Read Hano Luk 12 Bible Online

Luk 12 - Hano bible

Luk 12

¹Haḡe lol mahavan gea, sinombu vasan̄vul vaivusi ram ḡoḡo ute gaituvwa, ute gea tirigi, ram bivirira i ram bavarahi mulei bwalagera. Haḡe Jisas mwa avo amua lalai non roron̄tai mwa bevea be, “Giv matai ḡoro is non ira Varise gabe alen̄ hoḡoiḡoro.

²Havanau tehe be nu nubwa ḡoroana vi vugeana, i ginau dahuligi duluai vi lol seseraiana.

³Havanau tehe be gim avoinia lol ute meto vi ron̄oana lol ute ran maita, i havanau tehe gabe gim n̄utu hurira lol bweron atatu lol vwavwan imwa gahemiu vi vevean lua la ulun imwa amare.”

⁴“Nam bevea lalai kimiu noḡu buluana be, gisav mataguinira tehe gabe ram wehi rebehi take rasav lol te hano liu ataguna.

⁵Nav vev luae lalai kimiu wani gabe giv mataguinia. Giv matagui God, kea gabe ataguna be mwa wehi kimiu vi vohai kimiu vai lol gabi. Mwasigi nam bevea lalai kimiu be, giv mataguinia!”

⁶“Matu lagalaga gailima sihav salei te dumwira huri pen meto gairua? God mwa hav vinihi te malioi vwate ninira.

⁷Vaivotu be ilun bwatumiu nu vuluiana vatuvwai huba. Gisav matagu tehe; kimiu gin marahi liu nin lagalaga ivusi!”

⁸“Nam bev mwasigi lalai kimiu be ihei tehe si vev luae be kea noḡu atatu, inau Nitun Atatu nav lol kunia mulei lalainia la lolmatan ira enjel non God.

⁹Take be ihei tehe mwa bevea lalai sinombu be kea mwa barihaiau, inau Nitun Atatu nav varihainia mulei la lolmatan ira enjel non God.”

¹⁰“Ihei tehe mwa bev hantaiau Nitun Atatu vi binihi kaburaiana. Take ihei tehe be mwa av hantai vai alun Vui Sabuga si hav binihi te dum kaburaiana.”

¹¹“Batena be rav lai kimiu be rav vevegi kimiu lol imwa tataro sage la lolmatan ira tomuai vevev sa mai ira lavoa gisav matagu tehe be giv vev hano sa giv tuḡoro kimiu kunhanigi.

¹²Bwatuna be Vui Sabuga vi vagahi kimiu lol mahavana gea huri hano be giv vevea.”

¹³Haḡe tuara vwate alolora sinombu mwa bevea lalai Jisas be “Vagahi vevea lalai tuaku be men harabora roson tamamaru be nu lin̄ia lalai kamaru.”

¹⁴Haḡe Jisas mwa bwaliua mwa bevea be, “Noḡu buluana, ihei nu lai roron̄o lalaiau be nav vevegi sa nav harabora roson tamamiru lalai kimiru?”

¹⁵I mwa bev rahurahuinia lalainira duluai be, “Giv mataiḡoro i giv gitaḡoro kimiu nin lalan̄an bugurana, bwatuna mwasin rahun atatu mwa hav mai tehe nin rosona, gaituvwa n̄an be rosona gaivua.”

¹⁶Haḡe Jisas mwa bev mulei avoan dalogai uhu, mwa bevea be, “Ratahigin roso vwate non tano abena gabe mwa lol ririvuana mwa bwaevwae tavuha.

¹⁷Kea mwa bavora mwa binihia ma sibona be, ‘Ute sigai be namen tau bilak hinaga alolona. Nav lol hano?’

¹⁸Mwa binihia sibona mwa bevea be, ‘O, geki ginau be nav lolia. Nav sari dagai imwan noḡu ginaganiana n̄oto i nav haḡo heheira lalavoa liu i aia nav tau bilaku koni mai hinaga dodolua alolora.

¹⁹Haḡe nav vevea lalaiau siboku be, Gom davuha maragai! Gom haḡo duluai ginau tavtavuha gom doronira huri taulu ivusi. Van ḡoḡonai mai rahumwa, gov gangan, gov mwinmwin, i gov lol samsamwarainigo sibomwa!’

²⁰Take God mwa bevea lalainia be, ‘Giḡo taltaleana! Garigi bon̄i rahumwa vi nogo; vuvuri ihei vi lai ginau duluai gabe gom lalaḡoinira hurigo sibomwa?’ ”

²¹Haḡe Jisas mwa bev nogonogoinia be, “Geki haḡea vi ḡunia lalai irahei gabe ram dau ḡoḡo rosora hurira sibora take ram hav rosoga tehe la lolmatan God.”

²²Haḡe Jisas mwa bevea lalai non roron̄tai be, “Nam bevea lalai kimiu be gisav binihi te dadaligi lol nomiu togoana, be giv gan hano huri be giv rahu sa huri gaisaga gim doronia huri rebehimiu.

²³Giv iloe be rahumiu nu liu nin ginaganiana i rebehimiu nu marahi liu nin gaisaga.

²⁴Giv taria alun manun mahava, kera ram hav ririvu tehe sage tam hav lai te ginaganiana vai laimwa, imwara sigai sage tanon nora ginaganiana sigai; take God mwa ban̄anira duluai!

²⁵Matu gim binihia be batena be atatu mwa binihi dadaligi huri rahuna be vwelvwele n̄ano, matu kea vi lol dum rahuna vi n̄ava la alen̄a gea? Sigai len̄len̄a!

²⁶Be gom hav lalaḡoi te dum ginau tirigi kun geki, huri hano gim binihi dadaligi huri ginau dodolua?

²⁷Giv taria alun virangai be ram mauri lol ute vono: ram hav lol te rovoga sage ram hav ligo te gaisagara hurira sibora. Take nam bevea lalai kimiu be, Ratahigi Lavoa Solomon amua, kea atat rosoga maragai, take gaisagana nuhav ḡalana tehe kun virangai duluai kera uhu.

²⁸God haḡea be mwa ḡita ḡoro virangai duluai--virangai gabe ram dogo garigi ta vaigogo mwa bohaiana vai lol gabi. Matu gim hav binihi te be God vi lai gaisaga lalai kimiu? Iratua, nomiu binihimwasigi garagusi kolo maragai!”

²⁹“Gisav binbinihi te maragai huri havanau be giv gania sage giv mwinua.

³⁰(Huribe kea alen̄a gabe ira len̄len̄aga ram dogo maia lol ureure geki.) Tamamiu mwa iloe be gim doron ginau duluai geki.

³¹Take giv tau non ute amua gabe rahuan gara be mwa ratahigi alolona i kea vi hogoi lalai kimiu ginau duluai kera geki.”

³²“Gisav matagu tehe ira nitui sipsip bwatuna be Tamamiu mwa samsamwara be vi lai Rahuan Gara lalai kimiu lol ute gabe kea mwa ratahigi alolona.

³³Giv salei nomiu ginau duluai i giv lai mwane lalai ira hiru. Giv lol vatuvwai huri nomiu tan̄an mwane gabe sihav boboga te dum i giv varahu rosomiu duluai amare aben God. Aia ginau duluai rasav hantai tehe, bwatuna atat surasura sigai be men surai dumwira, kakurus mulei sihav gan te kaburai dumwira.

³⁴Huri be lol ute higea be rosomwa mwa do aia, lolomwa vi togo aia mulei.”

³⁵“Giv lol vatuvwai huri havanau te be vi mai, giv saga ḡoro kimiu i nomiu bulu vi tumusian dautau,

³⁶kun ira atatun rovoga gabe ram hohov nora ratahigi be vi tabagilu mulei nin lagiana. Haḡe mahavana be vi votu vi sirisirin̄i i kera rav havan̄ darihou gatava lalainia.

³⁷Vi vora ginau samsamwara lalai ira atatun rovoga gea batena nora ratahigi mwa habwera be kera ram mamata hohovia vaivotu mwa dabagilu! Nam bevea lalai kimiu be, kea vi tagahi non koti i vi hudalinira duluai be rav to mahuri huri ginaganiana i kea vi lalaḡo lalainira.

³⁸I kera rav samsamwara be si habwera be ram lol vatuvwai, gaituvwa n̄an be si mai abobon bon̄i sa ataguna!

³⁹I giv binihimwasigi aluna uhu be atatun imwa si iloe be atat susura vi mai, kea sihav mahin̄a tehe be atatu vi laḡe imwana.

⁴⁰I kimiu mulei giv mamata bwatuna Nitun Atatu vi mai lol mahavana gabe gim hav lol te vatuvwai huria.”

⁴¹Haḡe Pita mwa bevea lalainia be, “Ratahigi gom bev avoan dalogai uhu lalai kamai n̄ano sa lalai atatu duluai?”

⁴²Haḡe Ratahigi mwa bwaliua mwa bevea be, “Matu ihei atatun rovoga binihi marahi i mataisao? Kea be non ratahigi vi taria be vi ratahigi ḡoro imwa i vi harabora tatan̄an ginaganiana lalai atatun rovoga rituai la mwasin mahavana.

⁴³Samsamwara gaivua lalai atatun rovoga gea be non ratahigi si habwea be mwa lol kunia mahavana be mwa dabagilu.

⁴⁴Nam bevea lalai kimiu be non ratahigi vi tau atatun rovoga gea gi tomuai ḡoro non vataha ginau duluai.

⁴⁵Ta be si vora kea atatun rovoga hantai, si vevea sibona be noḡu ratahigi si hav tabagilu tehe vilvilehi, i gim dau bwatuna ba wehi non atatun rovoga dodolua, ira atamwani mai ira vavine i gim ḡangan i mwinmwin daltale,

⁴⁶haḡe non ratahigi vi visirai lol gubwen̄ vwate batena be atatun rovoga mwa hav hohovi te huria, i mwa hav ilo te mahavan alo non ratahigi be vi visirai alolona. Haḡe ratahigi vi lol ḡagarasia abera hantain lalaḡo.”

⁴⁷“Atatun rovoga gabe mwa ilo hano gabe non ratahigi mwa doronia be vi lolia, take mwa hav lol te vatuvwai be vi lolia, kea vi lai gai vivilis gogolosi huria.

⁴⁸Take atatun rovoga gabe mwa hav ilo te hano gabe non ratahigi mwa doronia, i ta mwa lol havanau hantai be mwa du be vi lai gaivivilisi huria, kea vi laia dadariha n̄ano. Atatu gabe mwa lai liu, ninia kea vi laia liu; lalai ihei mwa hogoi gaivua liu, kea vi lai gaivua liu mulei.”

⁴⁹“Nan mai be namen tau ureure lol gabi, gabi gabe nam doronia be men oda kadogaha ta mwa hav oda te radu!

⁵⁰Nam haḡo silon garuhisabuga vwate be nav garuhisabuga aluna, mwa ḡaras maragaiau tagaro vaivotu vi visirai i vi nogo.

⁵¹Matu gim binihia be nam mai be namen lai tamwata lalai ureure? Sigai, mwa hav vora te tamwata, nam bevea lalai kimiu, ta silo harabora.

⁵²Nin kekadogaha imwa gaituvwa mai atatu gailima alolona vi harabora, gaitolu rav ivwalui gairua, i gairua rav ivwalui gaitolu.

⁵³Ira tama rav ivwalui ira naturigi i ira naturigi rav ivwalui ira tama, ira ratahi rav ivwalui ira naturigi i ira naturigi rav ivwalui ira ratahi i ira mambi rav ivwalui ira sibi i ira sibi rav ivwalui ira mambi.”

⁵⁴Haḡe Jisas mwa bev muleinia lalai sinombu be, “Mahavana be giv gita ten lan̄i mwa hamai nin halan al huhuni, vilvilehi gim bevea be, Vi uhe, i kea mwa uhe.

⁵⁵I mahavana gim ron̄ gadue mwa here gim bevea be uhugaha ute vi hahavwani, i mwa ḡunia.

⁵⁶Kimiu ira hoḡoiḡoro! Gim ḡita dum dovon̄a ata lol ureure i la mahao amare vuvuri gim bev dum binihiva huria, huri hano gim hav ilo te binihiva huri gubwen̄ garigi?”

⁵⁷“Huri hano gim hav gita te batoi havanau vavtutu be giv lolia?

⁵⁸Be atatu vwate si gitae be gom lol hantai lalainia i mwa doron be vi laigo vai lol imwan harahara nu tavuha be gov lol tamwata maia amua gom siv haroro lol imwan harahara. Be sigai kea vi laigo vai aben wani vevegi i wani vevegi vi laigo vai aben polis i ira polis rav taugo lol imwa vauvauhi.

⁵⁹Nam bev mwasigi lalainigo be, aia gosav mwalue te dum, vaivotu be gov vohai doren nom homu huri bugumwa.”