Read Hano Mak 5 Bible Online

Mak 5 - Hano bible

Mak 5

¹Haḡe Jisas mai non roron̄tai ram botu haltavalun numbu gaivua Kalili lol vanua Kerasa.

²Ataguna be Jisas mwa mwalue nin waḡa, kea mwa bisogari bul mai atatu gabe mwa bwihavare nin malan̄an atatmate. Wani uhu vui hantai alolona

³kea mwa dogo lol malan̄ara atatmate. Atatu ram hav mom bauhi te dumwia gin gaotalai;

⁴vaivusi bwalagena gairua mai limana saraḡo mwa bauhian batugehi tagaro take mwa lol n̄andu gao talai i mwa momogai lok aean gabe ran lok batugehi bwalagena ginia. Atatu ram hav mom dadariha tehe mai non muramura be rav to ḡoro dumwia.

⁵Vataha bon̄i mai rani mwa lagoi lolon malan̄an atatmate duluai, mwa haharigi lalavoa i mwa dav rebehina gin vatu.

⁶Kea nu tu hautu batena mwa ḡita Jisas; mwa rovo, vaivotu mwa sisiabwau hurin bwalagena,

⁷mwa haharigi gin silo gaivua mwa bevea be, “Jisas Nitun God Holomare Hae! Gom doron be gov lol hano maiau? La ihan God, nam hudalinigo be gosav vevegiau tehe!”

⁸(Mwa avo kun uhu bwatuna Jisas nu vevea lalainia be, “Vui hantai bwihavare nin atatu uhu!”)

⁹Haḡe Jisas mwa hudalinia be, “Ihamwa ihei?” Atatu gea mwa bwaliua be “Ihaku ‘Mob.’ Kamai ivusi!”

¹⁰Vui hantai mwa hudali Jisas be si hav hora te dagainira nin vanua gea.

¹¹Aia vatugin boe ivusi nu van̄aniana la balsin vusi.

¹²Haḡe vui hantai ram hudali Jisas, ram bevea be, “Hora kamai vai lol boe, be gav haroro alolora.”

¹³Haḡe mwa mahin̄ainira, vui hantai ram bwihavare nin atatu gea i ram haroro lol boe duluai. Vatugigi duluai kun vasan̄val varua ram rovo vai la balsin bahara vai lol numbu gaivua i ram mate duluai.

¹⁴Kera gabe ran gitaḡoro boe duluai gea ram romaragai ram ban vai lol bwatutun vanua i abera gabe ram gitaḡoro ute loloara ram bat avoana huri hano be nu loli. Haḡe sinombu duluai ram ban be ramen gita havanau gabe nu loli,

¹⁵i batena ram mai aben Jisas ram ḡita atatu gabe vui hantai ran tu alolona. Kea mwa do aia, nu sagasaga i binihina nu mai tavuha mulei huba; i kera duluai ram matagu.

¹⁶Kera gabe ran gitae ram bevea lalai sinombu huri ginau gabe nu loli lalai wani gabe vui hantai ran tu alolona, i huri boe duluai.

¹⁷Haḡe kera ram dau bwatuna ram hudali Jisas be men van dagai nin vanuara.

¹⁸Haḡe Jisas mwa ḡalo la waḡa vwate. Atatu gabe vui hantai ran mwalue ninia mwa hudalinia be, “Mahin̄a be nav van bul maigo!”

¹⁹Take Jisas mwa bisigai. Mwa bevea lalainia be, “Gov tabagil mulei vai la imwa aben ira tuamwa ba bevea lalainira huri havanau gabe Ratahigi nu lolia lalainigo, kun hanigi kea mwa ḡita dabego lol non sine hagavi.”

²⁰Atatu gea mwa ban sivi Bwatutun Vanua Han̄vulu mwa bev lua ginau gabe Jisas nu lolia lalainia; kera duluai gabe ram ron̄ duluai ginau uhu ram dan̄an̄a maragai huria.

²¹Jisas mwa dabagilu mulei vai haltavalun numbu gaivua. Aia la balsin numbu sinombu gaivua ram mai ram ḡoḡo dalisia.

²²Jaerus kea lavoa vai lol imwa tataro mwa hamai, mahavana gabe mwa ḡita Jisas kea mwa hivbahudui lol bwalagena la lolmatana

²³mwa hudalinia gin binihimarahi be, “Nituku vavine tirigi mwa haro maragai. Nam hudali maragainigo huria be gov tau limwamwa aluna, i kea vi rahu i vi togo mulei!”

²⁴Haḡe Jisas mwa ban bul maia. Sinombu ivusi maragai ram ban bul mai Jisas i ram bivirira ataguna i ram ban ḡoro lolmatana i dalisia duluai.

²⁵Alolora vavine vwate mwa haro maragai gin daga rovrovo huri taulu han̄vul domwan gairua,

²⁶ira matatavwaga ram lol ron̄oe be rav varahua ta mwa hav dumwi tehe, rahuna mwa hantai liu nin amua. Mahavana ivusi nu gitara huria ta ram hav bului te dumwia, non homu nu nogo huria.

²⁷Kea mwa ron̄oe huri Jisas i mwa mai bul mai sinombu ataguna,

²⁸mwa bevea mau sibona be, “Be nas sibweri dum gaisagana, nas rahu mulei.”

²⁹Haḡe kea mwa sibweri ḡeregeren gaisagan Jisas i daga rovrovo mwa lin̄ia darihou, i kea mwa ron̄ batoia lol rebehina be mwa rahu nin non harova.

³⁰Haḡe vilehi Jisas mwa ron̄ batoia be muramura mwa mwalue ninia. Haḡe mwa ban burigai lol sinombu mwa bevea be, “Ihei mwa sibweri gaisagaku?”

³¹Take non roron̄tai ram bwaliua ram bevea be, “Gom ḡitae be sinombu ivusi ram bivirigo, huri hano gom bevea be ihei mwa sibwerigo?”

³²Take Jisas mwa ḡarere dalisira be men habwea be ihei mwa sibweria.

³³Haḡe vavine mwa binihi dum havanau gabe nu loli lalainia, kea mwa mai gin mataguana gaivua mwa hivbwaubwau hurin bwalagena, mwa bev lua mwasigi huri ginau gabe nu loli.

³⁴Haḡe Jisas mwa bevea lalainia be, “Nituku, nom binihimwasigi garagusi mwa barahugo sibomwa. Vano lol tamwata, i gov rahu nin nom harova.”

³⁵Mahavana be Jisas mwa bev ginau uhu, horata non Jaerus ram mai aben Jaerus ram bevea lalainia be, “Nitumwa daulato nu mate. Gosav lol te bidoi vagahi huria?”

³⁶Jisas mwa hav roron̄tai te hano ram bevea, take mwa bevea lalainia be, “Gosav matagu tehe, ta gov binihimwasigi n̄an!”

³⁷Kea mwa hav mahin̄a te be atat dodolua rav van bul maia take Pita i Semes bul mai tuana Jon.

³⁸Kera ram botui imwan lavoa Jaerus i Jisas mwa ḡita ginau duluai gabe mwa loli, deiana mai sosobweroan gaivua.

³⁹Kea mwa haroro mwa bevea lalainira gabe ram dei be, “Hurihano gim sosobwero? Gim dei huri hano? Naturigi mwa hav mate tehe take mwa maturu.”

⁴⁰Take ram manuhia, i mwa ḡoro luara duluai vai avare, mwa lai taman naturigi mai ratahina i non roron̄tai gaitolu ram haroro lol vwavwan imwa gabe naturigi mwa en aia.

⁴¹Mwa haḡoe la limana, mwa bevea lalainia be, “Talita kum,” binihiva be, “Vavin kolo, tomare nam bevea lalainigo!”

⁴²Kea mwa domare darihou i mwa lago. (Tauluna kun han̄vul domwan gairua.) Mahavana be ram ḡita ginau uhu ram dan̄an̄a maragai!

⁴³Jisas mwa av wasi lalainira be rasav vevea te lalai irahei dolua, i mwa bevea be, “Gin lai ginaganiana lalainia ba vi gania.”