Read Hano Luk 14 Bible Online

Luk 14 - Hano bible

Luk 14

¹Haḡe lol gubwen̄ mambuharai vwate Jisas mwa ban be men gan ginau lol imwan tomuai Varise vwate; sinombu ram du sosori Jisas ram matainia.

²Atatu vwate bwalagena mai limana ram sisibo, kea mwa mai aben Jisas,

³haḡe Jisas mwa hudalinira vagahin silo maira Varise mwa bevea be, “Kun hanigi nonda silo mwa mahin̄a dum be tav lol barahu lol gubwen̄ mambuharai, sa sigai?”

⁴Take kera ram hav vev te dum hano. Jisas mwa lai wani gea, mwa barahu vuvuri, mwa hora dagainia.

⁵Haḡe mwa bevea lalainira be, “Be si vora ihei vwate nin kimiu nituna atamwani sa bilan buluki si hovi lol lulun wai lol gubwen̄ mambuharai, matu si hav rav te lua dum darihounia lol gubwen̄ n̄an kea?”

⁶Take ram hav vwaliu te dumwia.

⁷Jisas mwa ḡita batoia be ira tausala rituai ram ḡita lua ute tavuha be rav togo aia, i kea mwa avo gin avoan dalogai lalainira duluai mwa bevea be:

⁸“Be ihei tehe mwa uloinigo vai lol ginaganiana huri lagiana, gosav togo tehe la tanon togotogo tavuha. Daga atatu vwate gabe nu lavoa ninigo, kea mulei vuigin lagiana nu uloinia,

⁹i kunia vuigin lagiana gabe nu uloi saraḡo kimiru huri ginaganiana vi mai ba bevea lalainigo be, ‘Lin̄ tanomwa lalai wani uhu?’ Kunia giḡo gov busbusi bwatuna gov lai tanoi hivhivo.

¹⁰Mahavana be ram uloinigo gov lai tanon togotogo hivhivo, bwatuna be wani gabe mwa warego vi mai vi vevea lalainigo be, ‘Hamai lua noḡu buluana, vai lol tanon togotogo tavuha.’ Kunia gov lai ute roroa la lolmatan ira tausala rituai.

¹¹Bwatuna be ihei tehe be mwa binihi sagea sibona vi togo hivhivo, i ihei tehe gabe mwa binihi bahivoinia sibona vi togo haehae.”

¹²Haḡe Jisas mwa bevea lalai vuigin imwa be, “Mahavana be gom lol ginaganiana, gosav uloi te nom buluana, sage ira tuamwa sa kera ata la vanuamwa sage ira ratahigin roso gim dogo ute gaituvwa--bwatuna be kera mulei rav uloi dumwigo ataguna huri ginaganiana, kunia ram ḡel mulei hano be gon lolia lalainira.

¹³Take mahavana be gom lol ginaganiana, gov ware ira hiru, ira luḡu, maira matagara.

¹⁴I kunia vi vatavuhanigo huria bwatuna be kera uhu rasav ḡele te dum mulei ginaganiana gabe gon van̄anira ginia. Take God sibona vi ḡelea lalainigo lol mahavana be ira vavtutu rav tomare mulei nin mateana.”

¹⁵Batena atatu vwate ninira ram do mahuri la tebol huri ginaganiana mwa ron̄ dumwia mwa bevea lalai Jisas be, “Samsamwara gaivua lalai ira hei gabe rav togo lol tanon lavoa lol Rahuan Gara gabe God mwa Ratahigi ḡoro non sinombu alolona!”

¹⁶Haḡe Jisas mwa bevea lalainia be, “Atatu vwate mwa lol ginaganian lavoa i mwa uloi mai sinombu huria.

¹⁷Batena be taron ginaganiana mwa mai kea mwa hora non atatun rovoga be men vev serae lalainira be nu warera be ‘Mai, ginau duluai nu lol vatuvwaiana huba!’

¹⁸Haḡe ram dau bwatuna, ram ḡolainia vwate atagun vwate. Muai atatu mwa bevea lalai atatun rovoga be, ‘Nan vol talu vwate nav van be ḡitae; gov lai noḡu avoan hahagavi nasav matu te dum.’

¹⁹Haḡe vwate mulei mwa bevea be, ‘Nan vol buluki han̄vulu namen van ba lol ron̄ora, gov lai noḡu avoan hahagavi.’

²⁰Kunia vwate mulei mwa bevea be, ‘Inau nam siv lagi, bwatuna gea nasav matu te dum.’ ”

²¹“Haḡe atatun rovoga mwa dabagil mulei mwa bev sera ginau duluai lalai non ratahigi. Haḡe ratahigi mwa lol horo maragai mwa bevea lalai non atatun rovoga be, ‘Gov van vilehi vai la hal lalavoa mai hal ririgi lol bwatutun vanua, gov lai ira hiru, ira luḡu, ira matagara mai kera be bwalagera ran hantai.’

²²Atagun n̄an darihou atatun rovoga mwa bevea be, ‘Nom doroniva ratahigi nan lolia huba, take mahavana gaivua radu alolon imwa.’

²³Haḡe ratahigi mwa bevea lalai atatun rovoga be, ‘Gov van vai alolon vanua la hal gaivua i vataha hal ririgi gov lai ira hei gom habwera vai mai huri be imwaḡu vi masiri.

²⁴Nam bevea lalai kimiu duluai be ihei gaituvwa ninira gabe nan uloinira sihav gan te ron̄ n̄an alun noḡu ginaganiana!’ ”

²⁵La mahavan vwate batena sinombu ivusi ram ban bul mai Jisas, kea mwa ban burigai mwa bevea lalainira be,

²⁶“Be ihei tehe mwa mai huriau sihav vora te noḡu roron̄tai dum vaivotu vi tabeau liu nin tamana mai ratahina, tasalana mai ira nituna, ira tuana mai hogosina i vaivotu kea mulei sibona.

²⁷I ihei gabe mwa hav lai te lua non volovolo be vi huria, wani mulei gea mwa hav dadariha tehe be vi vora noḡu roron̄tai.”

²⁸“Be vwate nin kimiu mwa daritari be vi haḡo imwa holomare, kea vi tomahuri amua vi lol ron̄ homuna be vi gan homu gaiviha, vi gitae be homu nu dadariha be vi nogoi dum rovoga gea sa sigai.

²⁹Haḡe ta be sihav lol te dumwia vi ririhai lalainia be vi nogoi dum imwa holomare uhu ataguna be nu lol vuvuri bwatbwatuna huba; i kera be ram ḡita ginau uhu be mwa lolia kunia rav manuhia.

³⁰Rav vevea be, ‘Atatu uhu nu tau bwatuna mwa haḡo imwa take si hav nogoi te dumwia!’”

³¹“Be ratahigi lavoa vwate mwa mwalue mai non atatun bwaloana vasan̄vul vahan̄vulu be men bwalo mai ratahigi lavoa dolua gabe mwa mai huria mai non atatun bwaloana vasan̄vul van̄avul gairua, wani gea vi tomahuri amua vi binbinihi huria, vi gitae be kea non muramura nu dadariha be vi bwalo dum mai ratahigi lavoa dolua gea sa sigai.

³²Be mwa habwea be non muramura nu hav dadariha tehe be vi bwalo mai ratahigi dolua, kea vi hora non horata vai aben ratahigi gea, batena mwa mai hautu radu, vi hudalinia huri tamwata.”

³³Haḡe Jisas mwa bev nogonogoinia be, “La hala n̄an kea mulei, tuamiu vwate nin kimiu sihav vora te noḡu roron̄tai dum vaivotu be vi binihi dul rosona duluai.”

³⁴“Tahi garagara nu tavuha, take mahavana be garagarana mwa bano hala mulei sigai be vi loliana vi garagara mulei.

³⁵Nu hav tavuha tehe huri tano sage rahun tano: mwa du n̄an be vi vohaian kaburai. Be bweromiu abena giv roron̄tai!”