Read Hano Luk 16 Bible Online

Luk 16 - Hano bible

Luk 16

¹Haḡe Jisas mwa avo lalainira non roron̄tai mwa bevea be, “Ratahigin homu vwate non atatun rovoga abena gabe mwa ḡitaḡoro non rovoga. Mahavan vwate atatu rituai ram mai ram bevea lalai atat rosoga gea be wani gabe mwa ḡitaḡoro non rovoga mwa lol bwarebware non homu.

²Haḡe ratahigi mwa hora huria be men mai vai abena i mwa hudalinia be, ‘Hano gabe nam ron̄oe hurigo? Gov hagai lua ravrav seserai lalaiau huri hala duluai gabe gom lalaḡoi rosoku aluna, huri be gosav mom bora te noḡu gitaḡoro.’

³Haḡe atatun rovoga mwa bevea ginia sibona be ‘Noḡu ratahigi vi vev dagaiau nin noḡu rovoga. Nav lol hano? Nam hav wasi te dadariha be nav gel dum halan wai, i nam busbusi be nav uraura.

⁴O, kadogaha nam ilo havanau be nav lolia. Mahavana gabe vuigin rovoga vi vev dagaiau nin noḡu rovoga, vi vora ira noḡu buluana gabe rav lai ḡoḡoau vai lol imwara.’”

⁵“Kea mwa uloi ḡoḡo sinombu gabe ran haḡo homu non ratahigi. Haḡe mwa hudali muana be ‘Vuromwa gaiviha aben noḡu ratahigi?’

⁶Haḡe kea be, ‘Buḡalin hun oliv vudolua,’ haḡe mwa bevea be, ‘Geki nom ravrav seserai huri homu, tomahuri ba rav ḡoro n̄avul gailima.’

⁷Haḡe mwa bevea lalai vwate mulei be, ‘Giḡo vuromwa gaiviha?’ Haḡe mwa bwaliua be, ‘Tan̄an wit vasan̄vulu.’ Haḡe gitaḡoro mwa bevea lalainia be, ‘Geki ravravan homu. Gov tomahuri ba rav vudolua vavwelu.’”

⁸“Haḡe gitaḡoro hantai mwa lol vavtutui halan non lalaḡova i kunia non ratahigi mwa avkari maragai nia huri be kea atat mataisao. Bwatuna ira atatu ata lol ureure ran mataisaoga huri lalaḡova nin nira ata lol gigita.”

⁹Haḡe Jisas mwa bev muleinia be, “Kunia nam bevea lalai kimiu be: giv mwemwearu gingin kimiu mai roso ata lol ureure, huri be batena be vi vinogonogo take rav lai ḡoḡo dum kimiu vai lol rahuana gabe vi togo vai tuai.

¹⁰Be ihei tehe mwa ḡoḡoi ḡoro ginau tirigi vi ḡoḡoi ḡoro dum ginau gaivua; be ihei mwa hav lalaḡoi te dum ginau tirigi kunia sihav lalaḡoi te dum ginau lalavoa.

¹¹Be gim hav lalaḡoi te tavuhai roso ata lol ureure, rav binihimwasigi hanini kimiu mai mwasin roso?

¹²Be gim hav lalaḡoi te tavuhai ginau non atat dolua, ihei vi lai ginau lalai kimiu gabe nomiu sibomiu be giv gitaḡorora?”

¹³“Atatun rovoga sihav vora te turin rovoga dum lalai ratahigi gairua; kea vi varihai vwate i vi tabe vwate; kea vi binihi marahi vwate i vi varihai vwate. Gisav lalaḡo te dum lalai God mai homu vatuvwa.”

¹⁴Haḡe batena be ira Varise ram ron̄ ginau duluai uhu, ram sovui Jisas bwatuna be kera ram dabe homu.

¹⁵Jisas mwa bevea lalainira be, “Kimiu haḡea atatu gabe gim lol kimiu sibomiu kun be atat vatutu la lolmatan atatu duluai, take God mwa ilo nomiu binihiva duluai lol lolomiu. Huri havanau tehe be ran marahi lol binihiva non atatu kea ginau vuroi n̄an la lolmatan God.”

¹⁶“Silo non Moses mai ravrava duluai non ira atatun vevsera nu huriana vaivotu gubwen̄in Jon Garuhisabuga; atagun gea Roroi Tavuha huri Rahuan Gara gabe God mwa Ratahigi ḡoro non sinombu alolona, i sinombu ram lol ron̄ maragainia be rav haroro alolona.

¹⁷Take nu maron̄ron̄o be amare mai ureure vi nogo kaburai ninia be tabwahan Silo tirisavele uhu vi lolian kaburai.”

¹⁸“Be ihei tehe mwa bev dagai tasalana i mwa lagi mai vavine dolua mwa buroga; i be ihei mwa lagi mai vavin vev dagara gea kea mulei mwa buroga.”

¹⁹“Lol mahavan vwate ratahigi vwate nu togo, nu sagasagai gaisaga tavtavuha maragai, kea nu togo samsamwara vataha gubwen̄ lol rahuna.

²⁰Haḡe hiru vwate ihana Lasarus nu manmanuga, tagaro ram laia vai la matgatavan imwan ratahigin homu,

²¹kea mwa doronhohov be vi gan te dum mamarahan ginaganiana gabe mwa bihovihovi nin tanon ginaganiana non ratahigin homu. Vwiriu mulei ram mai ram mean manugana.”

²²“Haḡe batena be hiru mwa mate ira enjel ram dataloe ram daua hurin Ebraham lol ginaganian lavoa lol ute atamare: batena be ratahigin homu mwa mate ram davinia,

²³i kea mwa ron̄ gagarasi maragai lol gabi; mwa dada vai amare mwa ḡita Ebraham hautu mai Lasarus hurinia.

²⁴Haḡe mwa uloi Ebraham mwa bevea be, ‘Tata Ebraham!’ Gov gita hagaviau, hora Lasarus be vi ruhu bihuna lol wai i vi mai ba lol masisi meaḡu mai, bwatuna be gabi uhu mwa havwan maragaiau!”

²⁵Take Ebraham mwa bevea be, “Gov binihi dumwia nituku, be lol gubwen̄in rahumwa gon haḡo ginau tavtavuha ivusi, i Lasarus nu to ririhai lol rahuna. Ta uhugaha kea mwa samsamwara teti i giḡo gom ron̄ ḡagarasi.

²⁶Ninia duluai gea lulu roro mwa harabora gida mulei, kera nin teti ram doron be ramen lago vai abemwa ta rasav matu te dum, i nin aia vai abemai sihav dum tehe.”

²⁷Haḡe ratahigin homu mwa bevea be, “Nu tavuha tata, ta nam hudalinigo be gov hora Lasarus vai lol imwan tamaḡu,

²⁸vai aben ira tuaku gailima. Lin̄ia na vano ba bev serae lalainira be kera rasav mom mai te lol ute ron̄ḡagarasi uhu.”

²⁹Haḡe Ebraham mwa bwaliua be, “Ira tuamwa ram do bul mai Moses i ira atatun vevsera be rav vasinerani nira huria. Mwa du be ira tuamwa rav ron̄ hano be ram bevea.”

³⁰Haḡe ratahigin homu mwa bwaliua mwa bevea be, “Kea nu hav dadariha tehe, tata Ebraham! Be si vora vwate ninira atat mate si tomare nin mateana ba ban vai abera, kunia ras van burigai dum nin vurora.”

³¹Take Ebraham mwa bwaliu mwa bevea be, “Be rasav ron̄ te Moses maira atatun vevsera, rasav binihi te mwasigi ihei, gaituvwa n̄an be vwate ninira atat mate si tomare mulei.”