Read Hano Luk 18 Bible Online

Luk 18 - Hano bible

Luk 18

¹Haḡe Jisas mwa bev avoan dalogai geki lalainira non roron̄tai be men vagahira be rav tataro tagaro huri be rasav mandamanda tehe.

²Mwa bevea be, “Lol bwatutun vanua vwate ratahigi vwate mwa dogo mwa hav matagun te God i mwa hav binihi te marahi atatu.

³Haḡe bwero vavine vwate lol bwatutun vanua n̄an gea mwa mai tagaro vai abena mwa hudali buluiana ninia mwa bevea be, ‘Nam doron be gov vavtutui nomaru viloliana mai noḡu ivwalu!’

⁴Huri mahavana n̄ava wani vevev mwa hav buluia tehe take la nogonana mwa bevea lalainia sibona be, ‘Son̄o be nam hav matagun te God sage nam hav binihi te marahi atatu,

⁵take bwatuna be bwero uhu mwa lol n̄alaiau tagaro nav gitae be hano mwa hudaligi huria vi lai dumwia, sa be nasav buluia tehe vi ali tagaro vai abeku vi loliau nav n̄ala ginia!’ ”

⁶Haḡe Ratahigi mwa bev muleinia be, “Giv roron̄tai didinigi huri hano be tavalten vevev mwa bevea.

⁷Kun hanigi God sihav tabe te non sinombu gabe ram dan̄ihi buluiana ninia bon̄i i rani? Matu kea vi ron̄mwan̄ava huri be men buluira?

⁸Nam bevea lalai kimiu be, vi vevev hurin non doroniva i vi lol vilvilehi nia? Take Nitun Atatu vi habwe dum binihimwasigi lol ureure lol mahava be vi mai?”

⁹Jisas mwa bev mulei avoan dalogai uhu lalai sinombu gabe ram binihi sagera sibora i ram barihai mutai atatu dodolua.

¹⁰Mwa bevea be, “La mahavan vwate atatu gairua ramuru hae vai lol Imwa Tataro be raru men tataro: vwate Varise, vwate harahara homu.”

¹¹Varise mwa du hautu dagai gahena mwa dataro kungeki be, “Nam avkarigo God, huri be nam hav vora te bugurana, sa nam hav binihi te mamarai atatu, sa nam hav vuroga te mai vavine kun atat dodolua. Nam avkarigo huri be nam hav vora te kun atatun harahara homu kahaḡa.

¹²Nam ḡaragara vwavwa gubwen̄ gairua vataha wik, i nam lai han̄vulun bilaku lol rahuku lalainigo gabe mwa mai lalaiau.”

¹³“Take harahara homu mwa du ban dagai hautu mwa dutui bwabwana mwa bevea be, ‘God gov hagaviau mai vuroku!’ ”

¹⁴Haḡe Jisas mwa bevea be, “Nam bev lalai kimiu be, atatun harahara homu, ta mwa hav vora te Varise kea nu vavtutu la lolmatan God batena gabe nu tabagil mulei vai la vanuana. Bwatuna be ihei tehe mwa binihi lavoania sibona vi togo maḡemu, ta be ihei mwa dogo maḡemu vi mai i lavoa.”

¹⁵Atatu rituai ram lai ira nitura vai aben Jisas be men tau limana alura. Take mahavan gabe ira roron̄tai ram ḡitara ram avo wasi ram du ḡorora,

¹⁶take Jisas mwa uloi ira naturirigi vai abena i mwa bevea be, “Giv lin̄ naturirigi be rav mai huriau gisav tu te ḡorora, bwatuna be atatu be alen̄ana kun ira naturirigi, God mwa bora nora ratahigi.

¹⁷Giv binihi dum ginau uhu! Ihei tehe mwa hav lai te rahuan gara gabe God mwa Ratahigi alolona kun naturirigi sihav haroro te dum alolona.”

¹⁸Haḡe tomuai vwate nora Jius mwa hudali Jisas mwa bevea be, “Vagahi Tavuha, nav lol hano be nav lai dum rahuana vai tuai?”

¹⁹Haḡe Jisas mwa hudalinia be, “Huri hano gom uloiau be tavuha? Atatu vwate nu hav tavuha tehe take God gaituvwa n̄an gahena.

²⁰Gom ilo Leohorai duluai: ‘Gosav vuroga te mai vavine; gosav wehi te bonogai ihei; gosav sura tehe; gosav tentene tehe; gov tabe tamamwa mai ratahimwa.’ ”

²¹Haḡe wani mwa bwaliua be, “Mahavana be inau malaḡelo, nan ḡoḡoi ḡoro Leohorai duluai uhu.”

²²Mahavana be Jisas mwa ron̄ non avoan vwaliu uhu, mwa bevea lalainia be, “Take ginau vwate radu be gov lolia, van ba salei nom vilogoana, i gov lai homu lalai ira hiru. Kunia gov lai rosomwa amare; vuvuri gov mai ba huriau.”

²³Haḡe mahavana be wani uhu mwa ron̄oe kunia mwa bavora mwa ron̄mwahantai bwatuna be rosona gaivua maragai.

²⁴Jisas mwa ḡitae be mwa ron̄mwahantai mwa bevea be, “Nu ririhai maragai lalai irahei rosora gaivua be rav haroro lol rahuan gara non God gabe mwa ratahigi alolona!

²⁵Nam bevea mulei lalai kimiu be nu ririhai liu huri atat rosoga be vi haroro dum lol Rahuan Gara ninia be kamel vi bwihi la halan tereti ata la nidil.”

²⁶Haḡe sinombu duluai gabe ran tu aia ram ron̄oe ram bevea be, “Ihei, gabe vi rahu dum?”

²⁷Haḡe Jisas mwa bwaliura be, “Hano tehe gabe nu ririhai lalai atatu nu maron̄ron̄o n̄an lalai God.”

²⁸Haḡe Pita mwa bevea be, “Gitae! Gan lin̄ imwamai be gamen hurigo.”

²⁹Haḡe Jisas mwa bwaliura be, “Nav vev ginau uhu lalai kimiu, be ihei tehe mwa lin̄ imwana sa tasalana sa ira tuana sa tamana mai ratahina sa ira nituna huri rahuan gara gabe God mwa ratahigi ḡoro non sinombu alolona,

³⁰kea vi lai liu lol rahuan geki i lol rahuana vi mai kea vi lai rahuana vai tuai.”

³¹Haḡe Jisas mwa lai ira roron̄tai han̄vul domwan gairua dagai i mwa bevea lalainira be, “Giv ron̄oe! Gida tamen hae vai Jerusalem, aia ginau duluai ravrava non ira atatun vevsera ran vevea huri Nitun Atatu vi visirai.

³²Kea vi lin̄iana vai lol liman ira len̄len̄aga, i kera rav lol leileia, rav vev hantainia i rav lodovia.

³³Kera rav vivilisia i rav wehi bamatea, take atagun gubwen̄ gaitolu kea vi tomare mulei vai lol rahuana.”

³⁴Take non roron̄tai ram hav ron̄ te batoi ginau kera geki i binihiva huri non avoana nu hav melmelo tehe lalainira i kera ram hav ilo te dum hano gabe Jisas mwa avo huria.

³⁵Jisas mwa mai abena gin Jeriko, aia matagara vwate mwa dogo la balsin hala mwa uraura homu.

³⁶Mahavana be mwa ron̄ sinombu gabe ram avlaḡao mwa hudaligi be, “Hano uhu?”

³⁷Haḡe ram bwaliua be, “Jisas ata Nasaret mwa ḡao la hala.”

³⁸Kea mwa ulo amare mwa bevea be, “Jisas! Nitun Deved! Gov hagaviau!”

³⁹Haḡe sinombu gabe ran tomua ram bevea lalainia be vi to ḡoḡonai. Take kea mwa ulo mulei amare maragai be, “Nitun Deved! Gov hagaviau!”

⁴⁰Haḡe Jisas mwa barahidu i mwa bevea be rav lai matagara vai abena. Mahavana be mwa mai sosori, Jisas mwa hudalinia be,

⁴¹“Gom doron be nav lol hano lalainigo?” I kea mwa bwaliua be, “Ratahigi, nam doron be nav gita mulei ute.”

⁴²Haḡe Jisas mwa bwaliua be, “Kunia gita ute! Nom binihimwasigi garagusi mwa barahugo.”

⁴³Haḡe vilehi kea mwa ḡita mulei ute, i mwa huri Jisas, mwa avkari God. Mahavana be sinombu ram ḡitae, kera duluai ram lol roroai God huria.