Read Hano Mak 8 Bible Online

Mak 8 - Hano bible

Mak 8

¹Haḡe nu hav vora te n̄ava ataguna gea, sinombu ivusi mulei ram mai bulbul utegaituvwa. Mahavan gea ginaganiana mulei sigai be ramen gania, haḡe Jisas mwa uloinira non roron̄tai vai abena mwa bevea be,

²“Nam ron̄ mwahantai huri sinombu geki, bwatuna ram dogo maiau huri gubwen̄ gaitolu huba ta kadogaha ginaganiana sigai hurira.

³Be nas hora muleinira vai la vanuara be ram hav gan te ginau matara vi meto la hala, bwatuna kera rituai ram mai hautu.”

⁴Non roron̄tai ram hudalinia ram bevea be, “Tav habwe dum ginaganiana halabehe lol vanua vuroi geki be tamen van̄an sinombu duluai uhu ginia?”

⁵Jisas mwa hudalinira be, “Bereti gaiviha abemiu?” Haḡe non roron̄tai ram bwaliua ram bevea be, “Gaibitu.”

⁶Haḡe mwa bevea lalai sinombu be ramen to ata lol tano. Haḡe kea mwa lai bereti gaibitu mwa avkari God hurira, i mwa biha borara, mwa hagainia lalainira non roron̄tai be ramen betea lalai sinombu; haḡe ira roron̄tai ram lol kunia.

⁷Kera ran haḡo ige rituai mulei. Jisas mwa lai avoan avkari hurira i mwa bevea lalainira non roron̄tai be rav betea.

⁸Atatu duluai ran gania vava ram ḡubwa kera kun vasan̄vul vavasi.

⁹Haḡe ira roron̄tai ram hogon ḡoḡo mamarahana gabe ran hovi ram hogon bamasiri gete gaibitu ginia. Ataguna Jisas mwa siv hora dagainira

¹⁰i kea mwa ḡalo vilehi la waḡa mai ira roron̄tai ram ban vai lol vanua duluai gabe ram dogo lol ara non Dalmanuta.

¹¹Ira Varise rituai ram mai aben Jisas ram bavora ram bigaigai maia. Ram doron be ramen sania, i ram hudalinia be men lol dovon̄ana vwate be men lol seserai muramura non God.

¹²Take Jisas mwa bwaliura be, “Huri hano sinombu ata garigi ram hudaligi huri dovon̄a? Sigai, nam bevea lalai kimiu! Dovon̄a kunia sihav lolian tehe lalai sinombu kera geki!”

¹³Haḡe mwa bisdagai ninira, mwa ḡalo mulei la waḡa, i ram ban mulei vai haltavalun numbu gaivua.

¹⁴Ira roron̄tai ran vinihi malioi be ramen haḡo bereti mulei rituai be vi dadariha, ran haḡo bereti gaituvwa n̄an la waḡa.

¹⁵Haḡe Jisas mwa bevea lalainira non roron̄tai be, “Giv gita ḡoro kimiu gin is non ira Varise mai Herod.”

¹⁶Kera ram bavora ram avo mau ginira be, “Mwa bev ginau uhu bwatuna be tam hav haḡo te bereti.”

¹⁷Jisas mwa ilo batoi havanau ram bevea, kea mwa hudalinira mwa bevea be, “Hurihano gim biavoavo huri be gim hav, haḡo te bereti? Gim hav iloe tehe sa gim hav gita te batoia radu? Binihimiu sigai?

¹⁸Matamiu abena, matu gim hav gita te dumwia? Bweromiu abena matu gim hav ron̄ te dumwia? Matu gim hav binihi te dumwia

¹⁹be batena nan vihabora bereti gailima huri sinombu vasan̄vul valima? Gete gaiviha gabe gin hogon bamasirira gin mamarahana?” Haḡe ram bwaliua be, “Han̄vul domwan gairua.”

²⁰I Jisas mwa hudaligi mulei be, “Batena be nan vihabora bereti gaibitu huri sinombu vasan̄vul vavasi. Gete gaiviha gin hogon bamasirira gin mamarahana gabe nu hovi?” Haḡe ram bwaliua be, “Gaibitu.”

²¹Haḡe mwa hudalinira mwa bevea be, “Matu gim hav gita te batoia radu?”

²²Haḡe ram botu Betsaeda aia sinombu rituai ram lai matagara vwate vai aben Jisas ram hudalinia be vi sibweria.

²³Jisas mwa haḡo liman matagara i mwa lagoi luae nin vanua. Jisas mwa lodo vai alun matan matagara, mwa dau limana aluna mwa hudalinia be, “Gom ḡita dum ginau?”

²⁴Haḡe matagara mwa dada amare mwa bevea be, “Uwe nam ḡita dum sinombu ram lago, take ran ḡun gai.”

²⁵Haḡe Jisas mwa sibweri matana mulei, uhugaha wani gea mwa ḡita ute mwa wasi, matana mwa davuha mulei, i kea mwa ḡita tavuhai mulei ute.

²⁶Haḡe Jisas mwa hora muleinia mai avoan wasi be, “Gosav tabagil te mulei vai la vanua.”

²⁷Haḡe Jisas maira non roron̄tai ram ban dagai vai lol vanua ririgi aben Sisaria Vilipae. La hala mwa hudalinira be, “Giv vevea lalaiau, sinombu ram beveau be inau ihei?”

²⁸Haḡe ram bwaliua be, “Atatu rituai ram bevea be giḡo Jon Garuhisabuga. I rituai ram bevea be giḡo Elaija, take rituai ram bevea be giḡo atatun vevsera vwate.”

²⁹Haḡe mwa hudalinira be, “Matu kimiu gim bevea be inau ihei?” Haḡe Pita mwa bwaliua be, “Giḡo Mesaea.”

³⁰Haḡe Jisas mwa bisigai ginira mwa bevea be, “Gisav vevea te lalai ira hei dolua.”

³¹Haḡe Jisas mwa bavora mwa bagahira non roron̄tai mwa bevea be, “Nitun Atatu vi ron̄ ḡagarasi maragai, ira bwatmetua maira muai tataroi maira vagahin Silo rav varihainia. Kera rav vevegia huri mateana, ta atagun gubwen̄ gaitolu kea vi tomare mulei vai lol rahuana.”

³²Jisas mwa bev seserai didininia lalainira. Take Pita mwa uloi dalevainia mwa bevea lalainia be, “Vina Ratahigi sihav ḡunia te lalainigo.”

³³Take Jisas mwa ban burigai mwa ḡita non roron̄tai mwa bevea lalai Pita be, “Visdagai niniau, Setan, nom binihiva non atatu, mwa hav vora te nin God!”

³⁴Haḡe Jisas mwa ware sinombu mai non roron̄tai vai abena mwa bevea lalai nira be, “Be ihei mwa doron be vi huriau, wani gea vi derai non doroniva sibona. Haḡe vi haḡo domarei non volovolo ba huriau.

³⁵Huri be ihei mwa doron be vi varahu rahuna sibona, wani gea vi lin̄ rahuna i ihei be mwa lin̄ rahuna huriau mai leo tavuha, vi varahua.

³⁶Matu be atatu si lai dum ginau duluai lol ureure geki bwatuna kea nu lin̄ kaburai rahuna huria, kea vi lai dum havanau ninia? Sigai!

³⁷Ginau sigai be atatu vi lai dumwia be vi lai mulei rahuna.

³⁸Inau Nitun Atatu nav mai vai non̄oiha mai noḡu enjel mai ginau tavtavuha be tamaḡu vi laira lalaiau. La mahavana gea inau nav tavwe vataha atatu hurin nora lalaḡova. Be, atatu mwa busbusi giniau mai noḡu silo vagahi abera sinombu hantai be ram dogo garigi be God sigai abera, kunia inau mulei Nitun Atatu nav busbusi ginia batena nav mai mai ira enjel sabuga, lol sarisarin Tamaḡu.”