nin sinombu. Non roron̄tai ram ḡalo la waḡa be Jisas nu to huba aluna i ram laia bul maira. Waḡa dodolua mulei ram du aia.

³⁷Haḡe vilehi n̄an lan̄ gaivua mwa domare haḡe rebu ram sieri alun waḡa i mwa bavora be men masiri gin tumu bwatuna mwa utu tahi.

³⁸Jisas mwa en mwa maturu la n̄olin waḡa mwa dau mahuri bwatuna la “Pwatlun̄a.” Ira roron̄tai ram bamatae ram bevea be, “Vagahi, gom hav gitae tehe be mwa abena be tamen mate?”

³⁹Haḡe Jisas mwa domare mwa borotai ḡoro lan̄i mwa bevea be, “Nu nogo!” I mwa borotai ḡoro rebu be, “Tamwata!” Haḡe lan̄i mwa mahuri i mwa daro mulei.

⁴⁰Haḡe Jisas mwa bevea lalainira non roron̄tai be, “Huri hano gim matagu? Matu nomiu binihimwasigi garagusi sigai?”

⁴¹Take ram matagu maragai, ram bavora ram bevea mau ginira be, “Ira tua, hava atatu geki? Gabe lan̄i mai rebu ramuru ron̄oe saraḡo!”