Read Hano Mak 6 Bible Online

Mak 6 - Hano bible

Mak 6

¹Jisas mwa domare nin ute gea mwa ban mulei vai la vanua bwatutuga gabe vanuana, non roron̄tai ram huria.

²Haḡe la gubwen̄ mambuharai kea mwa dau bwatuna mwa bagahi la imwa tataro. Sinombu ivusi ran tu aia, batena be ram ron̄oe kera duluai ram dan̄an̄a ram bevea be, “Mwa lai ginau duluai geki behe?” Hava, “Mataisao uhu be mwa laiana lalainia? Kea mwa lol dum hanini ginau dan̄an̄a?

³Mwa hav vora te kea atatun vohavoha imwa gabe nitun Mere, ira tuana gabe Semes, Josep, Judas mai Saimon? Ira hogosina gabe ram du teti?” Haḡe kera ram barihainia.

⁴Haḡe Jisas mwa bevea lalainira be, “Atatun vevsera ram laiḡoḡoe la vanua dodolua, ta mwa hav vora te la mwasin bwatutun vanuana, vai votu ira ataluna mai ira tuana.”

⁵Kea nu hav lol te dum ginau dan̄an̄a aia, take nu sibweri ira harova, nu hav vora te ivusi i mwa lol barahura.

⁶Kea mwa dan̄an̄a maragai, bwatuna be nora binihimwasigi garagusi sigai. Haḡe Jisas mwa ban lol vanua ririgi aia, mwa bagahi sinombu.

⁷Kea mwa uloinira han̄vul domwan gairua i mwa hora luara gairuruai. Mwa lai lalainira roron̄o ḡoro vui hantai.

⁸I mwa bevea lalainira, be, “Gisav haḡo te havanau mai kimiu lol nomiu lagoana ta gaisigomiu n̄an gina ganiana sigai gisav haḡo te homu lol tan̄an gaisagamiu.

⁹Giv saga nomiu sandol ta gisav saga te mulei gaisagan bobo dolua.”

¹⁰Mwa bevea mulei lalainira be, “Behe tehe ram lai ḡoḡo kimiu giv togo lol imwa gea vaivotu giv derai vanua gea.

¹¹Be gim mai lol ute gabe ram hav lai te ḡoḡo kimiu sage ram hav ron̄ te silomiu batena be gim lin̄ ute gea giv darudaruai kaburai taniavun bwalagemiu. Geki vi vora dovan̄an̄a lalainira!”

¹²Kera ram mwalue, ram doretore be sinombu rav binihi leahi nin vurora.

¹³Ram ḡoro lua vui hantai ivusi, i ram sasav rebehin ira harova ivusi gin hun gai oliv i ram rahu mulei.

¹⁴Haḡe Ratahigi lavoa Herod mwa ron̄ ginau duluai kera uhu bwatuna be roroi huri Jisas nu lon̄ahi ute duluai. Sinombu rituai ram bevea be, “Jon Garuhisabuga mwa dabagilu mulei vai lol rahuana! Bwatuna higea kea mwa haḡo muramura uhu be men lol ginau dan̄an̄a.”

¹⁵Rituai be, “Kea Elaija.” Rituai ram bevea be, “Kea atatun vevsera nu ḡun tuara vwate ninira gabe ran mai amua.”

¹⁶Mahavana be Herod mwa ron̄oe mwa bevea be, “Jon Garuhisabuga gea! Nan tav roto bwatuna ta mwa mai mulei vai lol rahuana!”

¹⁷Herod haḡea sibona nu vevea be rav haḡo batugehi Jon ba bauhia ba daua lol imwa vauvauhi. Herod nu lol ute kunia bwatuna Herodias, gabe nu laia gi tasalana, kea tasalan tuana Vilip.

¹⁸Jon Garuhisabuga nu vevea vaivusi lalai Herod mwa bevea be, “Nu hav tavuha tehe be gom lai tasalan tuamwa!”

¹⁹Herodias mwa lolhoroi Jon i mwa ḡarogaro be vi wehi bamatea, take mwa hav habwe te dum mahavana bwatuna Herod.

²⁰Herod nu matagun Jon bwatuna nu iloe Jon atat vavtutu i atat sabuga, mwa hav doron te be vi lol hano lalainia. Kea mwa doron be vi roron̄tai hano mwa bevea. Gaituvwa n̄an be mwa hav ron̄ te mwandavuha gin ginau mwa bevea take kea mwa ḡoḡoi ḡoro silona.

²¹Geki gaha mahavana tavuha lalai Herodias. Batena be gubwen̄in vorana non Herod mwa bulbulu, Herod mwa lol ginaganiana gaivua, mwa ware ira lalavoa ata lol Kavman mai ira lavoa ḡoro atatun bwaloana mai ira lavoa ata lol vanua Kalili.

²²Nitun Herodias daulato mwa haroro mwa savwogoro, Herod maira non tausala ram samsamwara huria. Haḡe ratahigi lavoa mwa bevea lalai daulato be, “Gom doron be gov lai hano? Nav lai havanau te lalainigo be gov hudaligi huria.”

²³Haḡe mwa av ḡaragara vaivusi lalainia be, “Havanau tehe gov urae niniau nav laia lalainigo, vaivotu udun noḡu ute Ratahigi.”

²⁴Haḡe daulato mwa ban mwa hudali ratahina be, “Nav ura havanau?” Ratahina mwa bwaliua mwa bevea be, “Gov ura bwatun Jon Garuhisabuga.”

²⁵Haḡe daulato mwa ban vilvilehi vai aben Ratahigi lavoa Herod mwa bevea lalainia be, “Nam doron be gov lai bwatun Jon Garuhisabuga lol gete lalaiau uhugaha.”

²⁶Avoana non daulato uhu mwa lol Herod mwa lolovono, take sihav visigai te dum bwatuna non avoan ḡaragara la lolmatan non tausala.

²⁷Haḡe mwa hora non atatun bwaloana vwate gabe mwa ḡitaḡoro imwa vauvauhi, haḡe mwa bano mwa haroro lol imwa vauvauhi, i mwa dav roto bwatun Jon;

²⁸haḡe mwa mai maia lol gete i mwa laia lalai daulato, i kea mwa laia lalai ratahina.

²⁹Batena ira roron̄tai non Jon ram ron̄oe, ram mai ram lai dagai rebehina ram davinia.

³⁰Ira hala ram dabagil mulei vai aben Jisas ram bev seserai ginau duluai gabe ran lolia i ran vagahi aluna.

³¹Sinombu ivusi be ram mai i ram bano, i mahavana sigai lalai Jisas maira non roron̄tai be rav gan dum ginau. Mwa bevea lalainira be, “Tan van dagai nin teti vai lol ute vwate be tav to dum gaheda, i giv mambu.”

³²Haḡe kera ram ḡalo la waḡa mau gahera ram ban vai la vanua vuroi.

³³Sinombu ivusi ram ḡitara be ram bano i ram ilo darihoinira be kera ira hei. I kera ivusi ram mwalue nin bwatutun vanua ririgi ivusi ram ban la hala amua ninira ram botu lol ute gabe Jisas maira non roron̄tai ram ban vai aia.

³⁴Batena be Jisas mwa bute nin waḡa mwa ḡita sinombu ivusi uhu, mwa ron̄ mwahantai hurira, bwatuna be kera ran ḡun sipsip gabe radaiḡoro sigai. Haḡe kea mwa dau bwatuna mwa bagahira gin ginau ivusi.

³⁵Haḡe ute nu ravravi huba, non roron̄tai ram bevea lalainia be, “Ute mwa bon̄ mwa bano huba, i teti ute vuroi.

³⁶Nu tavuha be gov hora dagai sinombu, be ramen van vai loloara i vai lol vanua ram dogo daldalisi, ba bol gara ginau.”

³⁷Jisas mwa bwaliura mwa bevea be, “Kimiu sibomiu giv van̄anira.” I ram hudalinia be, “Gom doron be gamen van ba bol gara ginau gin vatlegiga vasan̄vul vahan̄vul varua ba ban̄anira ginia?”

³⁸Haḡe Jisas mwa hudalinira be, “Bereti gaiviha abemiu? Gin van ba ḡitae.” I ram habwea ram bevea be, “Bereti gailima mai ige gairua.”

³⁹Haḡe Jisas mwa bevea lalai non roron̄tai be rav hora sinombu be rav to ata lol tatan̄ana lol mwanea.

⁴⁰Haḡe sinombu duluai ram domahuri baravarai la tatan̄ana, rituai vudolua rituai n̄avul gailima.

⁴¹Haḡe Jisas mwa haḡo bereti mai ige gairua, mwa dada vai lol ute atamare mwa avkari God hurira, mwa biha bora bereti mwa hagainia lalai non roron̄tai be rai betea lalainira. I kea mwa harabora ige gairua mulei lalainira duluai.

⁴²Kera duluai ram ḡania vaivotu ram ḡubwa.

⁴³Vuvuri ira roron̄tai ram haraḡoḡo mamarahan bereti i ige ram hogon bamasiri gete han̄vul domwan gairua.

⁴⁴Atamwani gabe ran gania vasan̄vul valima.

⁴⁵Darihou Jisas mwa suvwai non roron̄tai be rav ḡalo la waḡa i rav van dotomua ninia vai Betsaeda, haltavalun numbu gaivua, mahavana gabe kea mwa hora dagai sinombu.

⁴⁶Ataguna be kea mwa bev vituleiana lalai non sinombu, kea mwa ban dagai mwa hae alun vusi huri tataro.

⁴⁷Ute nu ravrav huba i waḡa mwa do bora sinen numbu gaivua, batena Jisas gahena mwa do la vanua.

⁴⁸Kea mwa ḡitae be non roron̄tai ram ron̄ mwahantai gin huana, bwatuna be ram hua son̄tai lan̄i; mahavana kun davolan alo gaitolu mai alo gaiono mabon̄i batena mwa mai vai abera, mwa lago la ulun wai.

⁴⁹Nu lago be men hara liura ta ram ḡitae be mwa lago la ulun wai, ram ḡitae i ram bevea be, “Atmate!” I ram haharigi.

⁵⁰Kera duluai ram matagu maragai batena be ram ḡitae. Jisas mwa avo lalainira darihou be, “Gisav matagu tehe!”

⁵¹Haḡe kea mwa ḡalo la waḡa bul maira, i lan̄i mwa mosi. Ira roron̄tai ram dan̄an̄a maragai,

⁵²bwatuna be ram hav ilo te sinen bereti gabe nu van̄an sinombu ginia; binihira mwa hav lai te dumwia.

⁵³Kera ram mai tuhi numbu gaivua i ram mai la vanua Kenasaret, aia ram bauhi batugehi waḡa.

⁵⁴Batena ram mai nin waḡa sinombu ram ḡita batoi Jisas darihou.

⁵⁵Haḡe ram rovo lol vanua duluai, ram lai ira harova be ram eno la niniara vai abena, bwatuna ram iloe be mwa do behe.

⁵⁶Jisas mwa ban lol vanua ririgi ivusi mai bwatutun vanua mai uteloloara ivusi, i sinombu ram lai ira harova ivusi vai lol saran volvoligi, ram hudalinia be vi mahin̄a be ira harova rav sibweri ḡereḡeren gaisagana; kera gabe ran sibweria ram rahu duluai.